15
Ni rüjn persi rajc bejn béndol
(Mr. 7:1‑23)
1 Bénfarisew ree con ree mextr rajc ley, bén za ree Jerusalén, gubig reeman loj Jesús abiꞌ gunabdiidx reeman lojman, rëb reeman
2 ―¿Chexc zeel ad zinalt ree xbejnl costumbr ni basaꞌn dux béngulal ree? ¿Chexc zeel ad zinalt reeman costumbr ziꞌc rayal gunaa reeman chi gad reeman gaw?
3 Dxel rëb Jesús loj reeman:
―Laadx lëjt, ¿chexc zeel rüjndi xtiidx Dios tiblad persi zinal xcostumbridi?
4 Din Dios rëb: “Gojp respejt xDadil con xniaal”, abiꞌ “Bén rniee diidxguijdx loj xdadaman o xniaaman ya, rayal guiëtaman.”
5 Per lëjt rëb zileꞌ guiëb bejn loj xdadaman o xniaaman: “Ad zileꞌt günan lüj yudar, din gra ni raꞌpan na̱j par Dios.”
6 Rëbidi guial bén guiniee zian, ad zileꞌt güün yudar xdadaman con xniaaman, abiꞌ zian rbëëladxidi xtiidx Dios persi zinal xcostumbridi.
7 ¡Bén rusquiee! ¡Rüjnzidi guial nabandi xnejz! Waliqui ni gunee Isaías, bén badëë xtiidx Dios loj ree bejn, chi rëbaman:
8 Bén guie ree rëbzi reeman rniajchiꞌ reeman naj,
per ad rënt reeman naj con guidib luxdoo reeman.
9 Xliaꞌczi rniajchiꞌ reeman naj,
abiꞌ rulüü reeman bejn ree ganaxzi ni rbëëguijc ree bénguidxliuj.
10 Dxel gurejdx Jesús ben zien rigaꞌ ree yagaj, abiꞌ rëbaman loj reeman:
―Gol bacaagdiajg, gol bigniaꞌ tëë ni ganin lojdi.
11 Ad ni rawt bejn rüjn laaman béndol, ni ririi roꞌman laan rüjn laaman béndol.
12 Dxel gubig ree xbejn Jesús lojman, rëb reeman:
―¿Gogbeel ya bidxeꞌch ree bénfarisew chi biguiejn reeman ni guneel?
13 Badxiꞌ Jesús laan rëbaman:
―Gra ni ad zëëdt por da Dadan Dios bén yuꞌ xanyabaa, yuꞌ dxej nitan.
14 Zeel gol basaꞌn reeman din laa reeman na̱j ziꞌc tijb bénlutiaꞌp rulüü stijb bénlutiaꞌp ban niz cheman. Abiꞌ bal tijb bénlutiaꞌp gulüü stijb bénlutiaꞌp guin, zayajb grop reeman roꞌ balaꞌ.
15 Dxel rëb Bëd loj Jesús:
―¿Basigniaꞌ dunujn xhie rën guiëb ni guneel?
16 Badxiꞌ Jesúsan rëbaman:
―¿Wen, niꞌqui lëjt ad rigniaꞌtan ya?
17 ¿Id rigniaꞌdi ya guial gra ni raw bejn rej lënman abiꞌ rariin?
18 Per diidx ririi roꞌ bejn, luxdooman zan, abiꞌ laan rüjn laaman béndol.
19 Din luxdoo bejn za graloj ree xgabmal, guialrugüjt bejn, guial rüjn nidxuudx, guialrzunë lacheel ben ren, guialrban, guialrusquiee në guialrniee diidxguijdx loj lasaꞌ.
20 Gra ree ni guie na̱j ni rüjn bejn béndol. Per guial ad zunaat bejn ziꞌc na̱j costumbr ni rayal güün bejn chi gadaman gaw, ad laatan na̱j ni rüjn laaman béndol.
Tijb béngunaa Canaán bililadx Jesús
(Mr. 7:24‑30)
21 Chi baza Jesús yagaj zëman niz Tiro në niz Sidón.
22 Abiꞌ yagaj zojb tijb béngunaa za niz Canaán, briiman, rbixdiajman rëbaman loj Jesús:
―¡Dad, xdiaa Davi, baya naj! Da xiꞌndxaꞌpan yuꞌ bendxab luxdoom, dád rusagziman laam.
23 Abiꞌ Jesús ad badxiꞌtaman xtiidx béngunaa guin. Dxel gubig ree xbejnman lojman, rëb reeman:
―Bidxgaꞌ béngunaa guin, din yaguiajman, din rbixdiajman nalaman dunuj ree.
24 Dxel rëb Jesús:
―Dios guxhaal naj din günan yudar ganaxzi ree bén Israel zë loj nejz mal.
25 Per béngunaa guin bigzuxibaman loj Jesús, rëbaman:
―¡Dad, gognë naj!
26 Badxiꞌ Jesúsan, rëbaman:
―Ad zagdxet na̱j chiquied bejn guiadxtil loj xiꞌnman din gudëëdaman laan loj ree bëꞌcw.
27 Badxiꞌ béngunaa guinan, rëbaman:
―Waliquil, Dad, per në ree bëꞌcw rutoꞌp guiadxtil laay ni ryajb xan xmex bén na̱j xbëꞌcw laa reeb.
28 Dxel rëb Jesús lojman:
―¡Na, waliquil rliladxil con guidib luxdool! Gac ziꞌc rënl.
Loj hor guin gajc bayajc xiꞌn bén guin.
Rayüjn Jesüs zien ree bénragxuu
29 Baza Jesús yagaj, bidxinman roꞌ nijs Galilea, dxel wëꞌpaman guijc tijb guiaꞌ abiꞌ gurejman yagaj.
30 Dád zien bejn bidoꞌp lod zaꞌman. Binë reeman bencoj ree, në ree bénlutiaꞌp, në ree bén ad rüjnt xuꞌc dxiin, con ree bengop në zien ree bénragxuu ren ree, badxig reeman laa reeman loj Jesús, abiꞌ bayüjnman laa reeman.
31 Dád badxa loj ree bejn chi baguiaa reeman ma rniee ree bengop, ma bayajc xuꞌc ree bén ad rüjnt dxiin xuꞌc, guiáad ree bencoj ma rza reeman abiꞌ ree bénlutiaꞌp ruguiaa reeman. Zianz guzuloj cuzaꞌt reeman zagdxe xDios ree bén Israel.
Ruyaan Jesús tajp mil bejn
(Mr. 8:1‑10)
32 Abiꞌ gurejdx Jesús bén na̱j ree xbejnman, rëbaman loj reeman:
―Rayan bén guin ree, din ma gojc choon dxej zaꞌ reeman con naj, abiꞌ achet ni gaw reeman. Ad rëntan yaguꞌnejzan laa reeman sin guialraw ad nial yadaj reeman niz lunejz.
33 Dxel rëb ree xbejnman lojman:
―Per ¿ban guin yucaꞌn ni gaw ree benzien guin, ziꞌc na̱j guie lod achutczi bejn zojb?
34 Gunabdiidx Jesús loj reeman, rëbaman:
―¿Bël guiadxtil caꞌdi?
Badxiꞌ reeman laan rëb reeman:
―Gajdx guiadxtil con zatioꞌp choon bëjl.
35 Dxel gunabee Jesús gurej gra ree bén guin luyuj.
36 Abiꞌ cwaꞌman guigajdx ree guiadxtil guin con ree bëjl guin, badëëman quixtëë loj Dios. Dxel gulaꞌman laa reen, badëëman laa reen loj ree xbejnman persi gudiꞌs reeman laa reen loj gra ree bén guin.
37 Gra reeman gudaw xt bigdxinladx reeman. Abiꞌ staczi bacha reeman gajdx dxüm ni bayaꞌn.
38 Bén gudaw ree na̱j reeman tajp mil xinguiaaw, garenqui ree béngunaa con ree xindoo.
39 Dxel bazaadiidxnë Jesús laa reeman, abiꞌ guyuman loj barcw ziaman niz Magadán.