21
Benne' dxenná bea dxebéle̱'e̱ne̱' nen xel-la' waca chiu', Xran,
na' ca naca xel-la' weselá chiu' dxebéle̱'e̱ne̱'.
Bnézruju' le̱' da guzá lazre̱',
ne quebe bzagu' da gunabe̱' Lue'.
Guzí' lu na'u le̱', ne be̱nu' dxaca chawe' chee̱'.
Nuzriu' xíchaje̱' tu da naca na oro.
Gunabe̱' Lue' gunnu' le̱' xel-la' nabán,
na' bnézruju' na le̱' chee̱ súaqueze̱' zane' iza.
Zrente̱ naca xabáa chee̱' lawe' da bseláu' le̱'.
Be̱nnu' le̱' xel-la' ba lá'ana, ne xel-la' szren.
Lawe' da nunu' gaca chawe' chee̱' chadía chacanna
dxunu' dxebéle̱'e̱ne̱' lau Lue'.
Lawe' da dxuxrén lazre' wenná bea na' Xránadxu,
xexache lazre' Dios szrente̱ le̱',
na' quebe sue̱' lu da ste̱be.
 
Xulétaju' xúgute̱ benne' dxeledábague̱' lue'.
Xel-la' waca chiu' xulétaju' benne' ca' dxelecuídene̱' lue'.
Lu zra na' zra'u le̱' gaca chee̱ benne' ca'
ca guzú' le̱' lu xi' ga dxulúzrie̱' bla'dau'.
Xránadxu guzúzruje̱' benne' ca' lu xel-la' dxezrá'a chee̱',
na' xi' na' guzezxe na le̱'.
 
10 Xúgute̱ da belune̱' lu xe̱zr la xu nigá guzria xi'u,
ne xegú' zri'ine zre sue̱' ládujla bénneache,
11 lawe' da gulaca lazre̱' xelune̱' da cale̱la chiu' Lue'.
Gulilaj lazre̱' ca da xelune̱', san quebe bi xelezéquene̱',
12 lawe' da gulagu' benne' ca'.
Nucuezu' xaga nalá xéche'ze chiu' chee̱ le̱'.
13 Begá'ana szrénqueze Lue', Xran, lu xel-la' wal-la chiu'.
Tu gúl-lazquezdxu, ne tu güe lá'anazquezdxu Lue'
ca naca xel-la' waca chiu'.