22
Dios chia', Dios chia', ¿bizr chee̱ na' nusán lazru' neda'?
¿Bizr chee̱ na' quebe dxennu' da dxenaba' Lue'
chee̱ guseláu' neda'?
Dios chia', dxuláwizra' Lue' te zra, ne quebe dxexeche̱bu' chia'.
Dxuláwizra' Lue' chizrela, ne quebe dxezí'i lazra'.
Lá'azxa nacu' Lue'.
Nacu' Benne' dxebeze̱' naga dxelúe lá'ana benne' Israel Lue'.
Xra xrtáuntu' gulebeza lazre̱' Lue'.
Gulebeza lazre̱', na' bseláu' le̱'.
Bululáwizre̱' Lue', na' belelé̱'.
Buluxrén lazre̱' Lue', na' quebe belexedué'ene̱'.
Neda' naca' ca tu be̱la' gúna'dau', ne quegá bénneache.
Dxelecuide bénneache neda', ne dxuluzúe̱' neda' chalá'ala.
Xúgute̱ benne' dxelelé'e neda' dxelún le̱' chia'.
Lu da dxelún le̱' chia' dxelexrá dxu'e̱,
ne dxulutá xíchaje̱', dxelenné̱':
“Bzua cuine̱' lu na' Xránadxu chee̱ guselé̱' le̱'.
Guselé̱' le̱' che dxezaca ba lázrele̱ne̱' le̱'.”
Lue' nacu' Bénnea' be̱xru' neda' gate gúlaja'.
Be̱nu' bxren lazra' Lue' gate na' ne dxázretea'.
10 Guxu'a lu na'u gate quebe ne gálajtea'.
Gate ne xu'a lu le̱'e̱ xrna'a, báchequeze nacu' Dios chia'.
11 Quebe xebigu' naga zua' lawe' da zua gágute̱
da gusaca zi na neda',
ne quebe nu chilá' benne' gácale̱ne̱' neda'.
12 Zaj naxechaj benne' dxeledábague̱' neda' ca be̱zre ca'.
Zaj naxechaj benne' neda' zaj naque̱' ca be̱zre wal-la ca'
chee̱ Basán.
13 Gulaca lazre̱' xuluzría xi'e̱ neda'
ca tu be̱zre xixre' dxedunba', ne dxebezre xa'aba'.
14 Bebizre lazra' ca nisa da nalalaj na lu xu,
na' ca naca zrita xu'a bulusán ljwezre na.
Lázrdawa' guca na ca xina' da bxuna na lu le̱'a ca nisa.
15 Bexaca xel-la' wal-la chia' ca tu xé'ena xu la'a,
na' luzra' bedá' na chichja'.
Nuzú' neda' lu xu xrte chee̱ xel-la' gute.
16 Zaj naxéchaje̱' neda' ca becu' ca'.
Zaj naxechaj benne' we̱n da zrinnaj ca' neda'.
Gulídue̱' ni'a na'a.
17 Waca gulaba' ca naca zrita xu'a,
na' benne' ca' dxelenné̱'e̱ neda', ne dxelenná' xánnie̱' neda'.
18 Belexelé̱'e̱ zra lana' late' weaj,
na' lawe' zra lana' gulebeje̱' da gaca bea na.
19 Quebe xebigu' naga zua', Xran.
Nacu' xel-la' wal-la chia'.
Gudázega gácale̱nu' neda', Xran.
20 Bselá bénne'du xu'a lu na' benne' gu'e̱ neda' xia.
Bénnea' guzría xi'e̱ neda' gune̱' ca dxun becu'.
21 Bselá neda' lu dxu'a be̱zre xixre'.
Bselá neda' lu luzu be̱zre wal-la ca'.
22 Guzenda' bi bícha'dau' ca' lau' Lue'.
Güe lá'anaqueza' Lue' ladaj benne' zaj nazrague̱' lau'.
23 Le'e, dxezrébele Xránadxu, le güe lá'ana Le̱'.
Le gucá'ana szrene̱', le'e, zri'ine zre sua Jacob.
Le zrebe Le̱', le'e, zri'ine zre sua Israel.
24 Quebe bzua Dios chalá'ala, ne quebe gucuídene̱'
da zi' da xa' da guledé benne' xache' ca',
ne quebe bcache lawe̱' lau benne' ca'
san gate bululáwizre̱' Le̱', benne̱' chi'e̱.
 
25 Güe lá'anaqueza' Lue' laduj benne' zan zaj nazrague̱' lau'.
Ca da guche̱be lazra' gúnqueza' lau benne' ca' dxelezrebe̱' Lue'.
26 Xelagu benne' dxexruj lazre', ne welélajquezne̱'.
Benne' ca' dxelebigue̱' lau Xránadxu xelúe lá'anaqueze̱' Le̱'.
Tu gácazqueze da ba neza chee̱ benne' ca'.
27 Cheajlesá lazre' benne' dute̱ xe̱zr la xu Xránadxu,
na' xelexebí'e̱ lau Le̱'.
Xúgute̱ cue' benne' chee̱ xúgute̱ cue' xe̱zr la xu
xelúe lá'anaqueze̱' Le̱',
28 lawe' da xu'u lu na' Xránadxu xel-la' dxenná bea,
na' nna bé'ene̱' xúgute̱ benne' xe̱zr la xu ca'.
29 Xeláguqueze xúgute̱ benne' zren ca' chee̱ xe̱zr la xu nigá,
ne xelúe lá'anaqueze̱' Dios.
Xuluzú zribe lau Le̱' xúgute̱ benne' ca' xelate,
benne' ca' quebe xelezéquene̱' xelegú'u chawe̱'
bénne'du zaj xu'e̱ chee̱ quebe xelatie̱'.
30 Zri'ine zre sua benne' ca' xelunbe' zrin chee̱ Xránadxu.
Xuluzenne̱' zrí'ine̱' ca' ca naca chee̱ Xránadxu
cadxa cheajse̱te̱ chee̱ bénneache.
31 Xelezrine̱', ne xuluzenne̱' bénneache ca naca
da xrlátaje da dxun Dios.
Xuluzenne̱' benne' quebe ne xelálaje̱' be̱n Dios da caní.