85
1 Be̱nu' da xrlátaje chee̱ bénneache chiu', Xrana' Dios.
Be̱nu' belexelá zri'ine zre sua Jacob,
benne' ca' gulu'e̱ lu na' benne' zitu' ca'.
2 Bnite lau' da zrinnaj da belún bénneache chiu'.
Bdeu' chalá'ala ca zaj naca dul-la chee̱ benne' ca'.
3 Bzua zriu' xel-la dxezrá'a chiu',
ne bsanu' xel-la' xichaj zra'a chiu'.
4 Be̱n xezúantu' lu da ba neza chee̱ xel-la' weselá chiu', Dios,
ne québedxa zra'u netu'.
5 ¿Tu chí'izqueze zra'u netu'?
¿Wazrá'aquezu' tu cuen tu cuen zri'ine zre suantu'?
6 ¿Québedxa gunu' xexaca bantu',
chee̱ súantu' lu da ba neza lau Lue'?
7 ¡Xran, bexache lazre' netu', ne bselá netu'!
8 Guzé̱ naga' da nne̱ Xrana' Dios.
Nne̱' da guzúa na bénneache chee̱'
lu xel-la' dxebeza zri lazre',
chee̱ québedxa xelún benne' lá'azxa chee̱' da xálaze.
9 Da líqueze Le̱' zúate̱queze̱' guselé̱' benne' ca' dxelezrebe̱' Le̱',
chee̱ sua da xabáa chee̱' lu xe̱zr la xu chee̱dxu.
10 Zaj nazraga xel-la dxexache lazre', ne da li chee̱ Dios.
Zaj naca tuze da xrlátaje, ne xel-la' dxebeza zri lazre'.
11 Da li chee̱' gusezrá na xe̱zr la xu nigá,
na' sel-le̱' da xrlátaje chee̱' da za xabáa.
12 Xránadxu gúnnaqueze̱' dxi'u da cháwedau',
na' gúnnale̱'e̱ xe̱zr la xu chee̱dxu.
13 Nu benne' naque̱' xrlátaje waca xezrine̱' lau Dios,
na' gune̱' gundxu ca da ba blé'ene̱' gundxu.