86
Bze̱ naga, Xran, ne bene chia',
lawe' da zua' lu da ba xa', ne dxexázrjeda'.
Bxue neda' lawe' da naca' chiu'.
Bselá neda', Dios chia', naca' we̱n zrin chiu',
ne dxuxrén lazra' Lue'.
Bexache lazre' neda', Xrana' Dios,
lawe' da dxuláwizra' Lue' te zra chizrela.
Be̱n béle̱'e̱da' neda', we̱n zrin chiu',
lawe' da dxuzúa cuina' lau Lue', Xran,
na' Lue', Xran, nacu' xrlátaje, ne dxunite lau' chee̱ntu'.
Zúate̱quezu' xexache lazru' benne' ca' dxululáwizre̱' Lue'.
Xrana' Dios, bene da dxuchálajle̱na' Lue',
ne bze̱ naga ca da dxenaba' lau'.
Lu zra sua' lu da sté̱bele̱'e̱ wanné̱queza' Lue',
lawe' da dxexeché̱bequezu' Lue' chia'.
Xran, quebe nu chilá' Dios ca Lue',
ne quebe nu dxun ca da dxunu' Lue'.
Xelelá' bénneache dute̱ xe̱zr la xu da be̱nu' Lue',
na' xelúe lá'anaqueze̱' Lue', Xran,
ne xulucá'ana szrene̱' Lau' Lue',
10 lawe' da nacu' Lue' szren, ne dxunu' da dxexebánentu'.
Tuzu' Lue' nacu' Dios.
11 Bse̱de neda' da dxaca lazru' guna', Xrana' Dios,
na' guna' ca naca da li chiu'.
Gunná be'e lázrdawa' chee̱ zreba' La cuinu'.
12 Dute̱ lázrdawa' güe lá'anaqueza' Lue', Xrana' Dios,
ne gucá'ana szrénqueza' Lau' chadía chacanna,
13 lawe' da zúate̱quezu' xexache lazru' neda',
ne bseláu' bénne'du xu'a lu lataj ba xa'.
14 Dios, belasa benne' dxulucá'ana szren cuine̱',
ne dxeledábague̱' neda',
na' benne' xichaj zra'a ca' belune̱' tuze dizra' xelútie̱' neda',
ne quebe dxelezrebe benne' ca' Lue'.
15 Lue', Xrana', nacu' Dios dxexache lazru' netu',
ne nacu' zren lazre',
ne quebe dxezrá'azeu', san zúate̱quezu' xexache lazru' netu',
ne nacu' li lazre'.
16 Gunná' ca naca chia', ne bexache lazre' neda'.
Be̱nna chia' neda', we̱n zrin chiu', xel-la' waca chiu',
na' bxue neda', zri'ine nu'ula we̱n zrin chiu'.
17 Ble'e neda' tu da gaca bea na gaca chawe' chia',
ne be̱n xelelé'e benne' ca' dxelecuídene̱' neda' da na',
ne be̱n xelexedué'ene̱',
lawe' da nacu' Lue', Xrana' Dios, Bénnea' gúcale̱ne̱' neda',
ne bexúe zrene̱' neda'.