Xtiidz Jesucrist ni bzaa
San MARCÜ
1
Ni rluu Juaṉ ni rchôbnihs meññ
(Mt. 3:1-12; Lc. 3:1-9, 15-17; Jn. 1:19-28)
1 Neꞌ rizlo diidz ni rnii de Jesucrist, Xiiñ Dioz.
2 Ba xtze bzaa profet-Isaíaz lo xguehtzy me ni gu Dioz leeme, no neu:
Naa cshaalaꞌ to dmeññaꞌ ni sunier loꞌy, tziyno me dtiidzaꞌ lo meññ;
leeme guistziaawy me ru tedyiꞌ scâsy ractziaawy to ñahz.
3 Rieññ gaquee to mpyquie riedz lo yu-bihdzy, ne:
“Lâ guistziaawy ru tedy Señor;
lâ cshal xguîlmbahñ laꞌd beeiy to ñaz-ndohp par dze-guiaad me.”
4 Were biahd Juaṉ lo yu-bihdzy, gachôbnihs me meññ no gaya me leeyâme csaan yâme ni nahcsy ni nac yâme lehdy csiaaḻladzy Dioz xguîlquie yâme no gyrôbnihs yâme.
5 No riahd xtahl meññ-nu lo ṟegióṉ ni le Judea ridguieññ ni rnii me, no zehg riahd xtahl meññ-nu Jerusaléṉ. No gadee yâme diidz guîlquie ni ptzoo yâme, no pchôbnihs Juaṉ leeyâme lo guiagü-Jordáṉ.
6 No nutz Juaṉ shab ni güyaa no xguihtz camell, no riuꞌ to cinturoṉ-guiedy leññ me; no rahgü me ncüshar no roo me dziñdoo ni nu guehsh.
7 No hor-gayuno me meññ diidz, ra me leeyâme:
―Nu sto ni guiaad lux de ni biaḻaꞌ ni ma beeiyu lee que naa, ni nehx rsahcaꞌ ni xduu xguidguial me nruñaꞌ nshacaꞌu.
8 Naa ni uli we ba pchôbnisaꞌ laꞌd no nzeꞌ; per leeme gdee me Spirt-Sant ni tzu leññ xguîlmbahñ laꞌd beeiy to guîlrrôbnihs.
Byrôbnihs Jesúz
(Mt. 3:13-17; Lc. 3:21-22)
9 No leññ dze-wé yahc bydzihñ Jesúz, byruu me Nasaret, to guiedzy ni nu lo ṟegióṉ ni le Galilea, no pchôbnihs Juaṉ leeme lo guiagü-Jordáṉ.
10 Lóni garuu me leññ nzeꞌ we naꞌ, bwieꞌ me gaxal gybaa no ziaht xiSpirt Dioz lguia me beeiy to palom.
11 No bieññ to riedz ni byruu gybaa, ne:
―Lii we dShiñaꞌ ni ndzin lee; modni rxilynon lii.
Gucladzy bêndzab ntzoo Jesúz ni ne me
(Mt. 4:1-11; Lc. 4:1-13)
12 Byluxu güiyno xiSpirt Dioz leeme lo yu-bihdzy.
13 Güyuꞌ Jesúz uga cuarent dzé, no ne bêndzab nwieꞌ bâḻ beeiy nquihly me Jesúz ntzoo mod-ra me lee. No uga güyuꞌ Jesúz lahd maguehsh ni nya, no gayacno x‑ángel yahc Dioz leeme.
Guzlo Jesúz xtziiñ me Galilea
(Mt. 4:12-17; Lc. 4:14-15)
14 Bylux bydahgü Juaṉ lidzyguiib we naꞌ, güya Jesúz lo ṟegioṉ-Galilea, bigyuno me meññ diidz de ni ctzoo Dioz mdad, no
15 ne me:
―Ba byzaꞌ dzé, no ba bydziñgahsh dze-ctzoo Dioz mdad neꞌ. Lâ csaan ni nahcsy ni nac laꞌd, no lâ gylíladzy xtiidz me.
Pquee Jesúz riedz tahp meññ-rnahzy mbaḻ
(Mt. 4:18-22; Lc. 5:1-11)
16 Gadedy Jesúz coo nisdoo ni le Galilea, no bwieꞌ me Simóṉ no behtzy me Ndréz, galee yâme gueshmbaḻ lo nzeꞌ; porni meññ-rnahzy mbaḻ leeyâme.
17 No ra Jesúz leeyâme:
―Lâ te náḻ laꞌd naa, no naa ctzon laꞌd meññ ni guidno zrieñ yahc ni gac dmeññaꞌ.
18 No psaꞌn gahc yâme xgueshmbaḻ yâme, no za yâme no leeme.
19 No güdedy Jesúz stoozy, bwieꞌ me Jacob no Juaṉ, gyrop behtzy xiiñ Zebedeu; nu yâme leññ barcü, gaquieedy yâme gueshmbaḻ.
20 Pquee gahc Jesúz riedz leeyâme; no psaꞌn yâme xtad yâme Zebedeu leññ barcü gydibyno meññ-gayacno leeyâme, no za yâme no Jesúz.
To mpyquie ni nu to mbenahcsy lee
(Lc. 4:31-37)
21 Bydzihñ yâme to guiedzy ni le Capernaum; no dze-risladzy meññ güyuꞌ Jesúz leññ idoo no guzlo galuu me meññ.
22 No rtzunadz yâme mod-rluu me, porni rluu me leeyâme beeiy to meññ-rtzoo mdad, no nehx rluu me beeiy rluu muextr ni ruuḻ yahc xleiy Moiséz.
23 No nu to mpyquie leññ ido-rieꞌ ni nu mbenahcsy lee, tohzy pquee me riedz,
24 ne me:
―¿Bia ryohbyiꞌ no noꞌ, Jesúz ni nac meññ-Nasaret? ¿Ziaadiꞌ lehdy gniꞌdyiꞌ noꞌ la? Naa nannaꞌ dxu lii. Lii we ni nac Mpyquie-tziaawy ni Pshahl Dioz Lee.
25 Per ptzoo Jesúz mdad mbenahcsy, ra me lee:
―¡Güyudzie, no byruu gahc de mpyquie-rieꞌ!
26 Mbenahcsy naꞌ, bzoobu mbeꞌ mpyquie-rieꞌ, no gaque-lahgü riedz, byruu gahcu de leeme.
27 Modni ptzunadz meññ-nu leññ idoo Jesúz, no gaya saꞌ yâme:
―¿Biahx‑e leeu nirieꞌ? ¿To nicoby‑e leeu ni rluu me la? ¡Xnahc‑e rtzoo me mdad xtâ mbenahcsy, no rzoob gahcu xtiidz me!
28 No ngueeḻy, byzaꞌzy lo ṟegioṉ-Galilea, bie meññ diidz ni rtzoo Jesúz.
Psiaḻ Jesúz suegyr Simoṉ-Pedr
(Mt. 8:14-15; Lc. 4:38-39)
29 Byluxz byruu yâme idoo, za Jesúz xiryuꞌ Simóṉ no Ndréz; za yâme no Jacob no Juaṉ.
30 Suegyr-ngünaa Simóṉ naꞌ nash me, xle leeme; no bieno gahc yâme diidz Jesúz de ni gayahc me.
31 Were gübigy Jesúz ru nash me, günahzy ña me, gucno leeme biahs me; no biaḻ gahc xixle me lo hor-wé, no bdee me ni güee Jesúz no xmeññ.
Psiaḻ Jesúz xtahl meññ-gayac-ure
(Mt. 8:16-17; Lc. 4:40-41)
32 Ru ba udziedoo, naabz güyaaz ncübidz, güiyno yâme gyre meññ ni gayac-ure no ni nu mbenahcsy lee ru zu Jesúz;
33 no gyre meññ-nu yahc leññ guiedzy-caḻ bydohp ruꞌ puert.
34 No psiaḻ Jesúz gyre gyzasy guîlguihdz ni gayahc meññ, no güloo me xtahl mbenahcsy meññ; no ba di ndee me ñahz nnii mbenahcsy yahc, porni nann yahcu dxu we leeme.
Gayuno Jesúz diidz meññ-nu lo ṟegioṉ-Galilea
(Lc. 4:42-44)
35 Nchuulr, lé ncawy ziaꞌ, biahs Jesúz byruu me güya me ru ndruhty nehx nu, bignab me lo Dioz.
36 No Simóṉ no zrieñ meññ-nuno me lee, zigyo yâme leeme.
37 No ru bydzial yâme leeme, ra yâme leeme:
―Gyre meññ gayo lii.
38 Ra Jesúz leeyâme:
―Tzo nó zrieñ ru gahsh de neꞌ, lehdy gunon meññ-nu uga xtiidz Dioz; porni por leeu we biaḻaꞌ.
39 No ze güya me gydo lo ṟegioṉ-Galilea, gayuno me meññ xtiidz Dioz leññ xiydoo yâme, no gaboo me mbenahcsy yahc ni nu meññ.
Psiaḻ Jesúz to mpyquie-gayudz gydo lady
(Mt. 8:1-4; Lc. 5:12-16)
40 To mpyquie-gayudz gydo lady gübigy me Jesúz no bisshiby me lo, no ra me lee:
―Bâḻ racladzyiꞌ la, beeiy csiaḻiꞌ naa.
41 Bioob Jesúz leeme, no pshob ña chehsh me, no ra leeme:
―Naa racdadzyaꞌ csiaḻaꞌ lii. ¡Ba biaḻiꞌ we!
42 No biaḻ gahc lady mpyquie-rieꞌ, no biaꞌn me nyar de xguîlguihdz me.
43 Were gu Jesúz leeme tza me, no ra xnahc ctzoo me,
44 ne:
―Na di guyu lo ndruhty; mazyg güya lo bahl lehdy güieꞌ me ba biaḻiꞌ, no güiyno gun ni gu Moiséz meññ, lehdy gann yâme ba biaḻiꞌ de xguîlguihdziꞌ.
45 Per mpyquie-rieꞌ naꞌ, byruhzy me guzlo gahc gayuno me meññ diidz bia mód biaḻ me. No por leeu, ba di raḻ tzu Jesúz ru neññ leññ zrieñ guiedzy, pur ruꞌ guiedzy riaꞌn me ru nehx ma nu meññ; per gyre lad rruu meññ rdohp ru nu me.