2
Psiaḻ Jesúz to meññ-di raḻ gyniꞌby
(Mt. 9:1-8; Lc. 5:17-26)
1 Güdahpu stoozy dzé gubyguiat Jesúz guiedzy-Capernaum; no bieññ meññ ba nu me ruꞌ yuꞌ.
2 Bydohp xtahl meññ ru nu me, ba ni ruꞌ puert nehx nu ru beeiy ndedy meññ; no gayuno me xtiidz Dioz meññ.
3 Tohzy bydzihñ tahp meññ, zidno yâme to mpyquie-gayac-ure ni di raḻ gyniꞌby mbehty, nash me to lo camill.
4 No gumm di raḻ gydzihñ yâme lo Jesúz porni bydzeꞌ meññu la, were pshal yâme ihqy yuꞌ xderech ru zu Jesúz, lehdy güdahpu to ru gülety yâme mpyquie-rieꞌ ni gayac-ure ni nash lo camill.
5 Hor-bwieꞌ Jesúz ulihbu rlíladzy yâme, ra me mpyquie-gayac-ure:
―Shiꞌñ, xguîlquiey ba psiaaḻdadzyaꞌ gyreu we.
6 Dxie chohp tzonn muextr uga ni ruuḻ yahc xleiy Moiséz, ganii leññ ihqy yâme:
7 “¿Biahx‑e nacu rnii me ze? Rnii me didz-nahcsy contr Dioz, porni nunzy Dioz‑e beeiy rsiaaḻladzy xguîlquie meññ.”
8 Per Jesúz naꞌ, nann me bia ganii leññ ihqy meññ-rieꞌ yahc. Were ra me:
―¿Bia nacu rnii leññ ihqy laꞌd ze?
9 ¿Bia leeu ma nehx ngann, ñapyaꞌ mpyquie-rieꞌ ni di raḻ gyniꞌby: “Gyre xguîlquiey ba psiaaḻdadzyaꞌ”, o ñapyaꞌ leeme: “Biahsiꞌ, gülesy xcamilliꞌ no güzeꞌ”?
10 Naa, Mpyquie-Pshahl Dioz Lee, glun laꞌd beeiy rsiaaḻdadzyaꞌ xguîlquie meññ.
Were ra me mpyquie-di raḻ gyniꞌby:
11 ―Gapyaꞌ lii: Biahsiꞌ, gülesy xcamilliꞌ, no gübiꞌ xiryuꞌy.
12 No biahs gahc me, no gülesy me xcamill me, no byruu me zia me, gawieꞌ gyre meññ. No gatzunadz yâme no gaguguia yâme Dioz no gaya saꞌ yâme:
―Nito dgueññ güieꞌ nó zâ nirieꞌ.
Pquee Jesúz riedz Leví
(Mt. 9:9-13; Lc. 5:27-32)
13 Luxu gyzac güya Jesúz coo nisdoo; no gadohp xtahl meññ leeme no galuu me lee.
14 No lóni gadedy me naꞌ, bwieꞌ me Leví xiiñ Alfeu, dxie gacuquix mpuezd meññ. Were ra Jesúz leeme:
―Güde, náḻiꞌ naa.
No biahs gahc Leví, za me no Jesúz.
15 No ru gayahgü Jesúz li Leví, dxie xtahl meññ-rcuquix mpuezd, no zegahc dxie zrieñ meññ-rtzoo gyrehzy guîlquie tohzy ruꞌ miax no Jesúz no xmeññ me; porni nu xtahl meññ ni za no leeme.
16 No muextr ni ruuḻ yahc xleiy Moiséz no meññ-nac yahc fariseu, ru bwieꞌ yâme gayahgü Jesúz no meññ-caḻ yahc, ra yâme xmeññ me:
―¿Bia nacu rahgü xmuextr laꞌd tohzy no meññ-rcuquix mpuezd no zrieñ meññ-rtzoo gyrehzy guîlquie?
17 Hor-bieññ Jesúz nirieꞌ, ra me leeyâme:
―Meññ-nzaꞌg nehx rquihñ tza lo doctor, mazyg meññ-gayac-ure, wé we rquihñ tza lo me. Naa nehx biaḻaꞌ zidyobyaꞌ meññ-tziaawy, mazyg meññ-guîlquie we zidyobyaꞌ leeyahc.
Günabdiidz yâme Jesúz lguia ayun
(Mt. 9:14-17; Lc. 5:33-39)
18 To dzé, xmeññ Juaṉ ni rchôbnihs gatzoo yâme ayun no zegahcu xmeññ meññ-nac yahc fariseu; no biahd lahd meññ, günabdiidz yâme Jesúz, ra yâme leeme:
―¿Bia nacu xmeññ Juaṉ no xmeññ meññ-nac yahc fariseu rtzoo yâme ayun, no xmeññiꞌ yac?
19 Ra Jesúz leeyâme:
―Ru nu meññ lo guîltziahl, ¿nehxni beeiy ntzoo yâme ayun no nu ziaꞌr ñoby-gayidzña lahd yâme? Incs nu ziaꞌ me lahd yâme, nehx beeiy nsaꞌn de ni gayoo gayahgü yâme.
20 Per ziaad dzé ru naa ni zidguiahc beeiy to ñoby-guidzña, ba dgueññaꞌ lahd yâme, were ctzoo yâme ayun no nehx zoo zahgü yâme.
21 ’Ndruhty nehx nquieedy diby laꞌy lar-coby to lo lar-gush; porni bâḻ leeu ñahcu ze la, lar-coby nguiixu lar-gush, no ba ma ñacxroꞌ ru nyuhx.
22 No ndruhty nehx rguꞌ vin ni leer güyaa leññ to bush-guiedy ni ba nigush; porni bâḻ leeu ñahcu ze la, nchiahzu bush-guiedy ni ba nigush, no nnitylou vin no zegahcu bush. Leewe vin ni leer güyaa rahpu de ni tzuw leññ bush-guiedy ni ncoby.
Gachuꞌ xmeññ Jesúz do dze-risladzy meññ
(Mt. 12:1-8; Lc. 6:1-5)
23 To dze-risladzy meññ, güdedy Jesúz leññ to lyu ru dziib trigü, no xmeññ me naꞌ, lóni gadedy yâme guzlo gachuꞌ yâme xdo trigü.
24 Were ra meññ-nac yahc fariseu Jesúz:
―¿Bia nacu gatzoo xmeññiꞌ dziiñ ni nehx xñahzû gac dze-risladzy meññ?
25 Were ra Jesúz leeyâme:
―¿Dgueññ guuḻ laꞌd ni ptzoo Davit tzcaḻ la, dze-biaadz me ni nquihñ me no bylahn me no gahc meññ-zidno me?
26 Güyuꞌ me leññ xiydoo Dioz dze-nac Abiatar xjefy gyre xbahl meññ-Isṟael, no güdahgü me paṉ ni guhc gun par Dioz, ni ne xleiy Moiséz nehx beeiy rahgü nyugz meññ lee, mazyg nunzy bahl; no bdee meu güdahgü meññ-zidno me zegahc.
27 No zegahc ra Jesúz leeyâme:
―Dze-risladzy meññ biaꞌnu we lehdy gacnou meññ, no dac‑e meññ biaꞌn lehdy gzacbeeiy meññ leeu.
28 Leewe naa, Mpyquie-Pshahl Dioz Lee, rtzon mdad zegahc bia beeiy gac dze-risladzy meññ.