10
Bluu Jesúz meññ lguia ni rtzily meññ guîltziahl
(Mt. 19:1-12; Lc. 16:18)
1 Byluxu byruu Jesúz uga, za me lo ṟegioṉ-Judea no zegahc za me stiby chehsh guiagü-Jordáṉ. No gyzac bydohp xtahl meññ leeme, no guzlo galuu me leeyâme mod-rtzoo gahc me.
2 No gübigy lahd meññ-nac yahc fariseu leeme, lehdy nsiahb yâme leeme no to ni ngann. Günabdiidz yâme leeme bâḻ beeiy ntzily to mpyquie guîltziahl no tziahl.
3 Ra Jesúz leeyâme:
―¿Bia ra Moiséz ctzoo laꞌd?
4 Ra yâme Jesúz:
―Bdee Moiséz ñahz gzaa to mpyquie ni ba bidzña to guehtzy ni gynii ba ptzily me guîltziahl, no gdee meu tziahl me, no luxu csaꞌn me lee.
5 Were ra Jesúz leeyâme:
―Porni nahdy xguîlmbahñ laꞌd, leewe bzaa Moisézu ze ctzoo laꞌd.
6 Per glo dze-guzlo güyaa guiedzylie, “Dioz bzaa me mpyquie no bzaa me ngünaa”.
7 “Leewe rruu to mpyquie coo xtad no coo xmam, no tzu me no tziahl me,
8 no ba gyrop yâme beeiy gahc tohzy meññ.” No leewe, ba dac‑e chohp meññ leeyâme, mazyg ba beeiy gahc tohzy meññ‑e leeyâme.
9 No leewe, ni ba ptzoo Dioz lee tohzy, di ctzily ndruhty leeu.
10 Ru ba güyuꞌ yâme leññ yuꞌ, günabdiidz xmeññ me leeme lguia nirieꞌ gyzac.
11 Ra Jesúz leeyâme:
―Nitisy dxu ctzily guîltziahl no tziahl, no guidzña me no sto ngünaa la, gatzoo me guîlquie chehsh ngünaa ni bidzña me nier lee.
12 No bâḻ to ngünaa ctzily me guîltziahl no tziahl me no guidzña me no sto mpyquie la, guîlquie gahc‑e zahcu par leeme.
Güluꞌ Jesúz laꞌy mbiux
(Mt. 19:13-15; Lc. 18:15-17)
13 Güiyno meññ mbiux yahc lo Jesúz lehdy cu me laꞌy lee. Per xmeññ me ndush yâme lo meññ-zidno mbiux.
14 Hor-bwieꞌ Jesúz ni gatzoo xmeññ me, bydziaꞌdzy me, no ra me lee:
―Lâ gdee ñahz guiaad mbiux ni zidyo naa, no di yca laꞌd leeyâme; porni dxu gac scâsy mbiux-rieꞌ yahc la, par leeyâme we ru rtzoo Dioz mdad.
15 Gapyaꞌ laꞌd ni uli, dxu di gap to guîlmbañ-nguhdzy scâsy xguîlmbahñ mbiux la, nehx beeiy tzu ru rtzoo Dioz mdad.
16 Luxu, güdiehdzy me mbiux-rieꞌ yahc, no pshob ña me chehsh, güluꞌ me laꞌy lee.
To ñobyxtoby-ṟicü günabdiidz me Jesúz
(Mt. 19:16-30; Lc. 18:18-30)
17 Lóni garuu Jesúz no ba za me gyzac, tohzy bydziñ-güxuunn to mpyquie, bisshiby lo me no günabdiidz, ra leeme:
―Muextr, naa nannaꞌ meññ-tziaawy lii. ¿Bia mód ntzon lehdy ñapaꞌ guîlmbahñ ni nehx zluhx?
18 Ra Jesúz leeme:
―¿Bia nacu rahbyiꞌ naa meññ-tziaawy? Ndruhty nehx meññ-tziaawy lee, mazyg nunzy Dioz.
19 Lii nanniꞌ ni rtzoo Dioz mdad ctzoo meññ: “Di senoy tziahl meññ. Di igaꞌdyiꞌ meññ. Di cuaniꞌ. Di gyniiy ni nehx uli de meññ. Di guisquieey. Bzacbeeiy xtadiꞌ no xmamiꞌ.”
20 Ra mpyquie-rieꞌ leeme:
―Muextr, gyre nirieꞌ gatzon mod-ne glo nwiñaꞌ.
21 Byluxu bwiedzie Jesúz leeme no guîlndzi, no ra leeme:
―Nu to ni riaadziꞌ: güya, ptoꞌ gyre ni rahpiꞌ, no bdee xmedyu ycaꞌ meññ-nehx rahp mbehty, were zahpiꞌ xtahl ni rsahc gybaa; luxu guiaadiꞌ, gbooladzyiꞌ xtâ xguîlmbahñiꞌ, no tzaꞌy no naa.
22 Mpyquie-rieꞌ naꞌ, modni bzacno me hor-bieññ me nirieꞌ, no güyuꞌ me trixd za me, porni rahp me xtahl ni rsahc.
23 No byluxu bwieꞌ Jesúz meññ-zu guingybi me, no ra me xmeññ me:
―¡Modni ngann zahcu no meññ ni rahp xtahl ni rsahc, ndee yâme ñahz ntzoo Dioz mdad leeyâme!
24 No ptzunadz xmeññ me no nirieꞌ ni günii me; per gyzac ra Jesúz leeyâme:
―Shiꞌñ, ¡ngannu we par meññ ni riehtz lo guîlṟicü, ndee yâme ñahz ntzoo Dioz mdad leeyâme!
25 Ma nehx ngann‑e ndedy to camell xguiehr igux que to meññ-ṟicü ndee me ñahz ntzoo Dioz mdad leeme.
26 Ru bieññ yâme nirieꞌ we naꞌ, ba ma gatzunadz yâme, no ra saꞌ yâme:
―¿Dxu we naꞌ beeiy gylaa par tzu lo xñahz Dioz?
27 Bwiedzie Jesúz leeyâme, no ra leeyâme:
―Nehx ñaḻ ntzoo meññ nirieꞌ, per no Dioz beeiyu; porni no leeme gyreu we beeiy.
28 Guzlo Pedr gaya me Jesúz:
―Per noꞌ ba psaꞌn noꞌ gyre ni güdahp noꞌ, no zo noꞌ ru zaꞌy.
29 Ra Jesúz leeyâme:
―Gapyaꞌ laꞌd ni uli, nitisy dxu psaꞌn xiryuꞌ, behtzy o baḻ, byzan, xtad, xmam, tziahl, xiiñ, o xilyu por naa no por dtiidzaꞌ la,
30 Dioz zdee leeme diby gayuu vuelt ma xtahl ni naꞌ lo tiemp-rieꞌ: xiryuꞌ, behtzy o baḻ, byzan, xmam, xiiñ, xilyu, nîcze ctzoo csahc meññ leeme zegahc; no dzé ni ziaad, Dioz zdee leeme guîlmbahñ ni nehx zluhx.
31 Per xtahl meññ ni ma rsahc lahd meññ neꞌ la, zdzihñ dze-ma uxiee qysahc yâme; no xtahl meññ ni ma uxiee rsahc lahd meññ neꞌ, wé we ma qysahc.
Gyzac günii Jesúz de ni gaty me
(Mt. 20:17-19; Lc. 18:31-34)
32 Za yâme Jerusaléṉ, no zunier Jesúz lo xmeññ me. No xmeññ me naꞌ, gatzunadz yâme, no zrieñ meññ-náḻ leeyâme gadzie. No gyzac güloo Jesúz gydiby tzipychop xmeññ me diby lad, no guzlo gaya me leeyâme gyre ni tedy me.
33 Ra me leeyâme:
―Sca-ze gawieꞌ laꞌd, zo nó Jerusaléṉ, no uga zdee dxuhch naa, Mpyquie-Pshahl Dioz Lee, lo ña xjefy yahc bahl no lo ña muextr ni ruuḻ yahc xleiy Moiséz. No znii yâme rapaꞌ de ni gatyaꞌ, no zdee yâme naa meññ-nehx meññ-Isṟael.
34 No stzuburl yâme naa, no sshîbyshieñ yâme naa, no zguihñ yâme naa, no zgaꞌdy yâme naa; per lo tzonn dzé zbahñaꞌ.
Ni günab Jacob no Juaṉ
(Mt. 20:20-28)
35 Luxu gübigy Jacob no Juaṉ, xiiñ Zebedeu, lo Jesúz, no ra yâme leeme:
―Muextr, racdadzy noꞌ ntzooy ni nnab noꞌ lii.
36 Ra Jesúz leeyâme:
―¿Bia racladzy laꞌd ntzon por laꞌd?
37 Ra yâme leeme:
―Dze-ba rtzooy mdad no xguîlbyniꞌy, ndeedyiꞌ ñahz mbia noꞌ to gá lad cooy, to noꞌ mbia xlad-drechiꞌ no sto noꞌ mbia xlad-ṟeveziꞌ.
38 Ra Jesúz leeyâme:
―Nehx nann laꞌd bia rnab laꞌd. ¿Beeiyz ndedy laꞌd ni nadz ni dzictedyaꞌ, ni gac beeiy behch ni nlá ni goon lee la? ¿No beeiyz ndedy laꞌd ni ma nadz ni dzictedyaꞌ, ni gac beeiy ni gachôbnihs meññ naa per pur no guîlné la?
39 Ra yâme leeme:
―Beeiyu noꞌ.
Ra Jesúz leeyâme:
―Ni dzictedyaꞌ no gzacnon lee, ni uli zegahc dzictedy laꞌdu; no ni ma nadz ni dzictedyaꞌ, zegahc dzictedy laꞌdu;
40 per dxu cuia dcoon lad-drech o lad-ṟevez la, dac‑e naa ndedy leeu; mazyg dxu ne Dioz ba nacu xchieñ, wé we ycaꞌ leeu.
41 Ru bieññ gydiby stzii xmeññ me nirieꞌ, bydziadzyno yâme Jacob no Juaṉ.
42 Per pquee Jesúz riedz leeyâme, no ra leeyâme:
―Nann laꞌd xnahc nac meññ-guxtisy ni rahc cuent rtzoo mdad xmeññ lo guiedzylie-rieꞌ; rtzoo yâme no xmeññ yâme gyre mod-ne yâme. No zrieñ xmeññ yâme ni rsahc la, ni rnii yâme, wé rahc.
43 Per no laꞌd dac‑e ze gacu, mazyg nitisy dxu de lahd laꞌd gacladzy qysahc, rahp de ni gac scâsy xmós laꞌd;
44 no nitisy dxu lahd laꞌd gacladzy ma qysahc que zrieñ la, rahp de ni gac scâsy to mós ni byzee par ctzoo xtziiñ gyre zrieñ meññ.
45 Porni xtâ naa, Mpyquie-Pshahl Dioz Lee, nehx biaḻaꞌ lo guiedzylie-rieꞌ lehdy gacno meññ naa, mazyg biaḻaꞌ lehdy gacnon leeyâme, no gdedyaꞌ dguîlmbahñaꞌ, gatyaꞌ lehdy quixaꞌ gylaa xtahl meññ de lo guîlnadz ni ziaad.
Psiaḻ Jesúz to mpyquie ni le Bartimeu ni ngaḻ
(Mt. 20:29-34; Lc. 18:35-43)
46 Bydzihñ yâme ciuda ni le Jericó. No lóni garuu Jesúz Jericó no xmeññ me no zrieñ meññ yahc naꞌ, to meññ-ngaḻ le Bartimeu, xiiñ Timeu, dxie me coo ñahz, rnab me gun.
47 Hor-bieññ me gadedy Jesúz ni nac meññ-Nasaret, guzlo gaquee me riedz, ne me:
―¡Jesúz, lii ni ziaad de lo xfamily ṟeiy-Davit, bioob naa!
48 Xtahl yâme byduhsh lo me lehdy tzudzie me, per leeme naꞌ, ma rahc me rquee me riedz, ne me:
―¡Lii ni ziaad de lo xfamily ṟeiy-Davit, bioob naa!
49 Were güliahz Jesúz, no ra me:
―Lâ ga leeme guiaad me.
Were pquee yâme riedz ngaḻ, no ra yâme leeme:
―Di gyruganiꞌ. Guzli, Jesúz gaquee riedz lii.
50 No güloo gahc ngaḻ lar-xoob chehsh, no biahs me lé cüchahs me, no za me ru zu Jesúz.
51 No ra Jesúz leeme:
―¿Bia racladzyiꞌ ctzon por lii?
Ra ngaḻ leeme:
―Muextr, racdadzyaꞌ güien gyzac.
52 Ra Jesúz leeme:
―Ba beeiy tzaꞌy; bylíladzyiꞌ naa, leewe ba biaḻiꞌ.
Lohg hor-caḻ byxal lo me bwieꞌ gahc me, no za me náḻ me ru za Jesúz.