11
Bydzihñ Jesúz Jerusaléṉ
(Mt. 21:1-11; Lc. 19:28-40; Jn. 12:12-19)
1 Hor-ba gadzihñ yâme gahsh Jerusaléṉ, gadedy yâme schohp guiedzy ni le Betfagé no Betania, coo to dahñ ni le Oliv, ugaty ba pshahl Jesúz chohp de lo tzipychop xmeññ me.
2 Ra me lee:
―Lâ tza guiedzy-yaañ ni dxie ru tedy ziaꞌr nó, no hor-gydzihñ laꞌd, güieꞌ laꞌd nliiby to burr-yaañ yahg, ni ndruhty ziaꞌ dgueññ cuib lee. Lâ cshac leemaꞌ no lâ guidno leemaꞌ.
3 Bâḻ dxuhch ga laꞌd: “¿Bia nacu gatzoo laꞌd ze?”, lâ ga leeme: “Señor‑e gaquihñ leemaꞌ, no luxu guidzguiat gahc me leemaꞌ sto.”
4 Were za yâme, no bydzial yâme burr, nliiby maꞌ gahsh ruꞌ to puert lo ñahz, no uga pshac yâme leemaꞌ.
5 No lahd meññ-zu uga günabdiidz leeyâme, ra yâme:
―¿Biaz‑e gatzoo laꞌd? ¿Bia nacu gashac laꞌd burr-rieꞌ?
6 Ra yâme meññ-rieꞌ yahc mod-ra Jesúz leeyâme; no bdee meññ-rieꞌ ñahz tziyno xmeññ Jesúz burr.
7 No güiyno yâme leemaꞌ ru ziaad Jesúz, no pshob shab yâme chehsh maꞌ, no güdzib Jesúz leemaꞌ.
8 No xtahl meññ gatzihly shab yâme lo ñahz ru tedy Jesúz, no zrieñ yâme gaguihsh ṟam-yaañ ni rahp guix ni pchuꞌ yâme lo camp.
9 No meññ ni zunier, no zegahcu meññ ni náḻ yahc traz, rquee yâme riedz, ne yâme:
―¡Tzuguia Dioz! ¡Nu laꞌy mpyquie ni ziaad porni Dioz pshahl leeme!
10 ¡Nu laꞌy mod-dziguiahc mdad, mod-ptzoo ngydo-dadgul-Davit mdad nó! ¡Tzuguia Dioz ni nu gybaa!
11 Bydzihñ Jesúz Jerusaléṉ, no güya me idoró. Ru bwieꞌ me gyre ni nu leññu, no gumm ba udziedoo la, za gahc me guiedzy-Betania no gydiby tzipychop xmeññ me.
Güluꞌ Jesúz dia to yag-duug ni nehx queꞌ lo
(Mt. 21:18-19)
12 Ni byre guiaal, ru byruu yâme guiedzy-Betania, ba galahn Jesúz.
13 Bwieꞌ me xtâ ziht zu to yag-duug ni dziib guix lo, no güya me bigüieꞌ me duhn queꞌ lou. Hor-bydzihñ me nehx bydzial me duug lou, xguie guix dziib lou, porni nehx xtiémpu ni nqueꞌu.
14 Were ra Jesúz yagdug-rieꞌ:
―¡Ba nehx ziuꞌr dze-gahgü ndruhty xduuguiꞌ!
No bieññ xmeññ me günii me ze.
Güloo Jesúz meññ-gatoꞌ yahc ruꞌ idoró
(Mt. 21:12-17; Lc. 19:45-48; Jn. 2:13-22)
15 Hor-ba bydzihñ yâme Jerusaléṉ, güyuꞌ Jesúz leññ idoró, no guzlo güloo me meññ ni gatoꞌ no meññ ni gazii. No ptixguiat me xmiax meññ-rtzee xmedy meññ, no xbangü meññ ni rtoꞌ ximbue;
16 no ndruhty nehx bdee me ñahz lee tedy no behch ru rtzoo idoró mdad.
17 No rluu me meññ, no ra me lee:
―¿Nehx ziaad lo Guehtzy ru queꞌ xtiidz Dioz la, ru ne me: “Diryuꞌn, par gynino meññ naa we gacu, ni guiaad yahc de gyre guiedzy”? Mazyg laꞌd gatzoo laꞌdu beeiy to ru riungaꞌdzy meññ-gübaan.
18 No nirieꞌ bieññ xjefy yahc bahl no gahc muextr ni ruuḻ yahc xleiy Moiséz, no guzlo gayo yâme xnahc igaꞌdy yâme leeme; rdzie yâme leeme, porni gyre meññ rtzunadz de ni rluu me meññ.
19 No ru ba udziedoo, byruu me leññ guiedzy no xmeññ me.
Ba gübihdzy yag-duug ni nehx queꞌ lo
(Mt. 21:20-22)
20 Ni byre guiaal rsily, güdedy yâme no bwieꞌ yâme gübihdzy yag-duug xtâ leññ yu.
21 Were bitsêlou Pedr ni günii Jesúz, no ra me lee:
―Muextr, bwieꞌ güieꞌzyiꞌ yag-duug ni güluꞌy dia lee, ba gübihdzyu.
22 Ra Jesúz leeyâme:
―Lâ gylíladzy Dioz.
23 Gapyaꞌ laꞌd ni uli, bâḻ dxuhch ña dañ-rieꞌ: “Byruu de wé no biahb lo nisdoo”, no di rqueꞌladzy me mbehty leññ xguîlmbahñ me, mazyg gylíladzy me gac ni ne me, ni rnii me gacu we.
24 No leezuwe gapyaꞌ laꞌd, gyre ni gnab laꞌd hor-ganino laꞌd Dioz la, lâ gylíladzy laꞌd ba cuaꞌ laꞌdu, no zdee Diozu laꞌd.
25 No hor-ganab laꞌd lo Dioz, lâ csiaaḻladzy laꞌd guîlquie ni ptzoo zrieñ meññ no laꞌd, lehdy zegahc Dioz, ni nac xTad laꞌd lee ni nu gybaa, csiaaḻladzy me xguîlquie laꞌd.
26 Per bâḻ di rsiaaḻladzy laꞌd guîlquie ni ptzoo meññ no laꞌd la, zegahc‑e xTad laꞌd ni nu gybaa nehx ssiaaḻladzy me guîlquie ni nzahby laꞌd.
Günabdiidz yâme dxu nac Jesúz
(Mt. 21:23-27; Lc. 20:1-8)
27 Byluxu gubyguiat yâme Jerusaléṉ gyzac. No lóni gadedy Jesúz ruꞌ idoró naꞌ, biahd xjefy yahc bahl, no muextr ni ruuḻ yahc xleiy Moiséz, no zrieñ mînguhl yahc ni nac guxtisy.
28 Ra yâme leeme:
―¿Dxu naquiꞌ par ctzooy gyre nirieꞌ? ¿No dxu guhdzy lii ctzooyu?
29 Ra Jesúz leeyâme:
―Zegahc rapaꞌ to ni gnabdiidzaꞌ laꞌd. No bâḻ ga laꞌd naa la, gapyaꞌ laꞌd dxu nacaꞌ par ctzon gyre nirieꞌ.
30 ¿Dxu pshahl Juaṉ lehdy bidchôbnihs me meññ? ¿Dioz ni nu gybaa la, o cuentz meññ? Naꞌz laꞌd, ¿bia ne laꞌd?
31 Were ra saꞌ yâme:
―¿Biaz‑e naꞌ ga nó leeme? Bâḻ nó ga nó Dioz pshahl Juaṉ, za me nó: “¿Biaz nacu naꞌ di nlíladzy laꞌd leeme?”
32 ¿O nehxni ña nó cuentz meññ‑e pshahl leeme?
Per bydzie yâme meññ-guiedzy, porni gyre yâme rlíladzy Juaṉ ulihbu profet‑e leeme ni günii ni gu Dioz lee.
33 No leewe, ra yâme Jesúz:
―Nehx nann noꞌ.
Were ra Jesúz leeyâme:
―Zegahc naa nehx zapyaꞌ laꞌd dxu nacaꞌ par ctzon gyre nirieꞌ.