10
Ángel ni caꞌ to libr-yaañ
1 Bwien ziaht sto ángel gybaa ni beeiyu lee, no nu me leññ to zá, no queꞌ to guiht lo mbeꞌ ihqy me. No rdalgue lo me beeiy lo ncübidz, no nieꞌ me rluuw beeiy chohp pilary de gue.
2 No lo ña me caꞌ me to libr-yaañ ni nxal lo; no bzu me nie-drech me lo nisdoo, no nie-ṟevez me lo yudahñ.
3 No pquee me riedz ndip, beeiy rquee leóṉ riedz; no hor-pquee me riedz, bieññ gahc günii gahdzy ngüziee.
4 Bylux günii gahdzy ngüziee, gucdadzyaꞌ nzan ni bieññaꞌ; per bieññaꞌ to riedz-byruu gybaa ni ra naa:
―Ngaꞌdzy güdahp gyre ni günii gahdzy ngüziee, no di gzaay leeu lo guehtzy.
5 Luxu ángel ni bwien zu to nieꞌ lo nisdoo no sto nieꞌ lo yudahñ, gülesy ña-drech me gybaa,
6 no günii me ni uli por le Dioz ni mbahñ no nehx ziuꞌ dzé gaty, ni bzaa gybaa, guiedzylie, nisdoo no gyre ni nu, no ne ángel:
―Ba nehx nu de ni gyleeru.
7 Hor-ba rzaꞌu gahdzy ángel sulo yquee trompet, were ba byzaꞌ dzé gydibylgaa ni nungaꞌdzy, mod-gu Dioz xmeññ me ni nac profet yahc.
8 Riedz ni bieññaꞌ byruu gybaa, gyzac güninou naa, neu:
―Güya biycaꞌ libr-yaañ ni nxal lo de lo ña ángel ni zu to nieꞌ lo nisdoo no sto nieꞌ lo yudahñ.
9 Were güyan ru zu ángel, no ren leeme gdee me naa libr-yaañ.
No ra me naa:
―Cuaꞌ leeu no güdahgu. Stzunahshu leññ ruꞌy beeiy dziñ, per stzunláu leññiꞌ.
10 Were cuan libr-yaañ ni caꞌ ángel, no güdahguaꞌ leeu; no ptzunahshu leññ drun, per bylux de ni güdahguaꞌu, ptzunláu dleññaꞌ.
11 Were ra me naa:
―Rquihñu gunoy meññ gyzac ni ne Dioz gac lguia meññ-nu xtahl guiedzy, no nacióṉ, no de lo xtahl clasy xtiidz meññ, no xtahl ṟeiy.