11
Gyrop profet
1 No bdee dxuhch naa to var par yqueen mdid, no ra Dioz naa:
―Güya biyquee mdid diydorón, no ltar, no bgab bla meññ rzacbeeiy naa uga.
2 Per di yqueey mdid lad-stziuꞌ de idoró, porni uga nu meññ ni nehx rzacbeeiy naa, no leeu ba nu lo ña yâme, no ctzoo csahc yâme dciudaꞌn leññ cuarentaydoz mboo.
3 Naa sshaalaꞌ gyrop profet ni rapaꞌ, tza yâme no gutz yâme lar-yaꞌz, no guno yâme meññ dtiidzaꞌ leññ diymily chohp gayuu sesent dzé.
4 Gyrop profet-rieꞌ zidguiahc yâme beeiy gyrop yahg ni le oliv no gyrop candeler ni zu yahc lo Dioz ni rtzoo mdad guiedzylie.
5 Dxu racladzy ctzuné leeyâme, squee yâme gue lee no gue ni gboo yâme ruꞌ yâme, no modé zgaꞌdy yâme gyre meññ-gacladzy ctzuné leeyâme.
6 Gyrop profet-rieꞌ beeiyu leeyâme ctahgü yâme leññ gybaa par di gac guio leññ tiémp ni gayuno yâme meññ dtiidzaꞌ. No beeiyu leeyâme ctzoo yâme nzeꞌ rieñ, no ctzuné yâme meññ no gyre lo clasy guîlzi mod-gacladzy yâme.
7 Dze-ba bylux bieno yâme dtiidzaꞌ meññ, were ba guiaad to ma-nahcsy ni gyruu leññ guieryu-ro ni modni guiat, wé teḻyno leeyâme no stzoo gan igaꞌdy gyrop yâme.
8 No leññ ciuda-ro ru guhty x‑Señor yâme lo cruzy, wé gaa xcuerp yâme lo call; ciuda-wé leu zidguiahc beeiy Sodom no Egipt.
9 No meññ-gyre guiedzy, no de lo gyre ṟaz meññ no lo gyre clasy xtiidz meññ, no meññ-gyre nacióṉ, zwieꞌ yâme xcuerp gyrop profet leññ tzonn dzé no diby ribygue, no ndruhty nehx zdee ñahz igaꞌdzy xcuerp yâme.
10 Gyre meññ ni nu lo guiedzylie sshihly yâme hor-ba guhty gyrop profet. Ziscady saꞌ yâme gyrehzy de guîlrxihly; porni ba guhty gyrop profet ni zidguiahc beeiy to guîlné par leeyâme.
11 Per lóni rzaꞌu tzonn dzé garuḻ, bispahñ Dioz leeyâme sto, no biahs yâme. No gyre meññ ni bwieꞌ gübahñ yâme, modni bydzie.
12 Luxu gyrop profet-wé bieññ yâme to riedz gybaa ndip, ganii ne:
―¡Lâ yqueꞌ neꞌ!
No cueꞌ gahc yâme gybaa to lo zá, no gyre meññ-rdziadzyno leeyâme bwieꞌ mod-biahs yâme.
13 No lo hor-wé guhc to xu-ro, no to de lo tzii cuib ciuda-wé byzu-zaꞌnu, no guhty gahdzy mily meññ. No meññ ni bylaa yahc di ñehty, güluguia yâme Dioz ni nu gybaa, porni modni bydzie yâme.
14 Bylux ni rrohp guîlné; per ngueeḻy gahc ba ziaad ni rionnu.
Ni rzaꞌu gahdzy trompet
15 Ni rzaꞌu gahdzy ángel pquee trompet, bieññ gahc xtahl riedz gybaa ndip, ganii ne:
Dioz ni rtzoo mdad nó, no Crist ni pshahl me lee
ba rtzoo mdad gyre ṟeiy lo guiedzylie;
no nehx ziuꞌ dzé gydibylgaa de ni gatzoo me mdad.
16 Lo hor-wé, gydiby veinticuatr mînguhl ni rahc ni rnii ni dxie yahc ru rtzoo mdad no dxie yahc lo Dioz, bisshiby yâme lé güdihsh ihqy yâme lo yu gazacbeeiy yâme Dioz,
17 ne yâme:
Rdee noꞌ xquix lii Señor, ni rtzoo mdad,
lii we Dioz ni beeiyu lee gyreu,
lii we ni ba gahc nu xtâ ba xtze diaa, no nu ni naꞌ, no ni guiaad,
porni lii we beeiyu lee,
no ba guzlo gatzooy mdad.
18 Meññ-gyre nacióṉ ni nehx rlíladzy lii bydziaꞌdzy yâme,
per ba bydzihñ dzé cshahliꞌ guîlné chehsh yâme,
no zegahc dze-ctzooy guîlguxtisy lguia gyre mînguty,
no guiscadyiꞌ ni mos xmeññiꞌ ni nac yahc profet,
no gyre xmeññiꞌ, leeu we gyre meññ ni rzacbeeiy lii,
guhc yâme meññ-rahc ni rnii, o meññ-ndruhty nehx nac,
no gniꞌdyiꞌ meññ-rtzoo rsahc yahc lo guiedzylie.
19 Luxu byxal xiydoró Dioz gybaa, no bwien uga dxie caj ni le arc ru nu ni bdee Dioz diidz ni ctzoo me no meññ. No hor-wé byruu xgue ngüziee, no bieññ xtahl riedz, no günii ngüziee, no guhc to xu, no guhc to xroꞌ guioguie.