2
Xsoldad Jesucrist ni rtzoo dziiñ zaꞌgndzi
1 No lii, Timoteu, scâsy ñahquiꞌ dshiñaꞌ, günâbladzy cuiaz-ndipiꞌ por xlaꞌy Dioz ni nu tohzy no Crist Jesúz.
2 Ni bieññiꞌ blun xtahl meññ, bienou meññ-nehx rqueꞌladzyiꞌ lee, lehdy beeiy gluu yâmeu zrieñ meññ zegahc.
3 Guhc xsoldad Jesucrist ni rtzoo dziiñ zaꞌgndzi; ptibladzy nitisy ni nadz ni tedyiꞌ.
4 Ndruhty soldad lóni nu lo xtziiñ me ñuꞌ me zrieñ lo dziiñ, porni rquihñu ctzoo me nunzy ni rxilyno meññ-rtzoo mdad leeme.
5 No zegahc meññ ni riuꞌ to lo guîlrguiht, nehx beeiy ycaꞌ me ni gady me bâḻ di quit me naabz mod-neu.
6 No meññ-rtzoo dziiñ lo camp, lehdy glesy me cüsech la, nier rahp me de ni gnâbladzy me ctzoo me xtziiñu.
7 Güluꞌ ihqyiꞌ ni ganin, no Dioz zacno lii guieññiꞌ gyreu.
8 Di guiaaḻladzyiꞌ Jesucrist ni gübahñ de lahd mînguty, no ni ziaad de lo xfamily ṟeiy-Davit, mod-runon xtiidz me meññ.
9 No porni runon xtiidz me meññ, leewe rdeedyaꞌ gyrehzy ni nadz, xtâ lidzyguiib riaguaꞌ no caden beeiy meññ-rtzoo ni dirquihñ; per dac‑e no xtiidz Crist nyagü lidzyguiib.
10 Leewe rtibdadzyaꞌ gyrehzy ni nadz porni rioobaꞌ meññ ni ba güle Dioz lee, lehdy gylaa yâme de lo guîlnadz ni ziaad por Crist Jesúz, no tzu yâme lo xguîlbyniꞌ Dioz ni nehx zluhx.
11 Nirieꞌ ni uli we leeu:
Bâḻ rahc cuent guhty nó no Crist la, zegahc‑e zbahñ nó no leeme;
12 bâḻ rtibdadzy nó gyrehzy ni nadz la, zegahc‑e stzoo nó mdad no leeme.
Bâḻ gynii nó nehx rzaclo nó leeme la, zegahc‑e znii me nehx rzaclo me nó.
13 Nîcze nehx ntzoo nó ni ba günii nó la, leeme nehx rsaꞌn de ni rtzoo me ni ba günii me,
porni nehx beeiy ntzee me mod-nac me.
Ptzoo xtziiñ Dioz mod-riuꞌladzy me
14 Nirieꞌ yahc ni ba bzan, güniiu lo yâme gyzac, no güluꞌ xguîlriehñ yâme ñaz-lo Dioz csaan yâme de ni rdeḻydiidz yâme lguia diidz ni nehx rquihñ no nehx racno, mazyg rchaḻu meññ ni gayieññ.
15 Günâbladzyiꞌ ctzooy xtziiñ Dioz mod-riuꞌladzy me beeiy to meññ-rtzoo dziiñ ni nehx nu bia guistuꞌ lee, ni rluu meññ zaꞌgndzi diidz ni uli.
16 Di yquee gydiaguiꞌ diidz ni nu lo guiedzylie no nehx rquihñu, porni to to dzé riynou meññ ma lo ni nehx rquihñ.
17 Zâ didz-wé zidguiahcu beeiy to guîlguihdz ni le bial-yaꞌz, tziaawy tziaawy ga rzeꞌu xtâ glo rgaꞌdyu; no ze nac chohp mpyquie ni le Himeneu no Fileto.
18 Leeyâme bynityxñahz de lo ni nac ni uli, ne yâme ni rbahñ meññ de lahd mînguty, ni ba güdedy‑e leeu, gahdy rtixcann yâme lahd meññ ni ba galíladzy.
19 Per Dioz bdee me didz-uli ni zidguiahc beeiy to nieꞌ yuꞌ ru queꞌ diidz ni ndruhty nehx nshiññ, ni ne: “Dioz rzaclo me xmeññ me”; no zegahc neu: “Gyre dxu rzacbeeiy Dioz, rahp de ni gyrusytzu de lo ni dirquihñ.”
20 Leññ to yu-ro, dac‑e nunzy mbras de or o de plat nuw, zegahc‑e nu de yahg no de yu; no lahdu ni tziaawy la, rquihñu hor-gayahc ni rsahc leññ yuꞌ, no zrieñu rquihñ hortisy gacu.
21 No leewe, bâḻ dxu csaan gyre ni nahcsy lehdy gap to guîlmbañ-nye, were zidguiahc me beeiy mbras-tziaawy ni nu nunzy par Dioz, no squihñ Dioz leeme lehdy ctzoo me nitisy ni mos.
22 Byruu de ni nahcsy yahc ni rquihly mêññxtohby, mazyg ptzoo ni nac xñahzû, di csaꞌniꞌ de ni rlíladzyiꞌ Dioz, no bintzi xmeññ Dioz, no güyuꞌ dzie tziaawy no leeyâme; mod-rieꞌ ctzooy tohzy no gyre meññ ni ulihbu rzacbeeiy Dioz no to guîlmbañ-nye.
23 Di yquee ihqyiꞌ diidz ni nehx rahp guîlriehñ ni nehx rquihñ mbahty, porni nanniꞌ risteḻyu meññ.
24 To meññ ni rtzoo xtziiñ Dioz, nehx xñahzu ñuꞌ me lo guîlrdeḻy, mazyg racladzyu ctzoo me ni rxilyno meññ, gluu me meññ zaꞌgndzi, no di cshacladzy me de ni rtzoo me ni mos;
25 no lguia meññ ni rruu contr ni uli la, cu me xguîlriehñ yâme no didz-ndoo, duhn gdee Dioz lsenzy csaan yâme ni nahcsy ni nac yâme, lehdy gann yâme bia leeu ni uli,
26 lehdy gyxal lo yâme no gylaa yâme de lo ña bêndzab ru nliiby yâme, par ctzoo yâme ni racladzy me.