3
Ni ctzoo meññ dze-ba gadziñgahsh gyluhx guiedzylie
1 No zegahc racladzyu ganniꞌ nirieꞌ: dze-ba gadziñgahsh gylux guiedzylie gyrehzy ni nahcsy‑e gac.
2 Porni ziuꞌ meññ ni gyo nunzy ni mos par leegahc, gyzîbyladzy yâme medy, zniguia yâme, no zguguia leegahc yâme. Znii yâme didz-nahcsy contr zrieñ, nehx ssoob yâme xtiidz xingüzahn yâme, nehx zdee yâme xquix ndruhty, no zahc yâme meññ-dirquihñ.
3 Nehx zîntzi yâme meññ, nehx zioob yâme ndruhty, znii yâme ni nehx uli contr zrieñ, zdedy lo mdid mod-nac yâme, ziuꞌladzy yâme ctzuné yâme meññ no zacnéladzy yâme ni mos.
4 Zdee yâme xmígü gahc yâme lo ña meññ-rdziadzyno lee, stzoo yâme nitisy leeu no nehx zisshuunn xguîlriehñ yâme lguiau, zniguia yâme de gyre ni rtzoo yâme, no zyo yâme ni riuꞌladzy yâme ñahc dxic ni nyo yâme Dioz.
5 Stzoo yâme beeiy meññ-rzacbeeiy Dioz, per mod-rtzoo yâme zdee diidz nehx ulihbu rlíladzy yâme ni beeiy rtzoo Dioz.
Na di yqueꞌy coo zâ meññ-wé yahc.
6 Porni lahd yâme we riuꞌ leññ xiryuꞌ meññ, risquiee yâme meññ-ngünaa ni nwaty xguîlriehñ ni nehx rbiadzie xguîlmbahñ por xguîlquie yâme, no di raḻ csaan yâme gyre gyzasy ni nahcsy ni rzîbyladzy yâme.
7 Meññ-ngüna-rieꞌ yahc, nîcze tirgahc gazeedy yâme, per nehx ziuꞌ dzé gydzihñ gann yâme ni nac ni uli.
8 Mod-byruu chohp meññ ni le Janes no Jambres contr Moiséz, modé gahc‑e rruu meññ-wé chehsh ni nac ni uli. Meññ-wé beedy xguîlriehñ yâme, byraḻ yâme par nlíladzy yâme Crist.
9 Per nehx zruqueꞌ mod-rtzoo yâme, porni ngueeḻy gahc zdee meññ cuent de ni meññ-waty‑e leeyâme, beeiy gahc guhc gyrop meññ-byruu contr Moiséz.
Ni últim ni gu Pabl Timoteu
10 Per lii gatzooy mod-rlun meññ, mod-rtzon, ni rgu diqyaꞌ ctzon, mod-rlídadzyaꞌ Crist, mod-nehx rshacdadzyaꞌ, mod-ndzin meññ, no mod-rtibdadzyaꞌ nitisy rahcaꞌ;
11 no nanniꞌ mod-bgultihp yâme naa no gyre ni ngann ni güdeedyaꞌ. No nanniꞌ gyre ni guhcaꞌ ciuda-Antioquía, no Iconio no Listra, per Crist byla me naa de gyreu.
12 No zegahc gyre dxu ulihbu riuꞌladzy gzacbeeiy Crist Jesúz la, zgultihp meññ leeyâme;
13 per meññ-dirquihñ no meññ-risquiee, to to dzé ganidylo leegahc yâme, gayisquiee yâme meññ no gayisquiee zrieñ meññ leeyâme.
14 Per lii, Timoteu, bisnáḻ ni ba byzeedyiꞌ, no mod-bylíladzyiꞌu. Ba nanniꞌ dxu bluu lii,
15 no xtâ glo nwiñiꞌ, rzacloꞌy ni rnii lo Guehtzy ru queꞌ xtiidz Dioz, leeu gdee lii to guîlrieñ-mos no zlaay de lo guîlnadz ni ziaad porni rlíladzyiꞌ Crist Jesúz.
16 Gyre ni güyaa lo Guehtzy ru queꞌ xtiidz Dioz, Dioz gahc günii bia yqueꞌ lou, no rquihñu par gluuw meññ ni uli, no par cshalu lo meññ di ctzoo yâme ni nahcsy, no par guistziaawyu xguîlriehñ meññ, no par gluuw meññ ni nac xñahzû,
17 lehdy xmeññ Dioz gyzeedy yâme zaꞌgndzi par beeiy ctzoo yâme gyre ni mos.