2
Dan' cheyaḻa' ṉabecho Diosen' gone'
Na' dan' nac da' žialao xen gon chio' chonxencho Diosen': cheyaḻa' ṉabecho Diosen' goṉe' bi dan' chyažje chio' lente dan' cheseyažje yogo'ḻoḻ beṉe', na' ṉabechone' gaclene' yogo'ḻoḻ beṉe', na' güe'cho yeḻa' chox̱clen c̱he Diosen' c̱he bi da' güen da' chesac c̱he yogüe'. Cheyaḻa' ṉabecho Diosen' gaclene' beṉe' gwnabia' ca', no rey, no gobernador na' nochle beṉe' ca' chesenabia', cont soa cuezcho binḻo na' bibi gwžon gonxencho Diosen', ṉeca gata' da' gwžon goncho bichle da' cheyaḻa' goncho. Naquen güen ṉabecho Diosen' gaclene' yogüe' na' naquen da' chazlaže' Diosen', Dios ben' noṉe' chio' yeḻa' mban toḻi tocaṉe. Ḻe chaclaže' gwnežjue' yeḻa' mban toḻi tocaṉe c̱he yogo'ḻoḻ beṉe' na' chaclaže' yesejni'ide' diža' ḻi c̱he'. Toz Diosen' zoa beṉe' zaca' yesonxen yogo'ḻoḻ beṉe', na' ḻecz toz ben' chozoe' chio' binḻo len Diosen', ḻe'na' Jesucriston' ben' golje beṉac̱h. Jesucristw nan' bnežjw cuine' gote' ṉec̱he da' mal da' goson yogo'ḻoḻ beṉac̱h, na' cate' bžin ža Diosen' bžie' bia', cana' bene' cont goseṉeze beṉac̱hen' c̱he'. Na' Diosen' gwleje' neda' cont naca' postlw c̱he' na' cont chyix̱jue'eda' xtiže'. Choa' diža' ḻi, bi chonḻaža', ḻe naca' Criston' txen, gwleje'nda' cont chzejni'ida' beṉe' ca' bi zjanac beṉe' Israel diža' ḻi c̱he' cont yesejnilaže'ne'.
Na' dan' che'nda' gac gate'teze chesedop chesežague' chesonxene' Diosen', chaclaža' beṉe' ca' yosoḻ güiže' Diosen' yesaque' beṉe' laždao' xilaže' cont yeseḻis na'gaquen' laogüen' sin cbi yeseže'e beṉe' o yosošašlene' beṉe'. Na' ca nac no'ol ca' chesonxen Jesucriston', bi cheyaḻa' yesebec yic̱hjgaque' še nite' xdanchgua, še yosoguaḻe' bga o ret de oro o de perlas dan' naquen da' zaque', še nac yiša' yic̱hjen' xdanchgua, na' še nac xagaque' da' chzaca' la'ay. 10 San cheyaḻa' yesebec yic̱hjgaque' yesone' da' güen ca chaclaže' Diosen' yeson yogo' beṉe' chesejnilaže'ne'. 11 Na' no'ol ca' ḻecze cheyaḻa' ṉite' šize yosozenague' c̱he beṉe' ca' chososed chosolo'ede' xtiža' Diosen', na' yesone' con da' yese'ene'. 12 Neda' bi chona' latje cont no'ol ca' yosozejni'ide' beṉe' byo latje lagüe', na' ṉeca choṉa' latje yesenabi'e beṉe' byo. Cheyaḻa' yesenite' šize, 13 ḻe cate' Diosen' bene' beṉac̱hen' zgua'tec bene' Adánṉa' na' gwdechle bene' Evan'. 14 Na' cate' Satanás dan' chnabia' da' x̱igüe' ca' gwx̱oayaguen beṉe' nechw ca', gague gwx̱oayaguen Adánṉa', san gwx̱oayaguen Evan' cont bene' dan' gwna Diosen' bi gone', na' da'nan' beyaque' beṉe' güen da' xiṉj. 15 Perw na' ḻa'czḻa' no'ol ca' chesežaglagüe' chesezan xi'iṉgaque', žin ža šjasyenite' len Diosen' še zjanite' chesejnilaže'ne' na' še zjanite' chesacde'ne' na' chesacde' yezica'chle beṉe', na' še zjanite' chesone' can' chazlaže' Diosen' len yeḻa' sina' da' ba bnežjue' ḻegaque'.