3
Can' yeson beṉe' ca' yosogüia yeseṉe'e yezica'chle beṉe' chesonxene' Diosen'
1 De to diža' da' zaca' šejḻe'cho da' žan: “Beṉe' chesaclaže' yosogüia yeseṉe'e yezica'chle beṉe' chesonxene' Diosen', chesaclaže' yesone' to da' güen, še ca'.”
2 Na' beṉe' gwḻane' gone' žin dan' nac ca' cheyaḻa' soateze' gone' da' güen yogo' ža sin cbi gone' da' zaca' tiḻchone'. Cheyaḻa' soa toz no'ol c̱he', na' cheyaḻa' gaque' beṉe' yo'o xbab, na' gaque' beṉe' chnabia' cuine' chone' da' güen, na' gaque' beṉe' chon da' zej toḻi cont beṉe' yoble yesape' ḻe' bala'aṉ. Cheyaḻa' yebede' gwlebe' beṉe' liže', na' cheyaḻa' gaque' beṉe' chac chzejni'ide' xtiža' Diosen' binḻo.
3 Beṉe' chzože bi gac gwḻane' žinṉa'. Bi cheyaḻa' gaque' beṉe' yolao chdiḻe chšaše'. Cheyaḻa' gaque' beṉe' šagüe' beṉe' chon güen len yezica'chle beṉe', na' bi cheyaḻa' gaque' beṉe' chon znia, ṉeca selaže'chgüe' gone' gan mechw.
4 Na' cheyaḻa' gaque' beṉe' ṉeze can' gone' cont xi'iṉe' ca' na' nochle beṉe' nita' liže' yosozenague' c̱he' na' yesape' ḻe' bala'aṉ.
5 Ḻe še bi ṉezde' nac gone' cont xi'iṉe' ca' yosozenagbe' c̱he' na' yesapbe' ḻe' bala'aṉ, bi gac gone' cont beṉe' chesedop chesežag chesonxene' Diosen' yosozenague' c̱he'.
6 Bi cuejle beṉe' za' chzolao chejnilaže' Diosen' cont gwgüia ṉe'e beṉe' ca' chesonxene' Diosen', ḻe beṉe' coben' xož gonxen cuine' na' tena' Diosen' güe'e ḻe' castigw še gone' ca'. Can' goc c̱he Satanásen' cani'te cate' benxen cuinen na' Diosen' bebejen' gan' zoe'na'.
7 Na' beṉe' cuejle cheyaḻa' soe' gone' cont beṉe' ca' bi zjanac txen yeseṉezde' chone' güen, ḻe še gone' da' malen' yeseṉe' beṉe' c̱he' na' Satanásen' co'oyeḻan' ḻe' gonche' da' malen'.
Beṉe' ca' yeson žin bixjw
8 Na' ḻecze cate' cuejle beṉe' yeson žin bixjw da' chata' len beṉe' ca' chesonxene' Diosen', ḻe cuej beṉe' cheson güen cont gapcho ḻegaque' bala'aṉ. Ḻecze cheyaḻa' yesaque' beṉe' chesoe' diža' ḻi da' šejḻe'cho, beṉe' bi zjayolagüe' chesezožde', na' beṉe' bi yesezelaže' yeseṉi'e c̱he xšin Diosen' dan' yesone'na'.
9 Cheyaḻa' yesaque' beṉe' chesejḻe'e cayaṉen' ba bzejni'i Diosen' chio' c̱he Jesucriston' dan' nono gwṉeze cana', na' beṉe' cheson da' güen cont yeseṉezde' ḻo' yic̱hjlažda'ogüe' chesone' can' chazlaže' Diosen'.
10 Na' cate' za' cuejle beṉe' ca' yeson žin bixjwna', ḻe ṉa'yaṉe' can' chesonen', na' še gata'bia' chesonen' binḻo bibi chesec̱hoe', nachen' cuejle ḻegaque'.
11 Na' no'ol ca' yeson xšin Diosen' ḻecze cheyaḻa' yesone' cont gapchone' bala'aṉ. Bi cuejle no'ole chṉie' c̱he beṉe' o no'ole yolagüe' sožde', san cuejle no'ol ca' yesenite' yesone' can' chazlaže' Diosen'.
12 Na' cate' cuejle beṉe' byo yeson žin bixjw da' chata' ladjo beṉe' ca' chesonxene' Diosen', ḻe cuej beṉe' zoa toze no'ol c̱he', na' beṉe' chon cont bi' c̱he' ca' na' nochle beṉe' nita' liže' chosozenague' c̱he'.
13 Ḻe še beṉe' ca' cheson žin bixjon' yesone' binḻo dan' yo'o ḻo na'gaque' yesone', nach yesejnilaže'chgüe' Jesucriston' sin cbi yesežebe', na' yezica'chle beṉe' yesape' ḻegaque' baḻa'aṉ.
Da' chejni'icho c̱he Diosen' dan' nono gwṉeze cana'
14 Chzoja' le' da' quinga da' cheyaḻa' gonḻe ḻa'czḻa' zoa' lez yob yida' gan' zon',
15 cont še šeda' ba ṉezdo' nac cheyaḻa' yeson beṉe' ca' zjanac diaža c̱he Diosen', ḻe chio' chdop chžagcho chonxencho Jesucriston' naccho diaža c̱he Diosen' ben' zoa toḻi tocaṉe. Na' chio' chdop chžagcho chonxenchone' yo'o ḻo na'cho choncho cont chesombia' beṉe' diža' ḻi c̱he Diosen'.
16 Da' ḻicze da' zaca'chgua dan' ba bzejni'i Diosen' chio'. Cana' nono gwṉeze da' quinga dan' bzejni'ide' chio' c̱he Jesucriston', žan:
Diosen' bide' golje' beṉac̱h,
na' Spiritw c̱he Diosen' blo'en naque' beṉe' güen juisyw.
Na' beṉe' ca' zjanac angl c̱he Diosen' bedeseṉe'e ḻe'.
Na' bžin ža Diosen' bene' cont beyepe' yaba gan' yo'ochgua be'ni'.
Na' beṉe' ca' cheso'e xtižen' ba goseyix̱jue'eden' len beṉe' že' nación zito',
na' zan beṉe' že' ḻo yežlion' ba chesejḻe'e c̱he'.