4
Gashtal gyibaa griib zily mbecy Ñgyoozh
1 Na despuees ni de nu ndeꞌ, orzeꞌ bgüi̱i̱. Orzeꞌ bzaaca̱ tub roꞌ gashtal gyibaa. Naal ñi. Nunu güeña̱ nu zaab tiꞌ mbecy, laab yu nu mnii nu ya̱ loga. Tiꞌ nu rnii zeꞌ zaab tiꞌñ gal nu zaab tiꞌ tub trompet. Orzeꞌ nay:
―Gup gashtal ii. Orzeꞌ lyu̱u̱ lor dela coz nu gac despuees ni de nu ndeꞌ ―nay.
2 Laab or la zeꞌ, orzeꞌ gutib ic Espiriit Yon ni Ñgyoozh ya̱. Orzeꞌ bzaaca̱ tub yashily zeꞌ nu riib ic mbecy gashtal gyibaa la. Zeꞌ zub tub mbecy loñ.
3 Orzeꞌ mbecy nu zub lo yashily zeꞌ rabeey gal nu rabee tub gyitaꞌ nu ryaal gyi lo o gal nu rabee tub gyitaꞌ coloor gyee reñ. Nunu dub yub la zeꞌ nu zu yashily zeꞌ zu tub shelcuit nu na gal nu na tub gyitaꞌ caꞌ nu ryaal gyi lo.
4 Orzeꞌ laab zeꞌ nu zu yashily zeꞌ dub yub la par loñ, zu gaꞌ gal zu tap yashily zeꞌ nu riib icaꞌ mbecy. Zeꞌ lo gal zu tap yashily zeꞌ, zub gal zu tap yu bel. Orzeꞌ dela dey zuy negy cacy iily la, nunu ri coron or too dey.
5 Zeꞌ nu nguaa de yashily zeꞌ rzu gyi ni guzii. Orzeꞌ zaab tiꞌ guzii, nunu pang la yet ñi. Orzeꞌ par lo yashily zeꞌ zu gagy candiil rca gyi loñ. Orzeꞌ gagy candiil zeꞌ, ndeꞌ muesht ni Espiriit Yon ni Ñgyoozh, biñ nu nash numbr gagy.
6 Nunu laabaꞌ par lo yashily zeꞌ ri tub coz nu na gal nu na tub nac nis ily, nu rabee gal nu rabee guan nu rdugyi yaa lo.
Orzeꞌ laab gazel zeꞌ nu zu yashily zeꞌ, dub yub la cuit ñi zu tap mbecy mbañ nu psaꞌ lagy Ñgyoozh. De yu zeꞌ taꞌ urlo dey dutuub la cuerp niy. Gal nu taꞌñ par lo dey niꞌ ziꞌl taꞌñ par ich yu.
7 Orzeꞌ yu loga la nay gal nu na tub biidz. Zeꞌ yu cyup nay gal nu na tor. Zeꞌ yu chon rabee loy gal nu rabee lo mbecy. Zeꞌ yu tap nay gal nu na tub psi ornu rded ma lo bi.
8 Lo tap de mbecy zeꞌ tub ga la dey zub shuup ga loweꞌy. Nunu dutuub la cuerp ni dey taꞌ urloy. Dzi rel la wacheca dey nu rniiy:
Ñgyoozh, biñ nu nac Shuaan de̱,
biñ nu gac gyicy dela coz,
mi zeꞌ tonaꞌ la yon mi.
Mi zeꞌ biñ nu nil nac gulas,
nunu biñ nu nac na,
nunu laab mi biñ nu cyid par lo,
rnii dey.
9 Orzeꞌ de tap anc zeꞌ ryabic dey gyel mbecy ni Ñgyoozh, biñ nu zub lo yashily, nunu zum tub la. Orzeꞌ briib zily dey mi, nunu briic dey gras nim.
10 Na laab mnii la dey ndeꞌ, orzeꞌ de gal zu tap yu bel zeꞌ wes saa tiily la dey lo biñ nu zub lo yashily zeꞌ. Nunu pca dey mi zeꞌ, biñ nu zu tub la. Orzeꞌ briib dey coron niy zeꞌ nu zu yashily nu riib ic mi. Orzeꞌ na dey:
11 Shuaan de̱, Ñgyoozh ne̱ de̱,
ru yad ñi nir nu gyabic de̱ gyel mbecy nir,
nunu yad ñi nir nu ca lagy de̱ lor,
nunu yad ñi nir nu gac gyicy ru dela coz,
gun dela coz yuꞌñ par nu ndeꞌ coz nu ru rlagy ru.
Nunu par nu nac nu ndeꞌ coz nu ru rlagy ru, ndeꞌ nu psaꞌ lagy ru ñii,
na dey.