5
Gyicy nu ndudub gal nu Biñ nu nac Shily
1 Orzeꞌ bzaaca̱ mbecy nu zub lo yashily zeꞌ nuum tub gyicy nu ndudub nu yaa beem. Rup chu laꞌ la lo gyicy zeꞌ taꞌ letr. Orzeꞌ gagy seꞌ nag nañ ñi nu duu iily. Tub ga seꞌ nu nag de duu iily zeꞌ, zeꞌ zub tub ga sey nu byaa nu biñ.
2 Orzeꞌ bzaaca̱ tub anc nu dzi fert. Ye la rbish tiy nu rgugyiꞌy:
―¿Ca na mbecy nu cyiiñ yu sug yu sey zeꞌ? Orzeꞌ tiily yu lo gyicy zeꞌ ―na anc zeꞌ.
3 Tees wancyuu su ni tub la mbecy nu yuꞌ gyibaa, ni mbecy nu yuꞌ gyishlombecy ii, ni mbecy nu yuꞌ lat de mbecy gut nu ñcyiiñ yu shaal yu loñ, ni nu güiiy loñ.
4 Orzeꞌ tonaꞌ la bduna̱, gun wangad ni tub la mbecy nu ñcyiiñ yu shaal yu lo gyicy zeꞌ, ni nu ngüiiy loñ.
5 Orzeꞌ na tub de yu bel zeꞌ rab yu ya̱:
―Cueꞌ gun ru, gun biidz, biñ nu bruu lat nez de mbecy Judá, biñ nu bruu cyong nez gyitoo rey Dabi, mi zeꞌ bi bicy mi gan, nunu cyiiñ mi sug mi gagy sey zeꞌ. Orzeꞌ tiily mi lo gyicy zeꞌ ―na tub de yu bel zeꞌ.
6 Orzeꞌ gazel zeꞌ nu zu yashily zeꞌ, laab zeꞌ nu zu tap de mbecy mbañ zeꞌ, gal nu de yu bel zeꞌ. Orzeꞌ zeꞌ bzaaca̱ tub Shily. Rlyu nu ma zeꞌ bi gua ma guc ma gun. Zub gagy nguaz ma, gal nu gagy urlo ma. Ndeꞌ yaruuñ Espiriit Yon ni Ñgyoozh, biñ nu nash numbr gagy. Mi zeꞌ biñ nu bzuu nez Ñgyoozh nu cham dutuub la gyishlombecy.
7 Orzeꞌ biñ nu nac Shily zeꞌ guam lo biñ nu zub lo yashily zeꞌ. Orzeꞌ gush mi gyicy nu ndudub nu zu yaa bee biñ nu zub lo yashily zeꞌ.
8 Na laab bduꞌ yaa lam gyicy zeꞌ, orzeꞌ de tap mbecy mbañ nu zu zeꞌ, nu de gal zu tap yu bel zeꞌ, dela dey gusu tib yu lo biñ nu nac Shily zeꞌ. Orzeꞌ lo dela dey tub ga lay nuuy tub ga been nu la arpa. Nunu niꞌ dela dey nuuy tub ga bas or nu yuꞌ yaal nañ. Orzeꞌ yaal zeꞌ, ndeꞌ yaruuñ ornu rnii nu de mbecy Ñgyoozh, de yu nu bi nac nim.
9 Orzeꞌ biil dey tub cant cub. Orzeꞌ rul dey:
Ru nac ru biñ nu cyiiñ nu gash gyicy nu ndudub.
Orzeꞌ sug ru de sey niñ.
Gun ru gut ru guc ru gun nu gua lo Ñgyoozh.
Nunu pshu reñ ru.
Gun orzeꞌ wiir de mbecy par nu cuic ru nim.
Wiir de lo la nez mbecy,
gal nu de lo la mbecy nu rnii reñ gal la riidz,
gal nu de mbecy nu yuꞌ dela gyedz,
gal nu de mbecy nu yuꞌ dela lugaar.
10 De yu zeꞌ, bicy ru nu byac dey tub nac mbecy nu gyub ic Ñgyoozh.
Nunu bicy ru nu byac dey uz par nu gac dey riiñ ni mi zeꞌ.
Nunu de yu zeꞌ gyub ic yu gyishlombecy.
Ni mod za de riidz nu biil dey.
11 Gazeꞌ nu bgüi̱i̱ nunu güeña̱ nu zaab tiꞌ zigy tonaꞌ la anc nu yuꞌ dub yub la zeꞌ nu zu yashily zeꞌ, gal nu de tap mbecy mbañ zeꞌ, gal nu dela de yu bel zeꞌ. Zeꞌ yuꞌ bee miyo̱o̱ la dey nac yu yuꞌy.
12 Orzeꞌ ye la rbish ti dey. Orzeꞌ na dey:
Biñ nu na gal nu na Shily nu gua gun lo Ñgyoozh,
mi zeꞌ yad ñi nim nu gyub ic mi dela coz,
nunu yad ñi nim nu gyuꞌ dela gyel nap yaam,
nunu yad ñi nim nu gad lagy mi dela coz,
nunu yad ñi nim nu nac mi biñ nu fert,
nunu yad ñi nim nu ca lagy mbecy lom,
nunu gyabic dey gyel mbecy nim,
nunu griib zily dey mi,
na dey.
13 Orzeꞌ niꞌ ziꞌl güeña̱ nu rnii dela coz nu psaꞌ lagy Ñgyoozh: dela coz nu yuꞌ gyibaa, nu de coz nu yuꞌ gyishlombecy ii, nunu de coz nu bi gut, gal nu de coz nu yuꞌ lo nisyudoo. Orzeꞌ na dela ndeꞌ:
Gyabic den gyel mbecy ni biñ nu riib ic lo yashily,
ni biñ nu nac Shily.
Nunu ca lagy den lom,
nunu grib zily den mi,
nunu mi zeꞌ gyub ic mi dela coz dub laa tiem,
na de coz zeꞌ.
14 Orzeꞌ zaꞌ tap la de mbecy mbañ zeꞌ rnii dey:
―¡Laab ni gac ñii! ―nay.
Zeꞌ de gal zu tap de yu bel zeꞌ gusu tib dey. Orzeꞌ briib zily dey mi.