72
1 Dios, ben ga wchi'a ḻaže' benne' wnná bia' da' žak cheto' kan ẕchi'a ḻáže'kzo' Le',
na' ben chawe' x̱kwide' ka' che benne' wnná bian'.
2 Naž ḻe' wchi'a ḻaže'e cháwe'do' benne' chio' ka'.
Ka nak da' naken dot da' li wchi'a ḻaže'e benne' chio' ka' ẕzáka'ḻe'egake'.
3 Ḻaw ya'a ka' chejga'ngak chawe' benne' chio' ka',
na' ḻaw ya'ado' ka' kwézgake' ḻo da' nak chawe'.
4 Wchi'a ḻaže'e benne' wláž ka' ẕzáka'ḻe'egake'.
Yeslé' x̱kwide' ka' chegak benne' ka' žiážjegekle'.
Wžía yi'e benne' ka' žsáka'gake' benách chio' ka'.
5 Chébeteze benne' wnná bian' Le',
x̱ak zoa wbíž, na' byo'.
6 Gak benne' wnná bian' ka nis yejw da' žaken ga naz,
na' ka ẕlelj da' žeẕjwn ḻo yežlyó.
7 Ḻo ža ka' che benne' wnná bian' gak da' chawe',
na' ga'ngak cháwe'do' benne' ka' x̱ak zoa byo'.
8 Nna bi'e dot yežlyó nga, žoa'a Yegw Éufrates,
na' do ẕente yežlyó.
9 Wzóa ẕibgak benne' dot yežlyó ḻawe' ḻe',
na' wzex̱jwe' ḻáže'gak benne' ka' ẕžá'agake' ḻe'.
10 Benne' ẕnna bi'e yež Tarsis, na' benne' ẕnna bi'e yež zi'to' ka' zedjnoé'e da' wnéẕjwgake' chie',
na' benne' ẕnna bi'e yež Sabá, na' benne' ẕnna bi'e yežlyó Seba wnéẕjwgake' chie' yeḻa' wnni'a.
11 Yógo'te benne' wnná bia' ka' wzóa ẕíbgake' ḻawe' ḻe,
na' benne' yógo'te yež góngake' žin chie'.
12 Ḻe' yeslé' benne' ka' žiážjegekle', benne' ka' žḻížgake' ḻe',
na' yeslé' benne' ka' ẕzáka'gake',
na' bi zoa no benne' gákḻene' ḻégake'.
13 Yeyache' ḻáže'le' benne' yache' ka', na' benne' ka' žiážjegekle'.
Yeslé' benne' yache' ka' nich sóagake' nbángake'.
14 Yeya'we' benne' yache' ka' ḻo na'gak benne' wen ḻaže' ka', benne' yichj ža'a ka',
na' gon byene' yeslé' benne' ka' ḻo na'gak benne' wet benne' ka'.
15 Soa nban benne' wnná bian',
na' wnéẕjwgake' chie' ya oro che yež Sabá,
na' nnábtezgekle benne' ka' gakḻen Dios ḻe',
na' dot ža, na' yele nnábgekle' Dios gon chawe'e benne' wnná bian'.
16 Gázgake' to ẕíga'do'ze ẕoa' stribe ḻo yežlyó, na' ḻaw ya'ado' chégake' ka',
na' kwíaḻe'e linne chen kan ẕbian ḻaw Ya'a Líbano,
na' benne' ka' nníta'gake' ḻo yež ka' yángake' kan žon yix̱e' da' žen' yežlyó.
17 Sóateze la benne' wnná bian'.
Wcháḻjtezgake' che le' x̱ak zoa wbíž.
Ni'a chie' ḻe' gak yeḻa' ba nez chegak benách ka',
na' nnágake' nak chie' yeḻa' ba nez ẕen.
18 Cháwe'ḻe'e nak X̱anžo Dios.
Nake' Dios chegak benne' Israel ka',
na' toze' Ḻe' žone' da' ka' žóngaken ga žebánležo.
19 Cháwe'ḻe'e nak La la'y chie' dan' náktezen ẕen,
na' dot yežlyó nga ḻé'egekle' yeḻa' ẕen chie'.
Ka'kze naken, na' ka'kze gaken.
20 Ga ni ze ḻaw da' wnná Dabí, ẕi'n Isaí,
dan' bcháḻjḻene' Dios.