73
Da' likze Dios ben chawe'e benne' Israel ka',
benne' ka' zej nake' dot ḻi ḻaže' ḻawe' Ḻe',
san neda' wzóa' chejchegwa',
na' wzóa' gona' to da' ẕinnj.
Bge'ela' benne' wnni'a ka',
kate' bḻe'ela' kan žak chawe' chegak benne' ka' nbej yíchjgake' Dios.
Benne' ki bi zej že' zedle che yeḻa' got,
dan' zej zóaḻi'e chawe'.
Bi ẕzáka'gake' kan ẕzáka'gak yezika' benne' ka',
na' bi zoa da žak chégake' kan žak chegak yezíka'že'.
Che ḻen ẕka'n ẕen kwíngake'.
Žónteze žóngake' da' bi nak chawe'.
Ẕgól-ḻe'egake' dan' žáwḻe'egake' da' cháwe'ḻe'e.
Ẕzí'ḻe'egake' da' ẕdan ḻáže'gake'.
Žon dítjgekle' Dios, na' ẕnnégake' chie', na' žóngake' da' ẕinnj.
Ḻo yeḻa' ẕka'n ẕen kwíngake' ẕcháḻjgake' da' ẕente.
Ẕnnégake' che da' ka' zej zoan ya'abá,
na' ẕcháḻjgake' ka benne' ka' zej nape' dot yežlyó.
10 Che ḻen yezika' benách ka' želyenle' x̱tíža'gake',
na' ẕzi' ḻo ná'gake' da' ẕnnágake'.
11 Ẕnnagak benne' wnni'a ka': “¿Biẕkze nnezle Dios?
¿Ẕḻé'ekzle Bennen' zoe' ža'le da' žonžo?”
12 Benne' ki zej nbej yíchjgake' Dios,
na' zej zoe' binlo, na' ẕzí'gakže' yeḻa' wnni'a.
13 Da' likze, dáche'ze goka' dot ḻi ḻaže',
na' bi be bena' da' bi nak chawe',
14 san tža tža wẕáka'ḻi'a,
na' žsaka' zí'gake' neda' yógo'te ža.
15 Chela' nnia' neda': wchaḻja' kan ẕchaḻjgak benne' ka',
na' wka'na' bénne'do' chio' ka' ka'ze, Dios.
 
16 Kate' blab ḻaža'a nich chejni'ila' da' ni,
wžé' zédḻe'ela',
17 san kate' wyoá'a ḻo latje la'y che Dios,
na' gókbe'ela' da' gak chegak benne' ka' ga ze ḻawte.
 
18 Da' likze beno' chegak benne' ka' chejchégwgake',
na' gono' ga kwia yí'gakkze'.
19 Ḻa' kwia yí'tegake'.
Yeḻa' ẕžebe senen ḻégake', na' goten ḻégake'.
20 Zej nake' ka to da' bḻe'elto' to ḻo bichgale dan' ẕnniten kate' žebanžo.
Ka'kze gaken, X̱anto' Dios.
Kate' so žo'o, wka'no' ka'ze da' bḻoe'el kwingak benne' ka'.
21 Kate' bge'ela' benne' ka',
wžé' zédḻe'ele ḻáẕda'wa'.
22 Goka' ka to bia yix̱e' ḻawo' Le',
dan' gok zide yichja', na' bi bejni'ila',
23 san wzóaḻenteza' Le', na' nóx̱wkzo' na'a ḻi ža.
24 Bsedlo' neda' nich gona' da' ẕḻoe'elo' neda',
na' te na'a yezí' ḻo no'o neda' ḻo ya'abá chio'.
25 Bi zoa no benne' yoble chia' ya'abá san tozo' Le',
na' bi be zoa da' ẕdan ḻaža'a yežlyó nga san tozo' Le'.
 
26 Žedó ḻaže' beḻa' žen chia', na' ḻáẕda'wa',
san Dios nake' Benne' žon choche' neda', na' nake' yeḻa' ba nez ẕen chia' to chi'ize.
 
27 Benne' ka' žekwásgake' gan zo' nítgekle'.
Wžía yi'o yógo'te benne' ka' kwej yíchjgake' Le'.
 
28 San neda', žak chawe' chia' dan' wbiga' ḻaw Dios.
Wx̱én ḻáže'teza' X̱anžo Dios,
na' wchaḻjkza' che da' ẕente da' bene' Ḻe'.