4
Ala sie makiitima nɛ
1 Na tɛmui, n na Yuda nun Darisalamu ragbilen e xɔnyi,
2 n si birin malanma nɛ Yehosafati gulunba kui.
Mɛnni n e makiitima nɛ n ma ɲama Isirayila xa fe ra,
naxee findixi n kɛ tongomae ra.
Duniɲa si naxee rayensen yɛ ɲamanɛe ma,
e n ma bɔxi itaxun e boore ma,
3 e n ma ɲama raba e sago ra.
E xɛmɛ dimɛe mati langoeɲa sare ra,
e ginɛ dimɛe mati beere sare ra alako e xa siisi.
4 «Wo tan Tirekae, Sidɔnkae, nun Filisitakae, wo wama munse xɔn ma n bɛ? Wo wama wo gbe nan ɲɔxɔfe n ma? Xa na na a ra, n wo sare fima nɛ wo xa wali ra mafuren mafuren. 5 Wo bara n ma xɛɛma nun n ma gbeti tongo n ma hɔrɔmɔbanxi kui, wo fa a raso wo xa kuye banxie kui. 6 Wo bara Yudakae nun Darisalamukae mati Girɛkikae ma, alako e xa makuya e xɔnyi ra.»
7 «N e ramaxama nɛ alako e xa keli yire wo e matixi dɛnnaxɛ, n fa wo sare fi wo xa wali ɲaaxi ra. 8 N wo xa di xɛmɛe nun di ginɛe matima nɛ Yudakae ma, alako e fan xa e mati Sebakae ma naxee makuya wo ra.» Alatala xa masenyi nan na ki.
9 «Wo yi fala duniɲa sie bɛ:
‹Wo xa fe yailan gere xili ma,
wo xa wo xa sɔɔrie malan.
Geresoe birin xa e maso, e xa gere rakeli!
10 Wo xa wo xa kerie yailan santidɛgɛmae ra,
wo xa wo xa wɔrɔtɛe fan yailan tanbɛe ra.
Sɛnbɛtare xa a fala, «N sɛnbɛ gbo!»
11 Wo xa fa be,
wo tan si naxee na muxu rabilinyi.›»
Alatala, i xa sɔɔrie ragoro mɛnni fa!
12 Sie xa keli, e xa malan Yehosafati gulunba kui,
barima n e birin makiitima nɛ.
13 Wo xa wɔrɔtɛe tongo, barima xɛ bara mɔ!
Wo xa wɛni bogi bundu, barima e bara gbo yɛ,
mixie xa ɲaaxuɲa xa fe ra.
14 Ɲamae, wo xa goro kiitisa gulunba kui,
barima Alatala xa lɔxɔɛ bara makɔrɛ naa.
15 Soge nun kike dimima nɛ,
tunbuie mu yanbama sɔnɔn.
16 Alatala fama nɛ a xaaɲɛ xui raminide kelife Siyoni,
a xui magaaxuxi minima nɛ kelife Darisalamu.
Koore nun bɔxi sɛrɛnma nɛ,
kɔnɔ Alatala findixi kantari nan na a xa ɲama bɛ,
a findi yire makantaxi ra Isirayila bɛ.
17 Na kui, wo a kolonma a n tan nan wo Marigi Alatala ra,
naxan yigiyaxi n ma geya sɛniyɛnxi Siyoni fari.
Darisalamu findima yire sɛniyɛnxi nan na,
si gbɛtɛe mu mɛnni gerema sɔnɔn.
18 Na lɔxɔɛ, wɛni nɛɛnɛ nun xiɲɛ gboma nɛ geyae ma.
Ye toma nɛ Yudaya birin ma,
ye dulonyi bulama nɛ Alatala xa banxi kui,
a goro Kasiya gulunba kui.
19 Kɔnɔ Misira bɔxi luma nɛ kana ra,
Edon findi gbengberenyi ra gbaloe xa fe ra,
e naxan dɔxɔ Yudakae ma e faxafe ra fufafu.
20 Kɔnɔ ɲama sabatima nɛ Yudaya nun Darisalamu waxati birin.
21 N e xa yunubi xafarima nɛ e nu bara naxan naba.
N tan Alatala, n yigiyama Siyoni nɛ.