2
عَنِ شَ سُوكِ
1 نَ كُي، عَنِ يِ سُوكِ نَن بَ عَلَتَلَ بّ،
«عَلَتَلَ بَرَ ﭑ بْحّ رَ سّيوَ،
عَ بَرَ ﭑ شُن نَكٍلِ.
ﭑ دّ بَرَ مَقُلُن ﭑ يَشُييٍ شِلِ مَ،
ﭑ سّيوَشِ عَلَتَلَ شَ مَلِ شَ قٍ رَ.
2 عَلَتَلَ شَ سّنِيّنيِ مَنِيّ مُ نَ.
عَلَ فبّتّ يٌ مُ نَ، بَقٍ عَ تَن نَ.
سّنبّمَ يٌ مُ نَ عَلْ وٌن مَرِفِ عَلَ.
3 وٌ نَشَ وٌ يّتّ عِفبٌ،
نَ وْيّنيِ مْولِ نَشَ مِنِ وٌ دّ عِ،
بَرِ مَ عَلَتَلَ، عَلَ نَن عَ رَ نَشَن قٍ بِرِن كٌلٌن،
نَشَن مِشِ شَ وَلِ بِرِن مَنِيَمَ سِكٍيلِ رَ.
4 فٍرٍ سٌ سّنبّمَيٍ شَ شَلِ عِفِرَ مَ نّ،
كْنْ يّتّ مَفٌرٌي سّنبّ سْتْمَ.
5 نَشٍيٍ سِنفٍ نُ لُفَشِ،
نٍيٍ نُ وَلِمَ نّ عَلَكٌ عٍ شَ تَامِ سَرٍ سْتْ،
كْنْ نَشٍيٍ نُ كَامّشِ،
نٍيٍ تَن بَرَ وَ سَ.
فِنّ دِبَرِتَرٍ دِ سٌلٌقٍرٍ بَرِ مَ نّ،
كْنْ دِبَرِ بَرَ قِندِ دِبَرِتَرٍ رَ.
6 عَلَتَلَ نَن مِشِ قَشَمَ،
عَ تَن نَن مِشِ بَلٌمَ.
عَ مِشِ رَ سِفَمَ عَلِفِيَمَ،
عَ تَن نَن مِشِ رَكٍلِمَ قَشّ مَ.
7 عَلَتَلَ نَن كٍرٍن مِشِ رَبَننَمَ،
عَ تَن نَن مِشِ رَقُشَرِ مَ.
عَ مِشِ عِتٍمَ،
عَ تَن نَن مِشِ عِفٌرٌ مَ.
8 عَ مِسِكِينّ بَمَ عَ شَ سٍتَرٍحَ كُي،
عَ نِيَ عَ شَ دْشْ كُنتِفِيٍ تَفِ بِنيّ رَ.
عَلَتَلَ نَن فبٍ نَ دُنِحَ تُنشُنيِيٍ رَ،
عَ بْشِ عِتَلَشِ عٍ تَن نَن قَرِ.
9 عَ حْشْ سَمَ نّ عَ بَتُلَيٍ حّرّ كِ شْن مَ،
كْنْ مِشِ كٌبِيٍ تَن لْيمَ نّ دِ مِ كُي.
مِشِ يٌ مُ فٍينِمَ عَ يّتّ سّنبّ رَ.
10 عَلَتَلَ مَتَندِلَيٍ شَ قٍ كَنَمَ نّ.
فَلَنيِ بُلَمَ عٍ تَن نَن شِلِ مَ.
عَلَتَلَ بْشِ بِرِن مَكِيتِمَ نّ.
عَ سّنبّ قِمَ نّ عَ شَ مَنفّ سُفَندِشِ مَ،
عَ قَ عَ شَ مَسِيهُ سّنبّ فبٌ.»
11 نَ دَنفِ شَنبِ، عٍلٍكَنَ نَشَ فبِلٍن عَ شْنيِ رَ مَ. عَ نَشَ عَ شَ دِ سَمُوٍلِ لُ عَلَتَلَ شَ وَلِ رَ عٍلِ سّرّشّدُبّ قّ مَ.
عٍلِ شَ دِيٍ شَ وَلِ حَاشِ
12 قُيَنتٍ نَن نُ نَ عٍلِ شَ دِيٍ رَ، نَشٍيٍ مُ نُ بِرَ مَ عَلَتَلَ قْشْ رَ. 13 يِ سّرّشّدُبّيٍ نُ وَلِمَ يِ كِ نّ حَمَ رَ؛ مِشِيٍ تٌ نُ قَمَ سّرّشّ بَدٍ، عٍ نّ سّرّشّ سُبٍ حِنمَ، سّرّشّدُبّ شَ وَلِكّ نُ سُبٍ سْشْسٍ بٍلٍبٍلٍ 14 رَفٌرٌ مَ نّ تُندٍ كُي، شَ نَ مُ سٍ حِن سٍ فبّتّ كُي، عَ نُ نَشَن يٌ سْشْ، عَ عَ رَتٍ، عَ نَ سٌمَ سّرّشّدُبّ نَن يِ رَ. عٍ نُ نَ مْولِ رَبَمَ عِسِرَيِلَكَيٍ بِرِن نَ نَشٍيٍ نُ قَمَ سِلٌ. 15 وَشَتِ ندٍيٍ بٍينُن شُرُ سٍ تُرٍ فَن تّمُي شَ قْلْ، سّرّشّدُبّ شَ وَلِكّ نُ عَ قَلَمَ نّ سّرّشّ كَنيِ بّ، «بٍينُن عِ شَ نَ سُبٍ فَن، عِ شَ ندٍ سٌ ﭑ يِ رَ سّرّشّدُبّ بّ. عَ مُ وَ مَ سُبٍ فَنشِ شْن.» 16 شَ سّرّشّ كَنيِ عَ يَابِ، «عَ لَنمَ تُرٍ شَ فَن سِندٍن. نَ دَنفِ شَنبِ، عِ نَ وَ نَشَن شْن، عِ شَ نَ تٌنفٌ.» سّرّشّدُبّ شَ وَلِكّ نُ عَ يَابِمَ نّ، «ﭑ تٌندِ. شَ عِ مُ تِن، ﭑ عَ تٌنفٌمَ سّنبّ نَن نَ.» 17 نَ كُي، عٍلِ شَ دِيٍ نُ يُنُبِ حَاشِ نَن سْتْمَ عَلَتَلَ رَ، بَرِ مَ عٍ مُ نُ بِنيّ يٌ سَشِ سّرّشّيٍ مَ نَشٍيٍ نُ بَمَ عَ بّ.
18 سَمُوٍلِ نُ عَلَتَلَ شَ وَلِ رَبَمَ نّ، دٌنمَ كُيٍ سّرّشّدُبّ دَاشِ رَفٌرٌشِ عَ مَ. 19 حّ يٌ حّ عَ نفَ نُن عَ بَبَ نُ قَمَ سِلٌ سّرّشّ بَدٍ. عَ نفَ نُ عَ سَنبَمَ فُبَ دِ رَ. 20 عٍلِ نُ عَلَ مَشَندِ مَ نّ عٍلٍكَنَ نُن عَ شَ فِنّ بّ عَ قَلَقٍ رَ، «عَلَتَلَ شَ عَ رَفِرِ عِ شَ فِنّ شَ دِ فبّتّيٍ بَرِ عِ بّ دِ حْشْي رَ عَ نَشَن قِشِ عَلَتَلَ مَ.» نَ دَنفِ شَنبِ، عٍلٍكَنَ نُن عَنِ نَشَ فبِلٍن عٍ شْنيِ. 21 عَلَتَلَ نَشَ هِننّ عَنِ رَ، عَ قَ دِ شّمّ سَشَن نُن دِ فِنّ قِرِن بَرِ. نَ تّمُي سَمُوٍلِ نُ نَ مْقٍ عَلَتَلَ يَ عِ.
22 عٍلِ سّرّشّدُبّ نَشَن نُ بَرَ قٌرِ كِ قَنيِ رَ، عَ نَشَ عَ كٌلٌن عَ شَ دِيٍ نُ نَ قٍ حَاشِ رَبَقٍ عِسِرَيِلَكَيٍ رَ. عٍ نُن فِنّ نَشٍيٍ نُ وَلِ رَبَمَ هْرْ مْلِنفِرَ سٌدٍ دّ رَ، عٍ نُ يّنّ رَبَمَ نٍيٍ يّتّ يَتِ رَ. 23 عٍلِ نَشَ عَ شَ دِيٍ مَشْرِن، «مُنقٍ رَ وٌ يِ مْولِ رَبَمَ؟ حَمَ بِرِن وٌ شَ وَلِ كٌبِ نَن قَلَقٍ ﭑ بّ. 24 ﭑ مَ دِيٍ، وٌ شَ بَ نَ مْولِ رَبَقٍ. ﭑ نَشَن مّقٍ وٌ شُن، عَ مُ قَن قٍوٌ. وٌ عَلَتَلَ شَ حَمَ رَ مُرُتَمَ نّ عَ شَ سّرِيّ مَ. 25 شَ مِشِ يُنُبِ رَبَ عَ بٌورٍ رَ، عَلَ نَن عَ مَكِيتِمَ، كْنْ شَ مِشِ سَ يُنُبِ رَبَ عَلَتَلَ رَ، ندٍ شَرِ سَمَ نَ كَنيِ بّ؟» كْنْ عٍلِ شَ دِيٍ مُ تِن عٍ تُلِ مَتِدٍ عٍ بَبَ رَ، بَرِ مَ عَلَ سَفٌ نَ نُ عَ رَ عٍ شَ قَشَ.
26 نَ قٌنِكٍ سَمُوٍلِ نُ نَ مْقٍ عَ قَنيِ رَ. عَ نُ رَقَن عَلَ مَ، عَ نُ رَقَن مِشِيٍ مَ.
27 لْشْي ندٍ نَمِحْنمّ ندٍ نَشَ قَ عٍلِ يِرٍ، عَ عَ قَلَ عَ بّ، «عَلَتَلَ شَ مَسٍنيِ نَن يَ؛ ﭑ مُ ﭑ يّتّ مَسٍن شّ عِ بٍنبَيٍ بّ مِسِرَ، عٍ نُ نَ قِرَوُنَ شَ يَامَرِ بُن مَ تّمُي نَشّ؟ 28 ﭑ تَن نَن عِ بٍنبَ سُفَندِ عِسِرَيِلَ بْنسْي بِرِن تَفِ، عَ شَ قِندِ سّرّشّدُبّ رَ ﭑ مَ هْرْ مْلِنفِرَ كُي، عَ شَ تٍ ﭑ مَ سّرّشّ فَندٍ، عَ شَ سُرَيِ فَن سّرّشّ رَ، عَ نُن عَ شَ سّرّشّدُبّ دٌنمَ كُيٍ رَفٌرٌ عَ مَ ﭑ يَ عِ. عِسِرَيِلَ عٍ شَ سّرّشّ فَنشِ نَشَن بِرِن قِمَ ﭑ مَ، ﭑ عَ بِرِن قِ عِ بٍنبَ بْنسْي نَن مَ.»
29 «مُنقٍ رَ وٌ ﭑ مَ هَدِيَيٍ نُن ﭑ مَ سّرّشّيٍ يٍلٍبُمَ، ﭑ نَشٍيٍ يَمَرِشِ عٍ شَ بَ ﭑ بّ ﭑ مَ بَنشِ كُي؟ مُنقٍ رَ عِ عِ شَ دِيٍ بِنيَشِ دَنفِ ﭑ تَن نَ، عَلَكٌ وٌ شَ وٌ يّتّ رَبْرْفّ هَدِيَ سِنفٍيٍ رَ، ﭑ مَ حَمَ عِسِرَيِلَ نَشٍيٍ بَشِ؟ 30 نَ كُي، ﭑ تَن عِسِرَيِلَ مَرِفِ عَلَتَلَ شَ مَسٍنيِ نَن يَ؛ سِنفٍ ﭑ نُ بَرَ لَايِدِ تٌنفٌ وٌ بّ، وٌ شَ دٍنبَيَ نُن وٌ بٍنبَيٍ شَ دٍنبَيَ شَ ﭑ مَ وَلِ رَبَ، كْنْ يَكْسِ ﭑ بَرَ نَ نَتّ مَسَرَ، بَرِ مَ ﭑ مِشِ نَن بِنيَمَ نَشَن ﭑ بِنيَ، كْنْ نَشٍيٍ تَن ﭑ مَبٍرٍ مَ، ﭑ يَافِ نَن دُ سُمَ عٍ شُن. 31 ﭑ قَمَ نّ عِ تَن نُن عِ شَ دٍنبَيَ سّنبّ شُن نَكَنَدٍ، شّمْشِ يٌ مُ تٌمَ وٌ يَ مَ. 32 عِسِرَيِلَ شَ قٍ نَ تٍ، عِ قَمَ تْورّ سْتْدٍ ﭑ مَ بَنشِ شَ قٍ رَ. عِ شَ مِشِيٍ مُ سِمَيَ شْنكُيٍ سْتْمَ سْنْن. 33 عِ شَ مِشِ ندٍ لُمَ ﭑ مَ سّرّشّبَدٍ شَ وَلِ كُي، كْنْ نَ قِندِ مَ يَيٍ نُن تْورّ نَن نَ عِ بّ. عِ شَ مِشِيٍ مُ سِمَيَ شْنكُيٍ سْتْمَ.»
34 «قٍ نَشَن عِ شَ دِ قِرِنيِيٍ سْتْمَ، نَ نَن قِندِ مَ عِ بّ تْنشُمَ رَ؛ شٌقِنِ نُن قِنٍشَسِ بِرِن قَشَمَ لْشْي كٍرٍن نّ. 35 ﭑ سّرّشّدُبّ تِنشِنشِ ندٍ قٍنمَ، نَشَن ﭑ بْحّ نُن ﭑ شَشِلِ وَشْنقٍ رَبَمَ. ﭑ بْنسْي قِمَ نّ عَ مَ نَشَن حّرّ مَ مَسِيهُ يَ عِ، ﭑ نَشَن سُفَندِ مَ. 36 عِ بْنسْي مِشِيٍ قَمَ نّ عٍ مَفٌرٌدٍ عَ بُن مَ، عَلَكٌ عٍ شَ كْبِرِ دِ سْتْ، شَ نَ مُ، دٌنسٍ دِ. عٍ قَمَ عَ قَلَدٍ عَ بّ، ‹سّرّشّدُبّ وَلِ ندٍ قِ ﭑ مَ، عَلَكٌ ﭑ شَ ﭑ بَلٌي ندٍ سْتْ.›»