1 نَ وَشَتِ، قِلِسِتَكَيٍ نُ بَرَ عٍ شَ سْورِيٍ مَلَن سِفَقٍ رَ عِسِرَيِلَكَيٍ فٍرٍدٍ. عَكِسِ نَشَ عَ قَلَ دَوُدَ بّ، «عِ تَن نُن عِ شَ سْورِيٍ، وٌ شَ ﭑ مَلِ يِ فٍرٍ كُي.» 2 دَوُدَ نَشَ عَكِسِ يَابِ، «عِ قَمَ عَ كٌلٌندٍ ﭑ نْمَ نَشَن نَبَدٍ.» عَكِسِ نَشَ عَ قَلَ عَ بّ، «ﭑ عِ قِندِ مَ نّ ﭑ مَ كَنتَمَ رَ عَبَدَن.»

3 سَمُوٍلِ نُ بَرَ قَشَ. عِسِرَيِلَكَيٍ بِرِن عَ شَ حْنقٍ رَبَ نّ، عَ رَفَتَ رَ مَ، عَ بَرِ تَا كُي. نَ وَشَتِ سْلُ نُ بَرَ تْنيِ دْشْ كَرَ مْشْييٍ شَ وَلِ رَ، نَشٍيٍ نُ وْيّنمَ قَشَمِشِيٍ نُن حِننّيٍ رَ.

4 قِلِسِتَكَيٍ نَشَ عٍ مَلَن سُنٍمِ، سْلُ نَشَ عِسِرَيِلَكَيٍ مَلَن فِلِبٌوَ. 5 سْلُ تٌ قِلِسِتَ حَمَ تٌ، عَ بْحّ نَشَ مِنِ عَ عِ، عَ فَاشُ عَ حَاشِ رَ. 6 سْلُ نَشَ عَلَتَلَ مَشَندِ، كْنْ عَلَتَلَ مُ عَ يَابِ شِيٍ رَ، عَ مُ عَ يَابِ سّرّشّدُبّ نُن نَمِحْنمّ شُي رَ.

7 نَ كُي سْلُ نَشَ عَ شَ مِشِ ندٍيٍ شِلِ، عَ نَشّ، «وٌ سَ فِنّ سٍمَتٌي ندٍ قٍن، نَشَن قَتَ وْيّندٍ مِشِ قَشَشِيٍ رَ، عَلَكٌ عَ شَ ﭑ مَلِ.» سْلُ شَ مِشِيٍ نَشَ عَ يَابِ، «فِنّ ندٍ نَ عٍندٌرِ، نَشَن وْيّنمَ قَشَمِشِيٍ رَ.» 8 سْلُ تٌ نَ مّ، عَ نَشَ عَ دُفِ مَسَرَ عَلَكٌ مِشِ نَشَ عَ كٌلٌن عَ تَن نَ عَ رَ. عَ تَن نُن مِشِ قِرِن، عٍ نَشَ سِفَ نَ فِنّ يِرٍ كْي رَ. سْلُ نَشَ عَ قَلَ عَ بّ، «سٍ مَتٌ ﭑ بّ قَشَمِشِ ندٍ سَابُي رَ، ﭑ نَشَن شِلِ قَلَمَ عِ بّ.» 9 فِنّ نَشَ عَ يَابِ، «عِ عَ كٌلٌن سْلُ تْنيِ نَشَن دْشْشِ كَرَ مْشْي وَلِ رَ، نَشٍيٍ وْيّنمَ قَشَمِشِيٍ نُن حِننّيٍ رَ. مُنقٍ رَ عِ نَ فَنتَنيِ تٍقٍ ﭑ بّ، عِ شَ ﭑ قَشَ؟» 10 سْلُ نَشَ عَ رَكَلِ عَ بّ، «عَلَتَلَ شِلِ رَ، عِ نَشَ كْنتْقِلِ. عَ قِندِ كٌتٍ يٌ رَ، ﭑ تَن نَن عَ تٌنفٌمَ.»

11 نَ فِنّ نَشَ عَ مَشْرِن، «عِ وَ مَ وْيّنقٍ قَشَمِشِ مُندُن نَ؟» عَ نَشَ عَ يَابِ، «سَمُوٍلِ.» 12 فِنّ تٌ سَمُوٍلِ تٌ، عَ نَشَ فبٍلٍفبٍلٍ، عَ قَ عَ قَلَ سْلُ بّ، «مُنقٍ رَ عِ بَرَ ﭑ مَدَشُ؟ عِ تَن نَن يَتِ نَ سْلُ رَ!» 13 مَنفّ نَشَ عَ قَلَ عَ بّ، «هَلِ عِ مُ فَاشُ! عِ مُنسٍ تٌشِ؟» فِنّ نَشَ عَ قَلَ سْلُ بّ، «عَ لُشِ عَلْ مَلٍكّ ندٍ نَ كٍلِقٍ بْشِ مَ.» 14 عَ نَشَ عَ مَشْرِن، «عَ لَهَلّ نَ دِ؟» فِنّ نَشَ عَ يَابِ، «شَنقْرِ نَن عَ رَ، بُرُ مُسِ رَفٌرٌشِ عَ مَ.» سْلُ نَشَ عَ كٌلٌن كٍرٍن نَ عَ سَمُوٍلِ نَن عَ رَ. عَ نَشَ عَ تِفِ سِن بْشِ مَ، عَ سُيِدِ. 15 سَمُوٍلِ نَشَ عَ قَلَ سْلُ بّ، «مُنقٍ رَ عِ ﭑ تْورْشِ، ﭑ شَ مِنِ عِ مَ؟» سْلُ نَشَ عَ يَابِ، «ﭑ نَ كْنتْقِلِ بٍلٍبٍلٍ نَن كُي. قِلِسِتَكَيٍ بَرَ قَ ﭑ فٍرٍدٍ. ﭑ تَن بَرَ عَلَتَلَ شِلِ، كْنْ عَ بَرَ مّي ﭑ نَ، عَ مُ ﭑ يَابِشِ نَمِحْنمّيٍ سَابُي رَ، عَ مُ ﭑ يَابِشِ شِيٍ سَابُي رَ. ﭑ قَ عِ شِلِشِ نَ نَن مَ، عَلَكٌ عِ شَ عَ مَسٍن ﭑ بّ عَ لَنمَ ﭑ شَ نَشَن نَبَ.»

16 سَمُوٍلِ نَشَ عَ مَشْرِن، «شَ عَلَتَلَ بَرَ مّي عِ رَ، عَ بَرَ قِندِ عِ فٍرٍقَ رَ، عِ قَ ﭑ تَن مَشْرِنمَ مُنقٍ رَ؟ 17 عَلَتَلَ بَرَ قٍ رَبَ، عَلْ عَ عَ قَلَ عِ بّ كِ نَشّ ﭑ تَن سَابُي رَ. عَ بَرَ مَنفّيَ بَ عِ يِ رَ، عَ عَ سٌ دَوُدَ يِ رَ. 18 عِ تٌ تٌندِ عَلَتَلَ شُي سُشُدٍ عَمَلّكِ شَ قٍ رَ، عَ نُ شْنْشِ نَشَن مَ، عَلَتَلَ تَن نَ قٍ مْولِ نَن نِيَمَ عِ رَ تٌ. 19 عَلَتَلَ قَمَ نّ عِ تَن نُن عِسِرَيِلَ سَدٍ قِلِسِتَكَيٍ سَفٌي. تِنَ، عِ تَن نُن عِ شَ دِيٍ بِرِن لُمَ نّ ﭑ قّ مَ بٍ، عَلَتَلَ عِسِرَيِلَ شَ سْورِيٍ سَمَ نّ قِلِسِتَكَيٍ سَفٌي.»

20 نَ تّمُي سْلُ نَشَ بِرَ بْشِ فَاشُي رَ سَمُوٍلِ شَ مَسٍنيِ شَ قٍ رَ. عَ سّنبّ يٌ مُ نَ، بَرِ مَ عَ مُ نُ سٍسٍ دٌنشِ نَ لْشْي نُن نَ كْي رَ. 21 نَ فِنّ تٌ سْلُ شَ فَاشُي تٌ، عَ نَشَ عَ قَلَ عَ بّ، «تٌ تَن ﭑ بَرَ عِ شُي رَتِنمّ، هَلِ نَ نُ نْمَ قِندِدٍ قَشّ رَ ﭑ بّ. 22 يَكْسِ عِ شَ عِ تُلِ مَتِ ﭑ نَ. عِ شَ تِن ﭑ شَ دٌنسٍ ندٍ قِ عِ مَ، عَلَكٌ عِ شَ نْ سّنبّ سْتْدٍ بِيَاسِ شَ قٍ رَ.» 23 كْنْ سْلُ مُ تِن، عَ نَشّ، «ﭑ مُ ﭑ دّفٍمَ.» عَ شَ مِشِيٍ نُن نَ فِنّ نَشَ كَرَشَن، عَلَكٌ عَ شَ عَ دّفٍ. عَ رَحْنيِ عَ نَشَ تِن نَ رَ، عَ كٍلِ بْشِ مَ، عَ دْشْ سَدٍ مَ. 24 فِنّ نَشَ كٍلِ كٍرٍن نَ، عَ نَشَ عَ شَ نِنفٍ لَنمَ بْرْفّشِ قَشَ. عَ نَشَ تَامِ لّبِنِتَرٍ رَقَلَ قَرِن نُن تُرٍ رَ. 25 عَ نَشَ عَ قِ سْلُ نُن عَ شَ مِشِيٍ مَ، عٍ نَشَ عٍ دّفٍ، عٍ قَ سِفَ نَ كْي يَتِ رَ.