2
عِسِرَيِلَكَيٍ تَايٍ مَبِلِنقٍ
«نَ شَنبِ وٌن نَشَ فبِلٍن فبٍنفبٍرٍنيِ كِرَ سُشُ رَ سِفَقٍ كَلٍ بَا مَبِرِ، عَلْ عَلَتَلَ عَ مَسٍن ﭑ بّ كِ نَشّ. وٌن نَشَ شِ وُيَشِ رَبَ سٍيِرِ فٍيَيٍ رَبِلِنيِ.»
«عَلَتَلَ نَشَ عَ قَلَ ﭑ بّ، ‹وٌ بَرَ يِ فٍيَ مَبِلِن عَ فبٍ رَ. وٌ وٌ مَقِندِ سِفَقٍ رَ كْولَ مَ.› عَ نَشَ عَ قَلَ ﭑ بّ ﭑ شَ يِ يَامَرِ قِ وٌ مَ. وٌ قَمَ دَنفِدٍ سٍيِرِ بْشِ سّيتِ مَ، وٌ نفَشَكٍرٍنيِيٍ نَ دّننَشّ، عٍسَيُ بْنسْي. عٍ قَمَ نّ فَاشُدٍ وٌ يَ رَ، كْنْ وٌ وٌ يّتّ مَسُشُ عٍ فٍرٍقٍ رَ، بَرِ مَ ﭑ مُ سٍسٍ سٌمَ وٌ يِ رَ عٍ شَ بْشِ مَ، هَلِ سَنيِ تِدٍ. ﭑ بَرَ سٍيِرِ فٍيَيٍ قِ عٍسَيُ مَ. وٌ نَ وَ دٌنسٍ نُن يٍ نَشَن شْن قٌ وٌ عَ سَرَ عٍ مَ فبٍتِ رَ. وٌ مَرِفِ عَلَتَلَ بَرَ بَرَكَ سَ وٌ وَلِ قْشِ. عَ بَرَ عَ حْشْ سَ وٌ شَ قٍ شْن مَ وٌ نُ يِ فبٍنفبٍرٍنيِ عِفِرِ مَ تّمُي نَشّ. يِ حّ تٌنفٌ نَانِ بُن مَ، وٌ بِرِن نَن نُ عَ رَ. سٍسٍ شَ قٍ مُ شْرْشْ وٌ مَ.»
«وٌن نَشَ دَنفِ وٌن نفَشَكٍرٍنيِيٍ رَ يِرٍ مَكُيٍ، عٍسَيُ بْنسْي نَشَن سَبَتِشِ سٍيِرِ بْشِ مَ. وٌن مَن نَشَ دَنفِ عَرَبَ، عٍلَتَ، عٍسِيٌن فٍبٍرِ كِرَ رَ يِرٍ مَكُيٍ. نَ شَنبِ وٌن نَشَ وٌن مَقِندِ، وٌن مٌوَبَ فبٍنفبٍرٍنيِ كِرَ سُشُ.»
«عَلَتَلَ نَشَ عَ قَلَ ﭑ بّ، ‹وٌ نَشَ فٍرٍ فِرِ مٌوَبَكَيٍ مَ دٍ. وٌ نَشَ فٍرٍ تِ عٍ بّ دٍ، بَرِ مَ ﭑ مُ قَمَ سٍسٍ سٌدٍ وٌ يِ رَ عٍ شْنيِ. ﭑ بَرَ عَرِ بْشِ قِ لٌتِ مَ.›»
10 سِنفٍ رَ، عٍمِكَيٍ نَن نُ نَ عَرِ بْشِ مَ. حَمَ فبَنفبَلَنيِ نَن نُ عٍ رَ. عٍ وُيَ، عٍ قَن كُيَ عَلْ عَنَكِ بْنسْييٍ. 11 مِشِ ندٍيٍ نَشَ عٍ مَحْشُن رٍقَكَيٍ رَ، نَشٍيٍ مَنِيَ عَنَكِ بْنسْييٍ رَ، كْنْ مٌوَبَكَيٍ نُ عٍ شِلِمَ نّ عٍمِكَيٍ. 12 نَشَن قِندِ سٍيِرِ بْشِ رَ، شٌرِكَيٍ نَن سِنفٍ نُ نَ نَا. عٍسَيُ بْنسْي نَشَ عٍ مَسُشُ، عٍ عٍ قَشَ. عٍ تَن نَشَ سَبَتِ نَا. عِسِرَيِلَكَيٍ قَن قَمَ نَ مْولِ نَن نَبَدٍ بْشِ مَ عَلَتَلَ نَ دّننَشّ قِ عٍ مَ.
13 «عَلَتَلَ نَشَ عَ قَلَ ﭑ بّ، ‹يَكْسِ، وٌ كٍلِ، وٌ شَ سٍرٍدٍ شُرٍ عِفِرِ.›» وٌن نَشَ نَ رَبَ. 14 حّ تٌنفٌ سَشَن نُن سٌلٌمَسَشَن دَنفِ نّ كَبِ وٌن كٍلِ لْشْي كَدٍ سِ بَرِنٍيَ هَن وٌن فِرِ لْشْي سٍرٍدٍ شُرٍ رَ. نَ وَشَتِ كُي فٍرٍ سٌي نَشٍيٍ نُ نَ، نٍيٍ بِرِن نُ بَرَ قَشَ عَلْ عَلَتَلَ عَ رَكَلِ عٍ بّ كِ نَشّ. 15 عَلَتَلَ نَشَ عٍ تُشُنسَن هَن عٍ بِرِن نَشَ هَلَكِ.
16 نَ فٍرٍ سٌي تٌ بَرَ هَلَكِ حَمَ تَفِ، 17 عَلَتَلَ نَشَ عَ مَسٍن ﭑ بّ، 18 «وٌ قَ سِفَقٍ دَنفِدٍ مٌوَبَ نَانِنيِ نَن نَ سِفَقٍ عَرِ بْشِ مَ. 19 وٌ مَكْرّ مَ نّ عَمٌنِكَيٍ رَ. وٌ نَشَ فٍرٍ فِرِ عٍ مَ دٍ. وٌ نَشَ عٍ قٍن فٍرٍ رَ، بَرِ مَ ﭑ مُ قَمَ سٍسٍ سٌدٍ وٌ يِ رَ عٍ شَ بْشِ مَ. ﭑ نَا قِشِ لٌتِ بْنسْي نَن مَ.»
20 عٍ نُ يِ بْشِ مَحْشُنشِ رٍقَكَيٍ نَن فبٍ رَ. كَبِ تّمُي شْننَكُيٍ رٍقَكَيٍ نَن نُ سَبَتِشِ نَا. عَمٌنِكَيٍ نُ عٍ شِلِمَ نّ سَمِسُمِكَيٍ. 21 حَمَ سّنبّمَ نَن نُ لَنشِ عٍ مَ، عٍ وُيَ، عٍ مَن فبَنفبَلَن عَلْ عَنَكِ بْنسْي. كْنْ عَلَتَلَ نَشَ عٍ هَلَكِ عَمٌنِكَيٍ سَابُي رَ. نَا نَشَ قِندِ عَمٌنِكَيٍ فبٍ رَ، عٍ نَشَ سَبَتِ نَا. 22 عَلَتَلَ نَشَ نَ مْولِ رَبَ عٍسَيُ شَ دِيٍ بّ نَشٍيٍ سَبَتِشِ سٍيِرِ بْشِ مَ. عَ تٌ نُ شٌرِكَيٍ هَلَكِمَ عٍ سَابُي رَ، نَا نَشَ قِندِ عٍ فبٍ رَ. عٍ سَبَتِشِ مّننِ نّ هَن يَكْسِ. 23 نَشَن قِندِ عَوِكَيٍ تَن نَ، نَشٍيٍ نُ سَبَتِشِ تَايٍ كُي هَن فَسَ، عٍ نَشَ هَلَكِ كَقَتٌرٌكَيٍ سَابُي رَ. نَا نَشَ قِندِ كَقَتٌرٌكَيٍ فبٍ رَ، عٍ نَشَ سَبَتِ نَا. كَقَتٌرٌكَيٍ نَشَ كٍلِ كَقَتٌرٌ.
24 عَلَتَلَ نَشَ عَ مَسٍن وٌن بّ، «وٌ تِ كِرَ شْن مَ، وٌ شَ عَرِنٌن شُرٍ عِفِرِ. وٌ عَ مَتٌ، ﭑ بَرَ سِشْن عَمٌرِكَ شّسِبْن مَنفّ سٌ وٌ يِ رَ نُن عَ شَ بْشِ. يَكْسِ، وٌ نَ تٌنفٌ، وٌ عٍ فٍرٍ. 25 تٌ ﭑ قَمَ نّ وٌ شَ قٍ مَفَاشُي لُدٍ دُنِحَ مِشِ بِرِن مَ. عٍ نَ وٌ شِلِ مّ، عٍ قَمَ نّ سّرّندٍ فبِرِفبِرِ.»
سِشْن مَنفّيَ سْتْ كِ
26 «ﭑ شّيرَ شّي نّ سِشْن، شّسِبْن مَنفّ مَ، كٍلِقٍ رَ كٍدٍ مٌتِ فبٍنفبٍرٍنيِ مَ. ﭑ نَشَ يِ بْحّسَ مَسٍنيِ تِ عَ بّ، 27 ‹مُشُ وَ مَ عِ شَ بْشِ عِفِرِقٍ. مُشُ مُشُ حّرّ مَ كِرَ نَن تُن شْن مَ. مُشُ مُ سِفَمَ كْولَ مَ، مُشُ مُ سِفَمَ يِرٍقَنيِ مَ. 28 مُشُ دٌنسٍ نُن يٍ نَشَن مِنمَ، مُشُ قَمَ نّ عَ بِرِن سَرٍ قِدٍ عِ مَ فبٍتِ رَ. عَ لُ كَنسَن مُشُ شَ دَنفِ عِ شَ بْشِ مَ مُشُ سَنيِ رَ. 29 عٍسَيُ بْنسْييٍ نَشٍيٍ سَبَتِشِ سٍيِرِ بْشِ مَ، نُن مٌوَبَكَيٍ نَشٍيٍ سَبَتِشِ عَرِ بْشِ مَ، نٍيٍ نَشَ مُشُ سَفٌي سَ دَنفِقٍ رَ عٍ شَ بْشِ مَ. عِ قَن شَ مُشُ سَفٌي سَ مُشُ شَ يُرُدّن شُرٍ عِفِرِ، مُشُ شَ سٌ بْشِ مَ مُشُ مَرِفِ عَلَتَلَ دّننَشّ قِشِ مُشُ مَ.› 30 كْنْ شّسِبْن مَنفّ سِشْن نَشَ تٌندِ مُشُ سَفٌي قِدٍ دَنفِقٍ رَ عَ شَ بْشِ مَ، بَرِ مَ وٌ مَرِفِ عَلَتَلَ نُ بَرَ عَ شَشِلِ رَشْرْشْ. عَ نَشَ عَ بْحّ بَلَن عَلَكٌ عَ شَ عَ سٌ وٌ يِ رَ عَلْ وٌ عَ تٌشِ كِ نَشّ تٌ.»
31 «عَلَتَلَ نَشَ عَ قَلَ ﭑ بّ، ‹عِ بَرَ عَ تٌ، ﭑ بَرَ فّ سِشْن نُن عَ شَ بْشِ سٌدٍ عِ يِ رَ. نَا تٌنفٌ عِ فبٍ.› 32 سِشْن نُن عَ شَ حَمَ بِرِن نَشَ كٍلِ قَقٍ رَ وٌن فٍرٍدٍ يَهَسِ. 33 وٌن مَرِفِ عَلَتَلَ نَشَ عٍ سٌ وٌن يِ رَ شُننَكٍلِ كُي. وٌن نَشَ نْلَ سْتْ عٍ مَ، عَ تَن، عَ شَ دِيٍ عَ نُن عَ شَ حَمَ بِرِن. 34 وٌن نَشَ نَ تَايٍ بِرِن سُشُ، وٌن نَشَ عٍ بِرِن كَنَ. وٌن مَن نَشَ شّمّيٍ، نُن فِنّيٍ، عَ نُن دِ مّيٍ بِرِن قَشَ. وٌن مُ مِشِ يٌ لُ عَ حِحّ رَ، 35 كْنْ وٌن مُ سٍسٍ تٌنفٌ قٌ شُرُ سٍيٍ عَ نُن سٍ شْرِ نَشٍيٍ نُ نَ نَ تَايٍ كُي. 36 كٍلِ عَرٌوٍرِ عَرِنٌن شُرٍ دّ رَ، عَ نُن تَا نَشَن نَ فٍيَ لَنبَنيِ، سِفَقٍ رَ هَن فَلَدِ، تَا يٌ سّنبّ مُ دَنفِ وٌن نَ. وٌن مَرِفِ عَلَتَلَ نَشَ عَ بِرِن سٌ وٌن يِ رَ. 37 كْنْ وٌ مُ وٌ مَكْرّ عَمٌنِكَيٍ شَ بْشِ رَ، يَبٌكٌ شُرٍ دّ بِرِن، تَا نَشٍيٍ نَ فٍيَ قَرِ، عَ نُن عَلَتَلَ تْنيِ دْشْ وٌن مَ بْشِ نَشٍيٍ فٍرٍقٍ رَ.»