1 मिनु बर्खा जाक्‍मेनु, पिपपुकी लडाइ पथ ग्रूमा बाक्‍त। मिनु योआबमी लडाइ पाइबपुकी लाइश्‍शा अम्‍मोनी आन रागी कली गोरशो सेला बाक्‍त। मिनु मेको रब्‍बाह सहर पुम्‍शा, आ एर ओंथ नेल्‍ल हिरदा बाक्‍त। दाऊद चहिं यरूसलेम उइ बाक्‍माक्‍त। मिनु योआबमी रब्‍बाह सहर कली लडाइ पा खतम सेल्‍शा ग्रामाक्‍त। 2 मिनु दाऊदमी मेको आन पिप आ पिया रे सिरपेच लदा बाक्‍त। मेको सुन नाक्‍शोनु, टलेन्‍ट का बाक्‍माक्‍त। मेको सिरपेचम शुश क्‍येट लाइ‍ब हीरा यो क्‍येप्‍शो बाक्‍माक्‍त। मेको सिरपेच दाऊद कली गुक्‍त्‍‍मे बाक्‍त। दाऊदमी मेको सहर रे शुश मार मार रोइश्‍शा लदा बाक्‍त। टलेन्‍ट का ३४ किलो बाक्‍ब 3 मेको रागी ङा मुर आन कली ग्रुंइ‍शा, मेको आन कली आरा, कोदाली नु खामी गेय पपदमे बाक्‍त। मोदेंशो दाऊदमी अम्‍मोनी आन सहर नेल्‍लेमी पवा बाक्‍त। नोले दाऊद नु आ मुर नेल्‍ले यरूसलेम लेम्‍‍मा बाक्‍त।

4 मेको आ नोले पलिस्‍तीपुकी नु गेजेर सहरमी लडाइ दुम्माक्‍त। मेना हुशा ङा मुर सिब्‍बेकै माइश्‍शो सि‍प्पाइ कली सदा बाक्‍त। सिप्‍पाइ चहिं रेफाइ आ चच युइ का बाक्‍शो बाक्‍माक्‍त। पलिस्‍ती ब्रुम्‍मा बाक्‍त। १इतिहास २७:११ 5 नोले लेंशा पलिस्‍ती नु लडाइ दुम्‍माक्‍त। याइर आ तौ एल्‍हानानमी गित्त आ खिं ङा मुर गोल्‍याथ आ लोक्‍ब लाहमी कली सदा बाक्‍त। मेको आ तूतीक आ ग्‍याइक्‍तीक वा प्रोक्‍ब आन शी खोमो ठेयब बाक्‍माक्‍त। 6 मिनु नोले लेंशा गाथ सहरमी लडाइ दुम्‍माक्‍त। मेकेर लाइश्‍शो मुर का बाक्‍माक्‍त। आ गुइ नु खोइली नेल्‍लेम ६,६ ओटा ब्रेप्‍चो पाइश्‍शो नेल्‍ल पा २४ ओटा ब्रेप्‍चो पाइश्‍शो मुर का बाक्‍माक्‍त। मेको रेफाइ आ चच युइ का बाक्‍माक्‍त। 7 मेकोमी इस्राएली आन कली शुक्‍शी पवा बाक्‍त। मिनु दाऊद आ लोक्‍ब शिमेआ आ तौ योनाथनमी मेको कली सदा बाक्‍त। 8 मेको गाथ ङा लाइश्‍शो मुर आन चच युइ, रेफाइ आ मुर बाक्‍मा बाक्‍त। मिनु दाऊद नु आ मुरपुकीमी मेको आन कली सदमे बाक्‍त।