1 मिनु सैतानमी इस्राएली आन कली मरिम्‍शो पचा कली दाऊद कली आ मुर इस्राएली आन कली हिक्‍पाइक्‍मी बाक्‍त। 2 मोपतीके दाऊदम योआब नु आ कप्‍तान आन कली “बेयर-शेबा रे दान सम्‍म ङा इस्राएली आन कली हिक्‍शा, आं कली शेंचा नङ। मिनु मेकोपुकी दोशो बाक्‍मा, गो तुइक्‍चा माल्‍‍नुङ” दे अरेमी बाक्‍त। 3 तन्‍न योआबमी “परमप्रभु यावेमी आ मुर आन कली एको क्‍येङा यो सहे खेयप हिक्‍शो खोइ सोशा बोशा शुश सेलल। मेकोपुकी आं पिप इन गेय पाइब मुर मदुम्‍नीमी ङा? गे मारदे मो पचा माल्‍नीनी? गे मारदे इस्राएली आन कली दोस चाक्‍नीनी?” देंमाक्‍त। प्रस्‍थान ३०:१२ 4 तन्‍न पिपमी योआब आ लोव़ मनेना बाक्‍त। मिनु योआब लशा, इस्राएल नेल्‍ल हिरशा, यरूसलेमम लेश्‍शा जाक्‍माक्‍त। 5 मिनु योआब यरूसलेम जाक्‍शा, दाऊद कली आ हिक्‍शो मुरपुकी ओशो बाक्‍तेक्‍म, दे शेंदा बाक्‍त। मेकोमी “इस्राएलम या चलेने चाप्‍ब, लडाइ पाइब ११ लाख नु यहूदाम ४ लाख ७० हजार बाक्‍नीम” देंमाक्‍त। 6 तन्‍न योआबमी लेवी आ थर ङा मुर नु बेन्‍यामीन आ थर ङा मुर आन कली महिक्‍मी बाक्‍त। मारदे हना योआबमी पिप आ हुकुम पशो कली काइ मदाक्‍ता बाक्‍त।

7 मिनु परमप्रभु दाऊद आ पशो तशा, गाइक्‍ता बाक्‍त। मिनु इस्राएली आन कली सजाइ गेवा बाक्‍त १इतिहास २७:२४ 8 मिनु दाऊदम परमप्रभु कली “गो मोदेंशो पा ठेयब पाप पाता। मुल इन गेय पाइब आं दोस क्‍याम्‍दीन। मारदे हना गो थम मरिम्‍शो पाइब दुम्‍ती” देंमाक्‍त। 9 मिनु परमप्रभु यावेमी आ लोव़ पाइब गाद कली “गे लशा दाऊद कली 10 परमप्रभु यावेमी इन कली मार लोव़ पाइब देंशा हना ‘गो इ ङोंइती लोव़ सां वोइक्‍नुङ। मेको रे का योव़सो। मिनु मेको इ कली पाइनुङ’ देंत, मतो” देंमाक्‍त। 11 मिनु गाद दाऊद आ बाक्‍तीके जाक्‍शा, मेकोमी “परमप्रभु यावेमी इन कली लोव़ पाइब। मिनु गे लोव़ का योव़सो। 12 ‘गो इ ङोंइती लोव़ सां वोइक्‍नुङ। मेको रे का योव़सो’ देंशो बाक्‍ब। मेको लोव़ सां तेको बाक्‍नीम देंशा हना, ङोंइती ङा बर्स सां सम्‍म अन्‍काल दुम्‍तीके, नोले ङा महिना सां सम्‍म इन जोरी सत्रुमी खेदा पचा पुंइसीतीके, आन तरवारम इन कली ग्रातीके नु नेल्‍ल क्‍येङा नोले ङा परमप्रभु यावेमी आ तरवार रे नाक्‍त सां सम्‍म रागी नेल्‍लेम बेक्‍चा ङा रोइ पपाइश्‍शा मुर साइक्‍तीक। मेको लोव़ सांमी का योव़सो। परमप्रभु यावे आ स्‍वर्ग ङा गेय पाइबमी नाक्‍त सां सम्‍म इस्राएल रागीम शुश मुर आन कली साइक्‍तीक। मेको लोव़ सां बाक्‍तेक्‍म। का योव़सो। गो आं कली सोइक्‍ब कली मार देंचा माल्‍नुङ, देंनीन” देंमाक्‍त। 13 मिनु दाऊदम गाद कली “गो थम श्‍येत जाइब दुम्‍ती। परमप्रभु यावे आ गुइमी दुम्‍चा गेयीनी। मारदे हना मेको आ शिशी थम ठेयब बाक्‍ब। तन्‍न मुर आन गुइमी दुम्‍चा मगेयीनी” दे मदा बाक्‍त। 14 मोपतीके परमप्रभु यावेमी इस्राएल रागीम बेक्‍चा ङा रोइ पपाइक्‍मी बाक्‍त। मिनु ७० हजार बेक्‍मा बाक्‍त। 15 मिनु परमप्रभुमी आ स्‍वर्ग ङा गेय पाइब का यरूसलेम सहर खतम पोक्‍चा कली सोइक्‍ता बाक्‍त। तन्‍न मेकोमी खतम पोक्‍चा चिक्‍तानु, परमप्रभु यावेमी मेको खतम पोक्‍तीक तशा, शिशी पा तेक्‍गा बाक्‍त। मेकोमी खतम पोक्‍ब आ स्‍वर्ग ङा गेय पाइब कली “मुल दुम्‍त। इ गुइ तेक्‍को” दे मदा बाक्‍त। मेना परमप्रभु यावे आ स्‍वर्ग ङा गेय पाइब यबुसी ओरनान आ खला आ नेक्‍था राप्‍शा, बाक्‍शो बाक्‍माक्‍त। 16 मिनु दाऊदमी इर गे कोव़ङानु, परमप्रभु यावे आ स्‍वर्ग ङा गेय पाइब का सरीङ नु रागी आस दातेमी राप्‍शा, आ गुइमी शोइश्‍शो तरवार का यरूसलेम गे दिंशो तवा बाक्‍त। मिनु दाऊद नु मेको नु बाक्‍शो खूशोपुकी भाङग्रा फेक्‍शा खुम्‍की पा बाम्‍मा बाक्‍त। 17 मिनु दाऊदम परमप्रभु कली “मुर आन कली हिक्‍चा कली गो कका अरेतामी। गो कका पाप पा काइ मरिम्‍शो पाता। तन्‍न एको भेडापुकीम मार पामे ङा? परमप्रभु यावे, आं परमप्रभु, इन गेचा ङा श्‍येत आं कली नु आं आफ आ खिं कली दुम्‍ल। तन्‍न इन मुर आन कली मोदेंशो श्‍येत मगेन” देंमाक्‍त।

18 मिनु परमप्रभु यावे आ स्‍वर्ग ङा गेय पाइबमी गाद कली “गे दाऊद कली ‘यबुसी ओरनान आ खलामी परमप्रभु यावे कली चढ़ेतीक का सेलो’ दे मतो” देंमाक्‍त। 19 मोपतीके दाऊदमी गादम परमप्रभु यावे आ नेंमी अरेशो लोव़ खोदेंशो पवा बाक्‍त। 20 मेना ओरनान आ चेरब दांइ पा लेश्‍शा कोव़ङानु, परमप्रभु यावे आ स्‍वर्ग ङा गेय पाइब कली तवा बाक्‍त। आ नु बाक्‍शो आ ४ जना तौ चहिं ख्रुंइसमा बाक्‍त। ओरनान चहिं चेरब तुप्‍स ङा तुप्‍स बाक्‍माक्‍त। 21 दाऊद मेको आ बाक्‍तीक जाक्‍दीम्‍मेनु, ओरनानम पिप कली तशा, आ ङोंइती खुम्‍की पा बाम्‍माक्‍त। 22 मिनु दाऊदम ओरनान कली “एको खला ङा रू परमप्रभु यावे कली चढ़ेतीक का सेल्‍चा कली गेयी। मेको गिश बाक्‍मे, मेको ङा क्‍येट गेनुङ। मुर आन कली गेशो बेक्‍तीक रोइ नाइक्‍सेक्‍ल” देंमाक्‍त। 23 मिनु ओरनानमी दाऊद कली “मेको ताक्‍कीन। हजुर, पिपम मार पचा दाक्‍नीनी, मेको पने। चोशा चढ़ेचा कली ब्‍यफपुकी गेनुङ। शी कली दांइ पशो शी बाक्‍ब। अन्‍न चढ़ेचा कली चेरब बाक्‍ब। गो मो गेता” देंमाक्‍त। 24 तन्‍न पिप दाऊदमी ओरनान कली “ममाइ, गो नेल्‍ल गिश बाक्‍मे मिश क्‍येट थाप्‍नुङ। गो मोशा इ मार मार ताक्‍शा परमप्रभु यावे कली मचढ़े‍नुङ” देंमाक्‍त। 25 मोपतीके दाऊदमी ओरनान कली मेको रू ङा ६ सहे सुन के शेकेल नाक्‍शा गेवा बाक्‍त। सेकेल का ११.५ ग्राम ङा चांदी के क्‍येट बाक्‍ब। 26 मिनु दाऊदम मेकेर परमप्रभु यावे कली चढ़ेतीक का सेला बाक्‍त। मिनु चोशा चढ़ेतीक नु दुशा बाक्‍चा आ पर्बम चढ़ेतीक चढ़ेवा बाक्‍त। मिनु परमप्रभु यावे आ नें थिशा पुना बाक्‍त। परमप्रभु यावेमी सरीङ रे चोशा चढ़ेतीके तारी मी तोक्‍शा लोव़ लेत्‍ता बाक्‍त। १राजा १८:२४ 27 मिनु परमप्रभु यावेमी आ स्‍वर्ग ङा गेय पाइब कली “इ तरवार खोतम पिप्‍तो” दे मदा बाक्‍त।

28 मेना दाऊदम परमप्रभु यावेम यबुसी ओरनान आ खलाम आ लोव़ लेत्‍ताक्‍यी, दे तुइश्‍शा मेकेर चढ़ेवा बाक्‍त। 29 मोसाम गोरशो रागीम सेल्‍शो परमप्रभु यावे आ बाक्‍तीक नु चढ़ेतीके मेना सम्‍म गिबोन इर ङा पूजा पतीकेम बाक्‍शो बाक्‍माक्‍त। १राजा ३:४; २इतिहास १:३,६ 30 तन्‍न दाऊद परमप्रभु कली पुंइचा मेकेर लने मचाप्‍शो बाक्‍माक्‍त। मारदे हना परमप्रभु यावे आ स्‍वर्ग ङा गेय पाइब आ तरवार क्‍येङा हिंमाक्‍त।