1 मिनु सामुएल एली आ देंशो टिशा, परमप्रभु यावे आ गेय पना पन बाक्‍माक्‍त। मेना परमप्रभु यावे आ लोव़ शुश मनेंसीबाक्‍माक्‍त। मिनु ततीक यो शुश मतांइसीबाक्‍माक्‍त। आमोस ८:११ 2 मिनु काबु नाक्‍दो एली आ इप्‍तीकेमी गोल्‍शा बाक्‍माक्‍त। आ मिक्‍च ब्राब्रा दुम्‍शा, रिम्‍शो पा तने मचाप्‍ब दुम्‍शो बाक्‍माक्‍त। 3 मिनु सामुएल परमप्रभु यावे आ ताम्‍बु ङा कबल पशो सन्‍दोस आ नेक्‍था इप्‍शो बाक्‍माक्‍त। मेना परमप्रभु आ बत्ती मकाप्‍शो बाक्‍माक्‍त। गन्‍ती ७:८९ 4 मिनु परमप्रभु यावेमी “सामुएल, सामुएल” दे ब्रेत्‍ता बाक्‍त। मिनु सामुएलम “गो एक बाक्‍ती” देंमाक्‍त। 5 मिनु एली आ बाक्‍तीकेम दोरशा लशा “गे आं कली ब्रेत्‍ताक्‍यीनी। गो एक बाक्‍ती” देंमाक्‍त। मिनु एलीमी “गो इ कली मब्रेत्‍तन, लावो। इपो” दे मदा बाक्‍त। मिनु मेको लशा इम्‍माक्‍त। 6 मिनु परमप्रभु यावेम लेंशा “सामुएल” दे ब्रेम्‍माक्‍त। मिनु मेको बोक्‍शा एली आ बाक्‍तीक लमाक्‍त। मिनु मेकोमी “गो एक बाक्‍ती। गे आं कली ब्रेत्‍ताक्‍यीनी” देंमाक्‍त। मिनु एलीमी “आं तौ, गो इ कली मब्रेत्‍तन। लावो। इपो” दे मदा बाक्‍त। 7 मेना सम्‍म सामुएलम परमप्रभु यावे कली मतुइश्‍शो बाक्‍माक्‍त। परमप्रभु यावे आ लोव़ मेको कली मतुइक्‍पाइश्‍शो बाक्‍माक्‍त। 8 मिनु परमप्रभु यावेमी मेको कली सां खेयप ब्रेम्‍माक्‍त। मिनु मेको लेंशा एली आ बाक्‍तीक लशा “गो एक बाक्‍ती। गे आं कली ब्रेत्‍ताक्‍यीनी” देंमाक्‍त। मेना एलीमी “परमप्रभु यावेम एको आल कली ब्रेत्‍ता बाक्‍त” दे तुइक्‍ता बाक्‍त। 9 मिनु मेकोमी सामुएल कली “लशा, गोल्‍शा, बाक्‍को। मेकोम लेंशा ब्रेत्‍ताक्‍व हना ‘परमप्रभु यावे, लोव़ पने। इन गेय पाइबम नेंशो बाक्‍नुङ’ देनो” दे मदा बाक्‍त। मिनु सामुएल लशा, आ इप्‍तीकेम गोल्‍शा, बाक्‍माक्‍त।

10 मिनु परमप्रभु यावे मेकेर जाक्‍शा, राप्‍शा, ङोंइती ङा खोदेंशो पा “सामुएल, सामुएल” दे ब्रेम्‍माक्‍त। मिनु सामुएलमी “देनीन, इन गेय पाइबम नेंशो बाक्‍नुङ” देंमाक्‍त। 11 मिनु परमप्रभु यावेम सामुएल कली “गो इस्राएलमी रीब पा गेय का पाइनुङ। मेको आ पर्बम नेंबपुकी शुश हिंनीम। 12 मेको नाक्‍ती गो एली नु आ खिं ङा मुर आन कली आं देंशो नेल्‍ल पाइनुङ। 13 मारदे हना गो मेको कली ‘गो इ खिं ङा मुर आन कली गेना हना यो सजाइ गेनुङ। मारदे हना एलीमी आ तौ निक्‍शीमी मरिम्‍शो पशो तुइश्‍शा यो, मेको आस कली मतेक्‍ग। १सामुएल २:२७-३६ 14 मोपतीके गो एली आ खिं ङा मुर आन पर्बम कसम जशा, एली आ खिं ङा मुर आन मरिम्‍शो पशो मक्‍याम्‍सीब। मेको मारेइ मारेइ चढ़ेशोमी मक्‍याम्‍सीब’ देंशो बाक्‍नुङ” देंमाक्‍त।

15 मिनु सामुएल नां सोव़म सम्‍म इम्‍माक्‍त। मिनु बोक्‍शा परमप्रभु यावे आ खिं ङा लाप्‍चो रोक्‍गा बाक्‍त। मिनु मेकोम परमप्रभु यावे आ देंशो नु कोंइशो लोव़ एली कली शेंचा हिंमाक्‍त। 16 मिनु एलीम सामुएल कली ब्रेश्‍शा “ए आं तौ, सामुएल” देंमाक्‍त। मिनु मेकोमी “गो एक बाक्‍ती” देंमाक्‍त। 17 मिनु एलीमी “मेकोमी इ कली मार देंमे? आं कली मेको नेल्‍ल मख्रुइक्‍थु, देनो। मेकोम इ कली देंशो लोव़ का सम्‍म यो ख्रुइक्‍ताक्‍वी हना, परमप्रभुम इ कली थम ठेयब सजाइ गेवल” देंमाक्‍त। 18 मिनु सामुएलम परमप्रभु यावे आ देंशो लोव़ नेल्‍ल शेंदा बाक्‍त। तेकोइ लोव़ मख्रुइक्‍ता बाक्‍त। मिनु एलीमी “मेको परमप्रभु यावे बाक्‍ब। मेकोम आ दाक्‍शो पवल” देंमाक्‍त। २सामुएल १५:२६

19 मिनु सामुएल कोल्‍ना कोल्‍न लमाक्‍त। परमप्रभु यावे मेको नु बाक्‍माक्‍त। मिनु मेकोम आ लोव़ नेल्‍ल खबा बाक्‍त। 20 मिनु दान रे बेयर-शेबा सम्‍म ङा इस्राएली नेल्‍लेमी सामुएल परमप्रभु यावे आ लोव़ पाइब दुम्‍माक्‍त, दे तुइक्‍तमे बाक्‍त। 21 मिनु परमप्रभु यावेमी शिलोम आंम कली तुइक्‍पांइसीन सीन बाक्‍माक्‍त। मारदे हना परमप्रभु यावेमी सामुएल कली आ लोव़ नेंपदा बाक्‍त।