4
पलिस्तीपुकीमी लडाइ पशो
1 मिनु सामुएल आ लोव़ नेल्ल इस्राएलम ब्रमाक्त। मेना पलिस्ती इस्राएली नु लडाइ पचा कली लशो बाक्मा बाक्त। इस्राएलीपुकीम एबेन-एजेरमी आन बाक्तीक सेल्मे बाक्त। मिनु पलिस्तीपुकीम अफेकमी आन बाक्तीक सेल्मे बाक्त। यहोसु १५:५३ 2 मिनु पलिस्तीपुकी इस्राएली आन ङोंइती लडाइ पचा कली गारशा, बाक्मा बाक्त। मिनु लडाइ ठेयब दुम्शा, इस्राएलीपुकी ब्रुमा बाक्त। पलिस्तीपुकीम मेकेर ४ हजार खोइ इस्राएली सदमे बाक्त। 3 मिनु लडाइ पाइब आन बाक्तीके लेश्शा जाक्मानु, इस्राएली आन खाल्पापुकीमी “मुलाक्ती मारदे परमप्रभु यावेमी आंइ कली पलिस्ती नु ब्रुपदा? गो शिलो रे परमप्रभु यावे आ कबल पशो सन्दोस एक चाक्य। मो पाइतय हना परमप्रभु यावे गोपुकी नु बाक्शा, इं जोरी सत्रु रे प्रोंइब” देंमा बाक्त। प्रस्थान २५:१०; यहोसु ३:६,११ 4 मोपतीके मुरपुकीमी शिलोम मुर सोइक्तमे बाक्त। मिनु करूब आस दातेम बाक्ब मुर नेल्ल आन परमप्रभु यावे आ कबल पशो सन्दोस चाक्गमे बाक्त। मिनु एली आ तौ होफ्नी नु फिनेहास परमप्रभु आ कबल पशो सन्दोस नु बाक्सा बाक्त। प्रस्थान २५:२२; २सामुएल ६:२ 5 मिनु परमप्रभु यावे आ कबल पशो सन्दोस लडाइ पाइब आन बाक्तीकेम चाक्ग्मेनु, इस्राएली नेल्ल ठेयब सेंदा पा ग्येरशा रेयके पामे बाक्त। मिनु मेको आन रेयके पशो सेंदामी रागी नेल्ल मुरदा बाक्त। 6 मिनु पलिस्तीपुकीम मेको ग्येरशो सेंदा नेंशा “हिब्रू आन बाक्तीकेम मार दुम्मे? मार रेयके नेंसे?” दे हिल्लो पमुमा बाक्त। मिनु परमप्रभु यावे आ कबल पशो सन्दोस आन बाक्तीकेमी चाक्तेक्म, दे तुइक्तमे बाक्त। 7 मिनु पलिस्तीपुकी हिंशा “परमप्रभु मेको आन बाक्तीकेम जाक्त। 8 आबी, मुल गो बेक्नय। मो देंशो ङोंइती गेनायो मदुम्शो बाक्त” देंमा बाक्त। “आबी, सुम आंइ कली मेको शुश सक्ति पाइश्शो परमप्रभु रे प्रोंइबा? मेकोम इजीप्ती आन कली श्येत गेशा गोरशो रागीम बेक्तीक रोइ पपाइश्शा साइश्शो बाक्त। 9 गे पलिस्तीपुकी महिनीन। बोल्यो दुमीन। मेकोपुकी दोपा इं वाइल दुम्मा, मोपा गेपुकी यो हिब्रू आन वाइल मदुम्चा ङा पा, इन थुं लुक्च मलपाइक्थु, लडाइ पने। बोल्यो दुम्शा, लडाइ पने” देंमा बाक्त। न्यायाधीस १३:१ 10 मिनु पलिस्तीपुकीम लडाइ पामे बाक्त। मिनु इस्राएलीपुकी ब्रुशा, आन आन ताम्बुम प्रोक्मा बाक्त। मेको लडाइम शुश मुर साइक्चा पुंइसमा बाक्त। खोइलीम गाक्ब ३० हजार लडाइ पाइबपुकी बेक्मा बाक्त। 11 मिनु परमप्रभु आ कबल पशो सन्दोस रोइश्शा, एली आ तौ होफ्नी नु फिनेहास आस कली यो सदमे बाक्त। १सामुएल २:३४
एली बेक्शो
12 मिनु मेको नाक्ती बेन्यामीन आ थर ङा मुर का लडाइ पतीक रे प्रोक्शा, खाक्शो वा फेक्सीशा, आ पियाम फुरक फुंइसीशा, दोरशा शिलोम जाक्माक्त। 13 मेको जाक्मेनु, एली आ नित्तीकेम निश्शा, लां कोव़शा बाक्शो बाक्माक्त। मारदे हना परमप्रभु आ कबल पशो सन्दोस आ पर्बम थाम्पा सुर्ता पवा बाक्त। मिनु मेको मुर दोरशा, जाक्शा सहर ङा मुर नेल्ल आन कली मार दुम्मे, मेको नेल्ल शेंदा बाक्त। मिनु सहर ङा मुर नेल्ल ग्रीशा वाइ ब्रेम्मा बाक्त।
14 मिनु एलीम आन वाइ ब्रेश्शो नेंशा “एको मार रेयके बाक्मे” देंमाक्त। मेको मुर दोरोर पा दोरशा, एली आ बाक्तीक जाक्शा, लोव़ नेल्ल शेंदा बाक्त। 15 मेना एली ९८ बर्स दुम्शो बाक्माक्त। मिनु मिक्च मताइब दुम्शो बाक्माक्त। १सामुएल ३:२ 16 मिनु मेको मुरुम मेको कली “गो लडाइ रे नक जाक्ती। गो लडाइ रे प्रोक्शा जाक्ती” देंमाक्त। मिनु एलीम “ए, आं तौ, मार दुम्मे” दे हिल्लो पवा बाक्त। 17 मिनु मेको दोरशा जाक्बमी “इस्राएली पलिस्ती आन क्येङा प्रोक्तेक्म। लडाइ पाइब शुश साइक्चा पुंइसाक्म। इन तौ होफ्नी नु फिनेहास निम्फा साइक्चा पुंइसाक्स। मिनु परमप्रभु आ कबल पशो सन्दोस यो रोइक्ताक्म” देंमाक्त। 18 मिनु मेकोमी परमप्रभु आ कबल पशो सन्दोस आ पर्बम लोव़ पवानु, एली ठेयब लाप्चो आ नेक्था बाक्शो आ नित्तीक रे नोले गे गोल्माक्त। मिनु आ शुर जिक्शा, मेको बेक्माक्त। मारदे हना मेको खूशो नु ठेयब रां पाइश्शो मुर बाक्माक्त। मेकोम ४० बर्स सम्म इस्राएली आन कली निसाफ पशो बाक्माक्त।
19 मेको आ चाइमी, फिनेहास आ मीशेमी कोव़ज कुरशो बाक्माक्त। मिनु आ आल थिची ना दुम्शो बाक्माक्त। मिनु मेकोमी परमप्रभु आ कबल पशो सन्दोस रोइश्शा योल्शो नु आ शिउ नु आ वोंइश बेक्शो नेंशा, आ आल थितीक रोइम जेत्ता बाक्त। मिनु गोल्शा आल थिवा बाक्त। 20 मिनु मेको बेक्चा चिक्तानु, आ वारच पाइब मीश मुरुम “इ थुं ग्येत्थ लुक्च मदुमो। गे तौ का थिप्तीवी” दे मदा बाक्त। तन्न मेकोम लोव़ मलेत्ता बाक्त। मेकोम आ नोफा मदाइक्ता बाक्त। उत्पत्ती ३५:१७ 21 मिनु मेकोमी आल आ नें इकाबोद वोदा बाक्त। मेको आ अर्थ “परमप्रभु आ छेङछेङ इस्राएल रे जाम्त” देंशो बाक्माक्त। मारदे हना परमप्रभु आ कबल पशो सन्दोस रोइश्शो नु आ शिउ नु आ वोंइश बेक्शो मिम्शा इकाबोद आ अर्थ “इस्राएल ङा छेङछेङ जाम्त” देंशो बाक्त१सामुएल १४:३; भजन संग्रह ७८:६१ 22 “इस्राएल ङा छेङछेङ जाम्त। मारदे हना परमप्रभु आ कबल पशो सन्दोस रोंइसाक्व” देंमाक्त।