1 मिनु इस्राएली नेल्‍ल एलीम रे लशा, सीन माइश्‍शो गोरशो रागी जाक्‍दीत्‍तेक्‍म। सीन माइश्‍शो गोरशो रागी एलीम नु सीनै डांडा आस दातेमी बाक्‍ब। इजीप्‍त रागी रे गाक्‍शा नोले मेकेर आबीब आ नोले ङा महिना ङा १५ नाक्‍तीम जाक्‍दीत्‍तेक्‍म। 2 मिनु इस्राएली नेल्‍ल मोसा नु हारून आस कली तशा गाइश्‍शा, प्रस्‍थान १७:२-३ 3 “इजीप्‍त रागी उइ परमप्रभु यावेमी आंइ कली सद हना, रिम्‍शो दुम वा। मेकेर श्‍ये नु शोब्‍ले शुश बाक्‍त। गे आंइ कली जचा मगेथु, साइक्‍चा कली एको गोरशो रागीमी चाक्‍तीसी” दे गन गन पाम्‍तेक्‍म। प्रस्‍थान १४:११

4 मिनु परमप्रभु यावेमी मोसा कली “नेनो, गो इन कली रेउ यिशो खोदेंशो पा सरीङ रे शोब्‍ले यिपाइक्‍नुङ। मिनु मुरपुकीम नाक्‍त किंत किंत गुप्‍चा माल्‍नीम। खेयप का गुप्‍मेनु, नाक्‍त का कली ला गुप्‍चा माल्‍नीमी। आं अरेशो लोव़ पाइबाक्‍मा कों, मपाइबाक्‍मा, गो मेको आन कली नाक्‍नुङ। प्रस्‍थान १६:१५; उत्‍पत्ती २२:१ 5 मुरुमी सुक्रबार आन गुप्‍शो शोब्‍ले नाक्‍त का कली ठीक पाम्‍तेक्‍म हना, नाक्‍त का कली गुप्‍शो यो, नाक्‍त निक्‍शी कली ठीक दुम्‍ब” देंत। 6 मिनु मोसा नु हारूनम इस्राएली आन कली “परमप्रभु यावेमी इन कली इजीप्‍त रागी रे प्रोंइता, दे आपो नाक्‍दो लेंशा मिम्‍पाइक्‍ब। 7 सुनी कना गे परमप्रभु यावे आ छेङछेङ ग्रूशो ताइनीनी। मारदे हना मेकोमी इन परमप्रभु यावे कली गन गन पशो तुइक्‍ताक्‍व। गो निक्‍शी सु नस्‍कु ङा? गे आंस पर्बम गाइक्‍नीनी?” देंताक्‍स। 8 मिनु मोसामी इस्राएली आन कली “परमप्रभु यावेमी आपो नाक्‍दो इन कली श्‍ये गेब, सुनी कना रूथ्री शोब्‍ले गेब, इन गन गन पशो लोव़ नेंतु, दे तुइक्‍तीन। गो निक्‍शी सु नस्‍कु ङा? इन गन गन पशो आंस कली ममाइ, परमप्रभु यावे नु कका गाइक्‍ताक्‍नी दे तुइक्‍तीन” देंत। 9 मिनु मोसामी हारून कली “गे मुर नेल्‍ल आन कली ‘परमप्रभु यावे आ ङोंइती जाक्‍कीन। मारदे हना मेकोमी इन गन गन पशो नेंतु’ देंचा माल्‍नेवे” देंत। 10 मिनु हारूनमी इस्राएली नेल्‍ल आन कली लोव़ पवानु, मेकोपुकी गोरशो रागी गे कोव़तेक्‍म। मिनु मेकेर गोस्‍सुमी परमप्रभु यावे आ छेङछेङ ग्रूशो ताम्‍तेक्‍म। गन्‍ती १२:५; गन्‍ती १४:१०; गन्‍ती १६:१९

11 मिनु परमप्रभु यावेमी मोसा कली 12 “गो इस्राएली आन गन गन पा पशो लोव़ नेंता। गे मेको आन कली ‘आपो नाक्‍दो श्‍ये ब्‍वाइनीनी। मिनु सुनी कना रूथ्री शोब्‍ले जाइनीनी। गो परमप्रभु यावे, इन परमप्रभु नङ, दे गे तुइक्‍नीनी’ दे माइक्‍मी” देंत।

13 मिनु नाक्‍दो बटटाइ ग्रूमा बाक्‍त। मिनु इस्राएली आन बाक्‍तीक नेल्‍ल सुम्‍मे बाक्‍त। मिनु सुनी कना आन बाक्‍तीकेमी शुश सीत यिशो बाक्‍माक्‍त। गन्‍ती ११:३१ 14 मिनु सुनी कना सीत मजाम्‍म सम्‍म गोरशो रागी ङा खपीम फुरश खोदेंशो पा आइक्‍च गेडा बाक्‍त। 15 इस्राएलीपुकीमी मेको तशा “मार में?” देंमुम्‍तेक्‍म। मारदे हना मार बाक्‍मे, मतुइक्‍तम। मिनु मोसामी मेको आन कली “परमप्रभु यावेमी इन कली गेशो मन्‍ना शोब्‍ले एकोन बाक्‍ब। प्रस्‍थान १६:४; ब्‍यवस्‍था ८:३; यूहन्‍ना ६:३१; १कोरिन्‍थी १०:३ 16 परमप्रभु यावे आ अरेशो लोव़ मार बाक्‍ब देंशा हना, इन मुर नेल्‍लेमी गिश जने चाप्‍नीमी, मिश गुपीन। इन ताम्‍बुमी गिश जना मुर बाक्‍नीमी, मिश गोमेर गुप्‍चा माल्‍नीनी” दे इस्राएली आन कली देंत। गोमेर का २ लिटर कि ४ माना खोदेंशो बाक्‍ब। 17 मोसामी इस्राएली आन कली दोदेंशो देंमे, मोदेंशो पाम्‍तेक्‍म। का निक्‍शीमी शुश, का निक्‍शीमी इच्‍कका ला गुप्‍तेक्‍म। 18 तन्‍न पुक्‍ग‍मेनु, मेको शुश गुप्‍ब नु इच्‍कका ला गुप्‍ब नेल्‍ल आन के उइक्‍थ उइक्‍थ दुम्‍माक्‍त। नेल्‍लेमी गिश जचा दाक्‍तमे, मिश गुप्‍तेक्‍म। २कोरिन्‍थी ८:१५

19 मिनु मोसामी मेको आन कली “दीसा सुनी सम्‍म सुइमी मारेइ हेंचा मदुम्‍ब” दे माइक्‍तीमी। प्रस्‍थान १६:४; मत्ती ६:३४; लूका ११:३ 20 तन्‍न मेकोपुकीमी मोसा आ देंशो मटीम। मिनु का निक्‍शीमी मेको मन्‍ना सुनी सम्‍म हेंदमे बाक्‍त। मिनु लुस्‍पु जोल्‍शा, शुश रिना पाइक्‍तु। मिनु मोसा शुश गाइक्‍ताक्‍व। 21 मिनु गिश माल्‍दमे, सुनी सुनी गुप्‍तेक्‍म। नां चोक्‍तानु, मेको यत।

22 मिनु सुक्रबार नाक्‍ती मुरपुकीम मुर का कली गोमेर निक्‍‍निक्‍शी मन्‍ना गुप्‍तेक्‍म। इस्राएली आन कली कोव़ब मुरपुकीमी मो पाम्‍तेक्‍म दे मोसा कली देंतेक्‍म। गोमेर का २ लिटर कि ४ माना खोदेंशो बाक्‍ब। 23 मिनु मेकोमी “परमप्रभु यावेमी इन कली गे मार पचा माल्‍नीनी, मेको शेंशो बाक्‍ब। मारदे हना दीसा परमप्रभु यावे कली मिम्‍शा नाइक्‍तीक नाक्‍ती बाक्‍ब। मोपतीके मुलाक्‍त माल्‍शो जचा थोव़क क्‍येने चोने। लीशो चहिं दीसा सुनी सम्‍म हेंचा दुम्‍ब” देंत। उत्‍पत्ती २:२-३ 24 मिनु मोसा आ देंशो खोदेंशो पा आ दीसा सम्‍म हेंताक्‍म। मिनु मेको रिना मपाइक्‍थु, लुस्‍पु यो मजो‍ल।

25 मिनु मोसामी “गे मुलाक्‍ती जने। मारदे हना परमप्रभु यावे आ नाइक्‍तीक नाक्‍ती बाक्‍ब। मुलाक्‍ती लाङगाम मारेइ मथिंसीब। 26 गे ६ नाक्‍त गुप्‍चा माल्‍नीनी। ६ नाक्‍त आ दीसा ङा नाक्‍त मारेइ मथिंसीब। मारदे हना नाइक्‍तीक नाक्‍त बाक्‍ब” देंत। 27 मिनु सन्‍चरबार नाइक्‍तीक नाक्‍त का निक्‍शी मुर मन्‍ना गुप्‍थ लाङगा ग्रूमानु, मारेइ मथिदेम। 28 मिनु परमप्रभु यावेमी मोसा कली “गेपुकी आं शेंशो नु आं अरेशो गेना सम्‍म मटीनीनी? 29 नोफा दाइश्‍शा नेनीन ‘परमप्रभु यावेमी इन कली सन्‍चरबार नाइक्‍तीक नाक्‍ती गेप्‍तु। मोपतीके सुक्रबार इन कली नाक्‍त निक्‍शी कली जचा थोव़क गेब। मिनु नाइक्‍तीक नाक्‍ती इन बाक्‍तीक बाक्‍तीकेमी बाक्‍कीन। इन खिं रे लाङगा मलने’ दे मुर आन कली देनो” देंत। 30 मिनु मुरपुकी सन्‍चरबार नाक्‍ती नांइसाक्‍म। 31 मिनु इस्राएलीपुकीम मेको गेडा कली मन्‍ना दे नें वोइक्‍तेक्‍म। मेको बुश धन्‍या वांचेर खोदेंशो बाक्‍त। मेको खुदोमी सेल्‍शो शोब्‍ले खोदेंशो पा ब्रोव़माक्‍त।

32 मिनु मोसामी “परमप्रभु यावे आ अरेशो लोव़ मार बाक्‍त देंशा हना, मेकोमी ‘मेको जचा थोव़क गोमेर का हेंचा माल्‍नीनी। इन कली इजीप्‍त रागी रे प्रोंइशा, चाक्‍गानु, गोरशो रागीमी गेशो जचा थोव़क मेको बाक्‍ब दे शुश पाला ङा मुर आन कली कोंइचा कली हेंदो। गो इन कली इजीप्‍त रे गोरशो रागीमी चाक्‍शा, दोपा थुलु, मेको नेल्‍लेमी तामेक्‍ल’ देंत” देंत। गोमेर का इस्राएली आन अन्‍न पुक्‍तीके का बाक्‍त। मेको २ लिटर रिक्‍ब बाक्‍त। मिनु ओमेर का ४ माना खोदेंशो बाक्‍ब। 33 मिनु मोसामी हारून कली “बोस का लतो। मिनु ओमेर का मन्‍ना मेकेर कुर पावो। मेको नेल्‍ल पाला ङा मुरपुकीम तचा ङा पा परमप्रभु यावे आ ङोंइती वोतो” देंत। हिब्रू ९:४ 34 परमप्रभु यावेमी मोसा कली दोपा देंमे, मोपा हारूनमी कबल पशो सन्‍दोस आ ङोंइती वोइक्‍तु। 35 मिनु इस्राएलीपुकीमी ४० बर्स सम्‍म मन्‍ना जाम्‍तेक्‍म। मुर बाक्‍तीक कनान रागी ङा सांद मजाक्‍मा सम्‍म मेको जाम्‍तेक्‍म। यहोसु ५:१२ 36 गोमेर का एफाह ङा १० भाग बाक्‍ब। एफाह का ठेयब पुक्‍तीके बाक्‍ब।