1 मिनु इस्राएली नेल्‍ल सीन माइश्‍शो गोरशो रागी रे गाक्‍शा, परमप्रभु यावे आ देंशो बिश्‍शा, रेफीदीम माइश्‍शोमी बाक्‍तेक्‍म। मेकेर चहिं तूचा ब्‍वाक्‍कु मथिदम। गन्‍ती ३३:१२-१४ 2 मोपतीके “मोसामी आंइ कली मरिम्‍शो लां कोंइब” दे गाइश्‍शा, मोसा कली “आंइ कली तूचा ब्‍वाक्‍कु गेकी” दे जिचा पोक्‍तेक्‍म। मिनु मोसामी मेको आन कली “गे आं कली मारदे जिचा तोइनीनी? मारदे परमप्रभु यावे सक्ति पाइश्‍शो बाक्‍ब, दे थमा मसुइक्‍नीनी?” देंत। ब्‍यवस्‍था ६:१६ 3 मिनु मुरपुकी ब्‍वाक्‍कु तूतू दाक्‍शा, गाइक्‍ताक्‍म। मेकोपुकीमी मोसा कली “गे मारदे आंइ कली इजीप्‍त रागी प्रोंइपाइय्‍यीकी? आंइ कली, आंइ आल आन कली, आंइ बस्‍तु भाव आन कली तूचा ब्‍वाक्‍कु मबा, आंइ कली बेक्‍पाइक्‍चा कली इजीप्‍त प्रोंइपाइय्‍यीकी?” देंतेक्‍म। प्रस्‍थान १५:२४; प्रस्‍थान १६:२; गन्‍ती १४:-; गन्‍ती १७:६-२८ 4 मो देंमानु, मोसामी परमप्रभु यावे कली “गो एको मुर आन कली मार पाइनुङा? आं कली फुल्‍लु आप्‍शा, साइक्‍चा चिक्‍तायीमी। मुल मार पङ?” देंत। गन्‍ती १४:१० 5 मिनु परमप्रभु यावेमी मोसा कली “इस्राएल ङा खाल्‍पा आन कली लाइश्‍शा, इस्राएली आन ङोंइती गाक्‍को। नील खोला तुप्‍शो कोक्‍के यो लाइश्‍शा लावो। प्रस्‍थान ७:२० 6 गो होरेब माइश्‍शो डांडा आ नेक्‍था सेरथे फुल्‍लु तार इ ङोंइती बाक्‍नुङ। मिनु गे मेको सेरथे फुल्‍लु तुप्‍चा माल्‍नेवे। मिनु, सेरथे फुल्‍लु रे ब्‍वाक्‍कु यीब। मिनु मुरपुकीम तूने चाप्‍नीम” देंत। मिनु इस्राएली आन खाल्‍पा आन ङोंइती मोसाम मो पाप्‍तु। गन्‍ती २०:११; १कोरिन्‍थी १०:४ 7 मिनु मोसामी मेको सेरथे फुल्‍लु बाक्‍तीक कली मास्‍साह नु मेरीबा नें वोइक्‍तु। मारदे हना इस्राएलीपुकीमी परमप्रभु यावे कली नाक्‍शा गाइश्‍शा “परमप्रभु यावे आंइ दातेमी बाक्‍ब” दे थमा मसुदम। भजन संग्रह ९५:८-९; मीका ३:११

8 मिनु अमालेकी रेफीदीमम जाक्‍शा, इस्राएली नु लडाइ पाम्‍तेक्‍म। उत्‍पत्ती ३६:१२-१६ 9 मिनु मोसामी यहोसु कली “इं मुरपुकी रे योव़शा, अमालेकी नु लडाइ पथ लावो। गो परमप्रभु आ कोक्‍के शेशा, दीसा मेको डांडा तार राप्‍शा बाक्‍नुङ” देंत। गन्‍ती १३:८,१६ 10 मिनु यहोसुमी मोसाम देंशो खोदेंशो पा अमालेकी नु लडाइ पाप्‍तु। मोसा, हारून नु हुर चहिं मेको डांडा ङोंइसाक्‍म। प्रस्‍थान २४:१४ 11 मोसामी आ गुइ पोक्‍गानु, इस्राएलीपुकी ग्रातेक्‍म। आ गुइ तोक्‍गानु, अमालेकीपुकी ग्रातेक्‍म। 12 मिनु मोसा आ गुइ योक्‍तीके हारून नु हुरमी फुल्‍लु का थांइशा, मेको तारी निप्‍पाइक्‍ताक्‍स। मिनु मोसा आ गुइ तिक्‍शा, वोइक्‍ताक्‍स। मोदेंशो पा का ग्‍युरा गे, का पेरा गे बाक्‍शा, नां मपेरदा सम्‍म गुइ पोक्‍स ङा पोक्‍स बाक्‍ताक्‍स। 13 मिनु यहोसु नु आ मुरुमी अमालेक नु आ मुर आन कली ग्राशा, तरवारम साइक्‍तेक्‍म।

14 मिनु परमप्रभु यावेमी मोसा कली “एको लडाइ गेना हना यो मिम्‍चा कली किताबम ब्रेक्‍तो। गो अमालेकी आन कली रागी रागी रे क्‍याम्‍नुङमी, दे यहोसु कली मिम्‍पतो” देंत। ब्‍यवस्‍था २५:१७-१९; १सामुएल १५:२-३ 15 मिनु मोसामी चढ़ेतीक का सेल्‍शा “परमप्रभु यावे आं छेदर बाक्‍ब” दे नें वोइक्‍तु। 16 मिनु मेकोमी “यावे आ नित्‍तीक गे इन गुइ पोक्‍कीन! मारदे हना परमप्रभु यावेमी ‘अमालेकी नेल्‍ल आन पालामी मेकोपुकी नु लडाइ पाइनुङ’ दे ङोंइती देंशो बाक्‍ब” देंत। येरमीया ३:१७