49
परमप्रभु यावे आ गेय पाइब
यसैया ४२:१-४
1 गे समुन्द्र आ नेक्था बाक्बपुकी, होस पने। गे ङोन रागी ङा मुरपुकी, होस पने। परमप्रभु यावेमी आं कली आ जरमेचा क्येङा ङोंइती रेन ब्रेश्शो बाक्त। गो आं ममा आ कोव़जीम बाक्ङानु, मेकोमी आं कली नें गेती। 2 मेकोमी आं शोव़ हेश्शो तरवार खोदेंशो सेल्तु। आं कली आ गुइमी सुम्शा, ख्रुइक्ताक्यी। मेकोमी आं कली हेश्शो ब्रा खोदेंशो सेल्शा, आ ब्रा कुरतीकेम कुर पा ख्रुइश्शा वोइक्ती। हिब्रू ४:१२; प्रकाश १:१६; यसैया ५१:१६ 3 मिनु आं कली “गे आं गेय पाइब बाक्नेवे। गे इस्राएल नवे। इ पतीकेमी आं सक्ति कोंइनुङ” देंत। 4 मिनु गो “गो मो गेय पाता। आं बोल मो खेरता। गो मार पचा माल्नुङा। मेको परमप्रभु यावे नु बाक्ब। आं परमप्रभुमी आं तचा माल्शो गेब” देंती। १कोरिन्थी १५:५८
5 मुल परमप्रभु यावेम आ गेय पाइब सेल्ती। मिनु गो याकूब कली आ गे लेप्पाइक्चा कली नु इस्राएल मेको आ नेक्था खुप्शा वोइक्चा कली मेकोमी आं कली आं ममा आ कोव़जीम सेल्ती। मारदे हना गो परमप्रभु यावे आ ङोंइती मान ताइब दुम्ती। आं परमप्रभु आं सक्ति दुम्त। 6 मिनु मेकोमी “याकूब आ थर ङा मुरपुकी नु इस्राएल ङा लीशो मुर आन कली ङोंइती ङा खोदेंशो सेल्चा कली इ कली आइक्च गेय का बाक्ब। गो इ कली रागी रागी ङा मुर आन कली छेङछेङ दुम्पाइक्नुङ। मिनु मेको आं पाप रे प्रोंइतीके रागी ङा सुर सम्म ब्रल” देंत। यसैया ४२:६; यसैया ६०:३; लूका २:१२; प्रेरित १३:४७
7 परमप्रभु यावेम, इस्राएली आन श्येत रे प्रोंइब, इस्राएली आन का ला बाक्शो परमप्रभु यावेमी काइ मदाक्शो नु रागी ङा मुरुम खेदा पचा पुंइसीशो नु हुकुम पाइब आन वाइल आन कली “पिपपुकी मेको कली तशा, राप्नीम। हुकुम पाइबम आ देंशो पाइब परमप्रभु यावे आ ङोंइती बाप्नीम। इ कली योव़ब इस्राएली आन का ला बाक्शो परमप्रभु आ ङोंइती बाप्नीम” देंत।
इस्राएली कली पाप रे प्रोंइब
8 मिनु परमप्रभु यावेमी “शिशी पतीक नाक्त गो इ लोव़ नेंशा, लोव़ लेत्ताक्न। प्रोंइतीके नाक्त गो इ कली वारच पाता। गो इ कली कोव़शा, आं कबल ङा मुर सेल्ता। गो रागी लेंशा सेल्चा कली मोदेंशो पाता। इन थेरशो रू लेंशा इन कली गेचा कली मो पाता। भजन संग्रह ६९:१४; २कोरिन्थी ६:२; यसैया ४२:६ 9 गो जेल्खानम बाक्ब आन कली ‘ग्रूङीन’, छिङछिङम बाक्ब आन कली ‘छेङछेङम ग्रूङीन’ देंचा कली ब्रेत्ताक्न। मेकोपुकी आं भेडा बाक्नीम। लांमी जोचा ताइनीम। गोरशो डांडा मेको आन रिम्शो पा जोतीके बाक्तीके दुम्ब। 10 शोव़लु मबेक्नीम, तूतू मदाक्नीम। नां नु होश फश नु नांमी मेको आन कली मनाप्ब। मारदे हना मेको आन कली शिशी पाइबमी मेको आन कली खुल्ब। प्रकाश ७:१६ 11 मिनु गो आं डांडा नेल्ले लां सेल्नुङ। आं ठेयब लां रिम्शो पा सेल्पाइक्नुङ। यसैया ४०:४ 12 नेनीन, मेकोपुकी ङोन रे जाक्नीम। मेकोपुकी उत्तर रे पच्छिम रे नु स्येने रागी रे जाक्नीम” देंत। स्येने रागी इजीप्त आ दक्खिनम यहूदी आन बाक्तीके का बाक्ब। मेको कली आस्वान यो देंनीम।लूका १३:२९
13 सरीङ, ग्येरसीशा कुम्सो पावो। रागी, ग्येरसो। डांडापुकी ग्येरशा, कुम्सो पने। मारदे हना परमप्रभु यावेमी आ मुर आन कली लेम्ताक्व। मेकोमी श्येत जाइब आन कली शिशी पाइब। यसैया ४४:२३
सियोन ङा शुश मुर
14 तन्न सियोनमी “आं परमप्रभु यावे, परमप्रभुम आं कली प्रोंइशा प्रेंताक्यी” देंत। 15 मिनु परमप्रभुम “सुइ मीश मुरुम आ दूध तूब आल कली प्रेंबा ङा? आंम आ आल कली शिशी मपाइबा ङा? मेकोम आ आल कली प्रेंने चाप्तु हना यो, गो इ कली मप्रेंनुङ। उत्पत्ती २१:१६; १राजा ३:२६; येरमीया ३१:२० 16 कोव़ङो, गो इ कली आं गुइमी ब्रेक्ताक्न। इ गारोपुकी गेना हना यो आं ङोंइती बाक्नीम। 17 इ तमी तौ रीब पा जाक्नीम। इ कली खतम पोक्ब ग्रूशा लाइनीम” देंत। 18 कोव़ङो, मिक्च हिरशा कोव़ङो। मेको नेल्ल ग्रुम्शा, इ बाक्तीक जाक्नीम। परमप्रभु यावेमी “गो ब्रोंइशा बाक्शो खोदेंशो पा, गे मेको लेश्शा जाक्ब आन कली माला खोदेंशो पा रेल्सीचा माल्नेवे। ग्युम्ली खोदेंशो पा मेकोपुकीमी ग्योम्सीचा माल्नेवे। यसैया ६०:४ 19 थमा पा इ प्रेश्शो खिं, मुर मबाक्शो रागी नु इ खतम दुम्शो रागीम मुर मरिक्थ्री दुम्नीम। इ जोरी सत्रु ङोन लाइनीम। 20 इन ब्राची ना ङा जरमेशो आलपुकीमी इ कली ‘एको रागीम आंइ कली मरिक्त, अर्को बाक्तीक रू गेकी’ देंनीम। यसैया ५४:१ 21 मिनु गे इ थुंमी ‘एको आलपुकी आं कली सुम थिशा गेयी? गो आल मथीब दुम्शो बाक्ती। आं रागी रे ग्याइश्शा लाइक्चा पुंइसाक्यी। सुम मेको आन कली थुल्शा कोल्पदा? गो दा आं का ला लीशो बाक्ती। एको ते रे जाक्मा?’ दे मिम्नेवे” देंत।
22 मिनु परमप्रभु, परमप्रभु यावेमी “गो आं गुइ रागी रागी गे दिंनुङ। गो जात जात ङा मुर आन ङोंइती आं छेदर ख्रुक्शा कोंइनुङ। मिनु मेकोपुकीमी इ तौ आन कली कुचुम मुप्शा नु इ तमी आन कली चीम कुरशा चाक्नीम। यसैया ६०:४ 23 मिनु पिपपुकी इ कली कोव़ब आफ नु पिपीमपुकी इ कली दूध तुंइब ममा दुम्नीम। मेकोपुकी इ ङोंइती बाप्शा, इ फुरक लुम्सीशो खोइली तुक्नीम। मिनु गो परमप्रभु यावे नङ, दे तुइक्नेवे। आं लां रिम्शा बाक्बपुकी मुने मदोक्नीम” देंत। भजन संग्रह ७२:९; यसैया ६०:१६
24 बोल्यो मुर आन रोइश्शो सिखार सुम रोइक्ने चाप्नीमी ङा? हिंचा ङा पिपम चोक्शो मुर आन कली सुम प्रोंइने चाप्नीमी ङा? 25 तन्न परमप्रभु यावेमी “बोल्यो मुर आन ग्याइश्शो मुरपुकी यो लाइक्चा पुंइसीनीम। हिंचा ङा पिपम चोक्शोपुकी प्रोंइचा पुंइसीनी। गे नु लडाइ पाइबपुकी नु गो लडाइ पाइनुङ। इ आल आन कली गो कोव़शा प्रोंइनुङ। मत्ती १२:२९ 26 इ कली श्येत गेब आन कली आंम आन श्ये ब्वपाइक्नुङ। मेकोपुकी अङगुर शांबुम दुक्शो खोदेंशो पा आंम आन हुशेम दुक्नीम। मिनु मुर नेल्लेमी ‘गो इ कली श्येत रे प्रोंइब, इ परमप्रभु यावे नङ। गो इ कली पाप रे प्रोंइब, याकूब आ सक्ति पाइश्शो परमप्रभु नङ’ दे तुइक्नीम” देंत।