50
परमप्रभुम इस्राएली कली हुइश्शो
1 मिनु परमप्रभु यावेमी “गोम इन ममा कली प्रोंइशा गेशो छोड पत्र ते बाक्म? गो तेको आं कली जेर गेब कली इन कली लेयन्नी? ममाइ, गे इन पापम पतीके लेयसीशो ननी। इन हेंथे पतीकेमी इन ममा प्रोंइचा पुंइसीशो बाक्ब। यसैया ५४:६; ब्यवस्था २४:१; यसैया ५२:३ 2 गो जाक्ङानु, मारदे सुइ मबाक्मा? गो ब्रेङङानु, मारदे सुइमी लोव़ मलेत्ता? आं गुइ इन कली पाप रे प्रोंइने मचाप्चा ङा दुम्शो बाक्मे? इन कली प्रोंइने चाप्तीक सक्ति गो नु मबाक्बा? गो हुइक्तुनु, समुन्द्र सोव़ब। खोलापुकी ब्वाक्कु मबाक्शो गोरशो रागी सेल्नुङ। ब्वाक्कु मबाक्तीके ङांइपुकी बेक्शा, राक्शा, रिना पाइनीम। यसैया ५९:१; गन्ती ११:२३; प्रस्थान १४:२१ 3 गो सरीङ कली छिङछिङम गिल्शा, अरन्डी फेक्पाइक्नुङ” देंत।
परमप्रभु आ गेय पाइबमी टिशो
यसैया ४२:१-४
4 परमप्रभु, परमप्रभु यावेमी आं कली शेंब सेल्ती। गो मचाप्शो मुर आन कली लोव़ पा आन थुं बारपाइक्ब दुम्ती। मेकोम आं कली सुनी कुस कुस पोक्ब। आं कली शेंसीब खोदेंशो पा नोफा दाइश्शा नेंब सेल्ब। 5 परमप्रभु, परमप्रभु यावेमी आं कली आ लोव़ नेंपाइक्ती। मिनु गो आ लोव़ टिशा, नोले मशोंइसीङ। भजन संग्रह ४०:७ 6 गो आं ची तुप्ब आन कली तुप्चा गेतामी। गाल शोक्रे ब्विप्ब आन कली चोव़चो दाइश्शा गेतामी। गो शुक्शी पाइक्चा नु तोक्चा पुंइसीतीक रे आं कुल मख्रुइक्तु। यूहन्ना १९:१; मत्ती २६:६७-६८
7 तन्न परमप्रभु, परमप्रभु यावेमी आं कली वारच पाइक्ती। मोपतीके गो शिशी मताइब मदुम्ङ। आं कुल शेराल फुल्लु खोदेंशो सेल्ता। गो मुने मदोक्नुङ, दे तुइश्शो नङ। इजीकीएल ३:८-९ 8 “गे रिम्शो पाइब बाक्नेवे” देंब आं नेक्था बाक्ब। गो नु सु लडाइ पाइबा? कालेमी बोक्शा राप्य। दोस गेब, सु बाक्मा? मेको आं ङोंइती जाक्मल। रोमी ८:३३ 9 परमप्रभु, परमप्रभु यावेमी आं कली वारच पाइब। आं कली दोस गेब, सु बाक्नीमी? मेको नेल्ले फेक्शो वा खोदेंशो पा माइत दुम्नीम। मिनु तुम्बुम मेको कली नेक्नीम।
10 इन दातेमी परमप्रभु यावे कली मान पा हिंब सु बाक्नी? मिनु आं गेय पाइब आं देंशो टीब सु बाक्नी? मेको छिङछिङम गाक्शा, छेङछेङ काइ मताइब बाक्त हना यो, परमप्रभु यावेम “आं कली श्येत रे प्रोंइब” दे थमा सुइश्शा, आ परमप्रभु कली जिम्मा गेंसीशो बाक्ब। 11 गे नेल्ल खिं सुइक्ब बाक्नीनी। कोक्त सुइक्ब बाक्नीनी। इन सुइश्शो मीम गाक्कीन। गे आं गुइ रे मार ताइनीनी? गे गोल्शा शुश श्येत जाइनीनी।