मीका
ब्रेक्ब मुर: मीका इस्राएल ङा दक्खिन हेब्रोन नु गाजा सहर आस दाते मोरेशेथ ङा मुर बाक्त। मेको आ नें आ अर्थ “परमप्रभु यावे खोदेंशो सुइ मबाक्ब” देंशो बाक्ब। मीका आमोस खोदेंशो पा रू ङा गेय पाइब बाक्त। मेको अस्सुर ङा लडाइ पाइब आन ङोंइती रे प्रोक्शा, यरूसलेम सहरम परमप्रभु यावे आ लोव़ पशो बाक्त। एको किताब मीकामी ब्रेक्शो बाक्त।
गेना ब्रेक्शो: मीकामी ७५०-७२३ बि. सी.म परमप्रभु यावे आ लोव़ पशो बाक्त। मेकोमी सामरीया खतम दुम्चा क्येङा ङोंइती मेको आ पर्बम परमप्रभु आ लोव़ पशो बाक्त। मीका १:६ हिज्कीयाह पिप दुम्शो ६ बर्स दुम्ची ना ७२२ बि. सी. सामरीया खतम दुम्शो आ पर्बम चहिं मीकामी मारेइ मब्रेक्शो बाक्त। मोपतीके मेकोमी एको किताब ७२२ बि. सी. क्येङा ङोंइती ब्रेक्शो बाक्त।
मार ब्रेक्शो: परमप्रभुमी थुं नाइक्चा गेब। इस्राएल नु रागी रागी ङा मुर नेल्ल आन कली मस्सीह सोइक्ब। मेकोमी आ गे जाक्ब मुर आन कली श्येत रे प्रोंइब।
1
सामरीया नु यरूसलेम कली निसाफ
1 परमप्रभु यावेमी मोरेशेथ ङा मीकाह कली लोव़ पाप्तु। मेना यहूदा रागीमी योथाम पिप बाक्त। मेको आ नोले आहाज नु मेको आ नोले हिज्कीयाह पिप दुम्ताक्स। मिनु मेको परमप्रभु यावे आ लोव़ नु आ कोंइतीके सामरीया नु यरूसलेम आस पर्बम बाक्त। येरमीया २६:१८; यसैया १:१
2 मिनु परमप्रभु यावेमी मार कोंइशो नु देंशो बाक्त देंशा हना “जात जात ङा मुर, गे नेल्लेमी नोफा दाइक्तीन। रागी नु मेकेर बाक्ब नेल्लेमी नेनीन। परमप्रभु, परमप्रभु यावे आ बाक्तीके रे पा इन मरिम्शो पशो आ पर्बम सांकछी दुम्ब। 3 लो कोव़ङीन, परमप्रभु यावे आ बाक्तीक रे जाक्ना जाक्न बाक्ब। मेको यीब नु रागी ङा लाइश्शो डांडाम गाक्ब। आमोस ४:१३ 4 मी आ नेक्था मयीन यशो खोदेंशो पा, लुक्च लतीकेमी ब्वाक्कु शाइश्शो खोदेंशो पा, मेको आ थेक्शो डांडापुकी याइनीम। मिनु दिंमपुकी ब्रोल्नीम। 5 मेको नेल्ल याकूब आ मरिम्शो पशो नु इस्राएल ङा मुर आन पाप आ पर्बम दुम्शो बाक्ब। याकूब आ मरिम्शो पशो मार बाक्बा? मेको सामरीया ममाइ ङा? यहूदा ङा लाइश्शो डांडा मार बाक्बा? मार, मेको यरूसलेम ममाइ ङा? येरमीया २३:१३-१४ 6 मोपतीके गो सामरीया कली फुल्लु तेल्तीक सेल्नुङ। मेको अङगुर ख्रुम्तीक रू दुम्ने चाप्ब। गो मेकेर ङा फुल्लु दिंमम ताइक्नुङ। मिनु मेको आ खिं प्रेश्शा, आ जग ग्रुंइनुङ। १राजा १६:२४; होसे १४:१ 7 मिनु मेको आ मूर्ति नेल्ल प्रोल्चा पुंइसीनीम। मेको आ गेय पा चेम्शो क्येट नेल्ल मीम हुम्चा पुंइसीब। गो मेको आ मूर्ति नेल्ल खतम पोक्नुङ। मारदे हना मेको नेल्ल तेल्लेम पा चेम्शो क्येट खोदेंशो पा खुप्शो बाक्नीम। मोपतीके मेको तेल्लेम पा चेम्शो क्येट खोदेंशो पा जाम्शा लाइनीम” देंत। होसे २:७,१४
यहूदा सहर कली श्येत दुम्ब
8 मिनु गो मेको आ पर्बम रोंका पा ङाक्ना ङाक्न बाक्नुङ। श्येत्थ खोइल नु भेत्रे गाक्नुङ। गो सिवार खोदेंशो पा ग्रीनुङ। मिनु बुक्स खोदेंशो पा ग्रीनुङ। 9 मारदे हना मेको आ गार मसाब। मेको यहूदा सम्म जाक्शो बाक्ब। मेको आं मुर आन बाक्तीक यरूसलेम सहर ङा ठेयब लाप्चो सम्म जाक्दीश्शो बाक्ब। 10 एको लोव़ गाथ सहरम मनेंपतीन। मिनु ङाक्सीन मङाक्कीन। बेथ-लेआफ्रामी इन पियाम फुरक फुंइसीन। २सामुएल १:२० 11 शाफीर सहर ङा मुरपुकी, भेत्रे दुम्शा, मुने दोक्शा इन लां लने। सानान सहर ङा मुरपुकी लाङगा मग्रूनीम। बेथ-एचेलम ङा मुर रोंका पाइनीम। मुल रे इ कली वारच पाइब मबाक्नीम। 12 मिनु मारोथ सहर ङा मुरपुकीम हिंना हिंन रिम्शो दुम्तीके रिम्ना रिम्न बाक्नीम। परमप्रभु यावे रे हिंचा ङा श्येत यित। मिनु मेको यरूसलेम ङा ठेयब लाप्चो सम्म जाक्शो बाक्त। 13 लाकीश सहर ङा मुरपुकी, शारा आन कली बग्गीम फ्रेंशा लने। गे सियोन सहर ङा मुर आन कली पाप पपाइक्तीनी। मिनु मेको कली पाप पपाइक्ब, गे बाक्नीनी। इस्राएल आ मरिम्शो पतीके इन दातेम थीसीब। 14 मोपतीके गे मोरेशेथ-गाथ सहर कली आ गाक्ची ना ङा कोसेली गेचा माल्नीनी। अकजीब सहर ङा मुर इस्राएली आन पिप आन कली ब्वाक्कु मबाक्तीकेम ब्वाक्कु बुक्शो खोदेंशो बाक्नीम। 15 मिनु मारेशा सहर ङा मुरपुकी, गो इन कली ग्रापाइक्चा कली मुर का चाक्नुङ। मेको इस्राएल ङा मान ततीके अदुल्लाम सम्म जाक्ब। 16 मिनु इन दाक्शो आल आन पर्बम इन चां प्रेक्कीन। चां नेल्ल प्रेक्शा, गिदद खोदेंशो दुमीन। मारदे हना इन आल नेल्ल ग्याइश्शा, मुर आन रागीम लाइक्चा पुंइसाक्म।