1 आबी आबी, सु सुम आन ब्राख्‍येम गोल्‍शा पाप नु मरिम्‍शो पचा ला मिम्‍नीमी। मिनु नां सोव़म चोटीन मेको आन मिम्‍शो पाइनीम। मारदे हना मेको पने चाप्‍ब बाक्‍नीम। 2 मेकोपुकीम रिम्‍शो रू तशा वाल्‍शा, रोइक्‍नीम। रिम्‍शो खिं रोइक्‍नीम। मोपा मेकोपुकीमी मुर आन खिं नु आन थेरशो रू आंम के सेल्‍नीम। ब्‍यवस्‍था ५:२१; हितोपदेस २४:१५; यसैया ५:८ 3 मोपतीके परमप्रभु यावेमी मार देंत देंशा हना “गो मेको आन खिं ङा मुर आन कली श्‍येत गेनुङ। मेको रे आंम कली प्रोंइने मचाप्‍नीम। ठेयब लेश्‍शा गाक्‍ने मचाप्‍नीम। मारदे हना मेको थम श्‍येत जतीक नाक्‍त बाक्‍ब। आमोस ५:१३ 4 मेको नाक्‍ती मुरपुकीमी इन पर्बम शुक्‍शी पा कुम्‍सो पाइनीम। मिनु इन पर्बम रोंका पा ङाक्‍नीम। मिनु मुरपुकीमी ‘गोपुकी थमा पा खतम दुम्‍तक। आंइ मुर आन थेरशो रू अर्को मुरुम लाइक्‍नीम। आंइ रू आंइ जोरी सत्रु आन दातेमी योक्‍सीनीम’ देंनीम” देंत। 5 मोपतीके गेपुकी परमप्रभु यावे आ मुर आन योक्‍शो रू रोइक्‍चा मताइनीनी। 6 मेकोपुकीम “परमप्रभु यावे आ लोव़ मपने” देंनीम। तन्‍न लोव़ पाइनीम। मिनु मेकोपुकीमी “मोदेंशो श्‍‍येत आंइ कली मदुम्‍ब” देंनीम। आमोस ७:१६ 7 याकूब आ खिं ङा मुरपुकी, मोदेंशो देंचा दुम्‍बा? मार, परमप्रभु यावे आ फाल्‍तीक सक्ति नुम्‍मे ङा? मेकोमी मोदेंशो पाइबा ङा? परमप्रभु यावेमी रिम्‍शो पाइब आन कली रिम्‍शो लोव़ मपाइबा ङा? आमोस ६:३ 8 तन्‍न गे आं मुर आन ङोंइती जोरी सत्रु खोदेंशो दुम्‍शा बाक्‍नीनी। रिम्‍शो पाइब मुर आन फेक्‍तीक रोइश्‍शा लाइक्‍नीनी। लडाइ मदुम्‍शो बाक्‍ब, दे इन कली थमा सुइश्‍शा गाक्‍ब आन कली मोदेंशो पाइनीनी। 9 गेपुकीम आं मुर आन मीश आन कली आन दारशो खिं रे ग्रुंइनीनी। मेको आन आलपुकी रे आं गेशो आसीक गेना हना यो कली रोइश्‍शा लाइक्‍नीनी। 10 बोक्‍शा लने। मारदे हना एकेर इन नाइक्‍तीक ममाइ। मारदे हना एको ग्रांग्रा दितीकेमी मुर आन कली मरिम्‍शो सेल्‍ब। मेको मारेइ पने मचाप्‍चा ङा पा खतम सेल्‍शो बाक्‍ब। 11 तेकोइ मुरुमी जोल पा दूली लोव़ पशा “गो इ कली अङगुर शांबु तूचा नु रकसी तूचा आ पर्बम लोव़ पाइनुङ” देंत हना, मेको मुर मेको आन कली गारचा ङा लोव़ पाइब बाक्‍ब।

12 परमप्रभुमी “याकूब गो थमा पा नेल्‍ल इन कली खुप्‍शा पुक्‍नन्‍नी। गो इस्राएलम लीशो आन कली थमा पा खुप्‍नुङमी। गो मेको आन कली भेडा बगालम वोइश्‍शो खोदेंशो पा नु योव़तीकेम योव़शो खोदेंशो पा वोइक्‍नुङ। मिनु मेकेर शुश मुर दुम्‍नीम। येरमीया ३१:१०; इजीकीएल ३६:३७; यसैया ५२:१२ 13 लां कोंइब मेको आन ङोंइती गाक्‍ब। मेकोपुकी लाप्‍चो रे पा ग्रूशा गाक्‍नीम। मेको आन पिप मेको आन ङोंइती गाक्‍ब। परमप्रभु यावे मेको आन ङोंइङोंइती बाक्‍ब” देंत।