9
“गे रिम्शो पाइतीनी” दे कुम्सो पशो
कुम्सो पपाइक्ब कली मुथ-लाब्बेन कुम्सो आ लायो। दाऊद आ कुम्सो।
1 परमप्रभु यावे, गो आं थुं नेल्लेमी इन कली “गे रिम्शो पाइतीनी” दे इन कली ठेयब सेल्नुङ। इन पशो छक लाक्चा ङा गेय नेल्ल आन कली नेंपाइक्नुङमी। भजन संग्रह ४४:२ 2 इन कली तुइश्शा, ग्येरनुङ। शुश ग्येरशा, गो इन कली ठेयब सेल्तीक कुम्सो पाइनुङ। गे नेल्ल क्येङा ठेयब बाक्नीनी। 3 आं जोरी सत्रु इन कली तशा, आन जाक्शो लां रे लेश्शा प्रोक्शा लमानु, गुल गाल थिश्शा, साइक्चा पुंइसाक्म।
4 मारदे हना गे ठीक निसाफ पाइब बाक्शा, इन ठेयब नित्तीकेमी निश्शो बाक्तीनी। मिनु आं ठीक गेय पशो तुइश्शा, गे आं कली निसाफ पाइतीनी। 5 मिनु गे रागी रागी ङा मुर आन कली हुइक्ताक्नी। इन अरेशो मटीब आन कली साइक्तीनी। मेको आन नें लेंशा ममिम्चा ङा पा क्याम्ताक्नी। 6 परमप्रभु, आं जोरी सत्रु आन खिं गेनायो मसेल्चा ङा पा प्रेत्तीनी। गे मेको आन सहर हु हा प्रेत्तीनी। मिनु मेको आन नें यो काइ मलीथु, जाम्शा लत। भजन संग्रह ३४:१७
7 तन्न परमप्रभु यावे गेना हना यो बाक्ब। निसाफ पचा कली आ ठेयब नित्तीके ठीक पशो बाक्ब। 8 मिनु रागी रागी ङा मुर आन कली आ ठीक पतीकेमी निसाफ पाइब। जात जात ङा मुर आन कली आन कुल मकोव़थु, निसाफ पाइब। 9 परमप्रभु यावे दिप्चा पुंइसीशो मुर आन कली बोल्यो दरवार खोदेंशो बाक्ब। श्येत जशो आन कली बोल्यो ख्रुइश्शा बाक्तीक बाक्ब। 10 परमप्रभु यावे, इन नें तुइक्बपुकीमी इन कली थमा सुइक्नीम। मारदे हना गे इन कली माल्ब आन कली मप्रोंइनीनी। 11 सियोन डांडामी बाक्ब परमप्रभु यावे कली ठेयब सेल्तीक कुम्सो पने। जात जात ङा मुर आन कली आ पशो शेंदीने। 12 मिनु परमप्रभुमी मुर साइक्ब आन कली आन क्येक्क लेप्ब। मिनु श्येत जशो आन ङाक्शो मिम्ब। उत्पत्ती ४:१०; उत्पत्ती ९:५; भजन संग्रह ७२:४; उत्पत्ती १६:११
13 परमप्रभु यावे, आं कली शिशी पने, आं कली मदाक्बपुकीमी गेशो श्येत कोव़ङीन। गे आं कली बेक्चा चिक्शो रे प्रोंइतीनी। 14 मिनु ब्रोंइशा, गो परमप्रभु आ योव़शो सियोन ङा ठेयब लाप्चोम मुर आन कली “परमप्रभुमी आं कली श्येत रे प्रोंइती” दे इन कली ठेयब सेल्शा, ग्येरसीशा तुइक्पाइक्नुङमी। भजन संग्रह २२:२३; भजन संग्रह १३:६ 15 रागी रागी ङा मुरपुकी आंमा दोशो ठेयब खाल्टाम बिक्शो बाक्नीम। मिनु आन दाइश्शो ग्याइलीमी आंमा रेश्शो बाक्नीम।
16 परमप्रभु यावेमी मेको ठीक निसाफ पाइब बाक्ब, दे मुर नेल्ल कली तुइक्पाइश्शो बाक्ब। आ अरेशो मटीब मुर आंम आन पशोमीन खतम दुम्नीम। ताप्तीकेमी ठेयब सेंदा पा। 17 परमप्रभु आ अरेशो मटीब रागी रागी ङा मुरपुकी नु मटीबपुकी बेक्शो मुर आन बाक्तीकेम लाइब बाक्नीम। 18 परमप्रभुमी श्येत जाइब आन कली मप्रेंब। मिनु प्रुङग आन आस पशो गेना हना यो मिम्ब। भजन संग्रह २२:२५; भजन संग्रह १०:१७ 19 परमप्रभु यावे, बोक्कीन। मुरपुकी मग्रामल। रागी रागी ङा मुर इन ङोंइती जाक्शा, निसाफ पचा पुंइसमल। गन्ती १०:३५ 20 परमप्रभु यावे, मेको आन कली हिंपतीन। रागी रागी ङा मुरपुकीमी “गो मुर ला बाक्नय” दे तुइक्तमेक्ल। ठेयब सेंदा पा।