1 परमप्रभु यावे, गो आंइ श्‍येत जची ना, मारदे ङोन बाक्‍शा, ख्रुइक्‍नीनी? 2 परमप्रभु आ अरेशो लोव़ मटीबपुकीमी ठेयब लेश्‍शो दुम्‍शा, प्रुङग आन कली खेदा पाइनीम। मेको आन मरिम्‍शो मिम्‍तीके नु आन पतीकेमी ग्‍याइक्‍चा पुंइसीनीम। 3 परमप्रभु आ अरेशो लोव़ मटीबपुकीमी “आं द‍ला दाक्‍स नेल्‍ल पने चाप्‍नुङ” दे ठेयब लेत्‍नीम। लोभी आन कली आसीक गेनीम। मिनु परमप्रभु यावे कली मान मपथु, महिंथु, मेको आ पर्बम शुक्‍शी लोव़ पाइनीम। 4 मिनु ठेयब लेश्‍शा, आन थुंमी “परमप्रभुमी आंइ कली मरिम्‍शो मसुइक्‍ब। मारदे हना मेको मबाक्‍ब” दे मिम्‍नीम। 5 मोपा यो मारेइ मारेइम गाप्‍शा श्‍येत मजाइनीम। मारदे मेकोपुकीमी इन निसाफ पशो मताइनीमी? मेकोपुकीमी आन जोरी सत्रु आन क्‍येङा महिंथु मेको आन कली ग्रानीम। आमोस ६:३ 6 मिनु मेकोपुकीमी आन थुंमी “गो श्‍येत मजाइनुङ। आं चच युइ सम्‍म यो श्‍येत मजाइनीम” दे मिम्‍नीम। भजन संग्रह ७३:६-८ 7 मेको मुरपुकीमी सराप नु जोल पना पन बाक्‍शा, अरु आन कली दिप्‍शो बाक्‍नीम। मेको आन लोव़मी श्‍येत नु मरिम्‍शो ला दुम्‍पाइक्‍नीम। रोमी ३:१४ 8 मेकोपुकीमी गाउं मेर ख्रुइश्‍शा बाक्‍शा, दोस मताइब आन कली साइक्‍नीम। श्‍येत जाइब आन कली यो बाप्‍शा बाक्‍नीम। 9 गुप्‍स ब्‍वाकीम बाप्‍शो खोदेंशो पा ख्रुइश्‍शा, प्रुङग आन कली रिम्‍नीम। प्रुङग आन कली आन ब्‍वारदम रेश्‍शा ग्‍याइक्‍नीम। 10 मिनु मेको गु बाप्‍शा बाक्‍नीम। श्‍येत जाइबपुकी मेको आन सक्तिमी गोल्‍नीम। 11 मेको आन थुंमी “परमप्रभुमी आंइ पशो मताइब। आ कुल ख्रुइक्‍ताक्‍व, आंइ पशो प्रेंब” दे मिम्‍नीम। भजन संग्रह ७३:११; भजन संग्रह ९४:७; यसैया २९:१५

12 परमप्रभु यावे, परमप्रभु, बोक्‍कीन। परमप्रभु, इन गुइ क्‍युक्‍शा मरिम्‍शो पाइब आन कली सजाइ गेने। दिप्‍चा पुंइसीशो आन कली मिम्‍शा, वारच पने। गन्‍ती १०:३५ 13 मारदे मेको इन अरेशो मटीब मुरपुकीमी परमप्रभु कली शुक्‍शी पाइनीमी? मारदे मेकोपुकीमी “आं कली दोसी मसुइक्‍ब” दे मिम्‍नीमी? 14 परमप्रभु, गे नेल्‍ल ताइतीनी। गे श्‍येत जाइब नु मरिम्‍शो पाइक्‍चा पुंइसीब आन कली वारच पाइश्‍शा, क्‍येक्‍क लेप्‍ब बाक्‍नीनी। मेको श्‍येत जाइबपुकी इन कली जिम्‍मा गेंसीशो बाक्‍नीम। गे रोम रोइक्‍च आन कली वारच पाइब बाक्‍नीनी। भजन संग्रह ६८:६; प्रस्‍थान २२:२२ 15 गे इन अरेशो मटीब नु काइ मरिम्‍शो पाइब आन गुइ जिक्‍तीन। मेको आन ख्रुइश्‍शा मरिम्‍शो पशो कली निसाफ पने! मिनु मोदेंशो नोले मलीनीम। अय्‍युब ३८:१५ 16 परमप्रभु यावे गेना हना यो पिप बाक्‍ब। रागी रागी ङा मुरपुकी आ राज्‍य रे दिल्‍शा, जाम्‍शा लाइनीम। 17 परमप्रभु यावे, गे ब्रेम्‍शो मुर आन पुंइशो लोव़ नेंतीनी। गे मेको आन थुं बारपाइश्‍शा, आन पुंइशो लोव़ नेंचा कली नोफा दाइश्‍शा बाक्‍तीनी। 18 गे रोम रोइक्‍च नु दिप्‍चा पुंइसीशो मुर आन पर्बम ठीक निसाफ पाइनीनी। मो दुम्‍मेनु, मुरपुकीमी अरु आन कली लेंशा श्‍येत मगेनीम।