55
“आ वारचम प्रोनानु” पुंइशो
कुम्सो पपाइक्ब कली तार पाइश्शो ताप्तीके ताप्शा शेंतीक। दाऊद आ कुम्सो।
1 परमप्रभु, आं लोव़ नेनीन। आं ङोंइती रे इन कुल मख्रुइक्तीन। 2 आं पुंइशो नेंशा, लोव़ लेत्तीनी। गो श्येत जशा, आं थुं ग्येत्थ लुक्च दुम्शा, मारदे रोंका पा गाक्ती देंशा हना, 3 गो आं जोरी सत्रु आन लोव़ नेंशा, इन अरेशो मटीबपुकीम श्येत गेतीके रोंका पा गाक्ती। मारदे हना मेकोपुकी गाइश्शा आं जोरी सत्रु दुम्शा, श्येत गेतीमी।
4 आं थुं ग्येत्थ लुक्च पशो बाक्ब। आं कली बेक्चा ङा हिंतीकेमी सुम्ती। 5 गो हिंशा ख्रिंख्रि पाता। गो साप्पा हिंनुङ। 6 गो आं के “ढुकुर खोदेंशो पा फ्रां बाक्शो हना, बेरशा लशा, नांइसीङ वा” देंती। 7 गो थमा पा बेरशा ङोन लशा, गोरशो रागीम बाक्ङ वा। ठेयब सेंदा पा। 8 गो फश गिवार रे प्रोक्शा, रीब पा फाम्सीङ वा।
9 परमप्रभु, मरिम्शो पाइब आन मिम्शो खतम पा गेने। मेको आन लोव़ खाल्शा गेने। मारदे हना गो सहरमी हुश ख्राक्श पोक्शो नु जिशो खेशो ला ताता। 10 मेकोपुकी नाक्दो नाक्ती सहर ङा गारो ङोइश्शा एर ओंथ हिरशो बाक्नीम। मेको सहरम मरिम्शो पतीके नु श्येत ला बाक्ब। 11 मेको सहरम मारेइ मारेइ खतम पोक्ब बाक्ब। मुर आन कली दिप्तीके नु जोल पतीके सहर प्रोंइशा मलाइनीम।
12 आं कली काइ मदाक्बमी शुक्शी पाइय्यी हना, गो फाल्ने चबु वा। जोरी सत्रुमी आं कली लडाइ तोशो नम हना, गो मेको आन क्येङा प्रोक्शा ख्रुंइसीङ वा। भजन संग्रह ४१:१० 13 तन्न गे आ खोदेंशो मुर बाक्ते। गो नु बाक्ब आं वारच बाक्नेवे। 14 ङोंइती गो गे नु ग्येरशा बाक्शो बाक्ती। गो मुरपुकी नु परमप्रभु आ खिंम काथा गाक्शो नय।
15 बेक्पाइक्बमी आं जोरी सत्रु आन कली आन मतुइक्चा ङा पा जाक्शा दाक्गल। मेकोपुकी सेलीन बेक्शो मुर आन बाक्तीके लमल। मारदे हना मेको आन दातेमी मरिम्शो पतीके बाक्ब। गन्ती १६:३१-३३ 16 तन्न गो परमप्रभु कली पुंइनुङ। मिनु मेकोमी आं कली प्रोंइब। 17 गो सुनी, नाक्दो, नाक्ती श्येत जङानु, परमप्रभु कली आं श्येत आ पर्बम पुंइनुङ। मिनु मेकोमी आं लोव़ नेंब। 18 मेकोमी आं कली लडाइ रे मारेइ दुम्पाइक्थु, प्रोंइब। शुश मुरुमी आं कली मदाक्ताक्यीमी हना यो, प्रोंइब। 19 परमप्रभु गेना हना यो ठेयब नित्तीकेमी निश्शो बाक्ब। मेकोमी मेको आन लोव़ नेंशा, श्येत गेब। ठेयब सेंदा पा। मारदे हना मेकोपुकीमी आन लां गेनायो ठीक मसेल्नीम। परमप्रभु कली मान पा महिंनीम। 20 आं वारचमी आं कली जोल पा श्येत गेती। मेकोमी आ कबल प्रोंइतु। 21 मिनु मेकोमी मिलो शिलो लोव़ पाप्तु। तन्न मेको आ थुंमी जिचा खेचा ला बाक्ब। मेको आ लोव़ तेल ख्रेक्शो खोदेंशो बाक्ब। तन्न आ आगाम शोइश्शो तरवार बाक्ब। येरमीया ९:७
22 इन थुं ङा श्येत नु मार पचा दो पचा देंतीके परमप्रभु यावे आ ङोंइती वोतीन। मिनु मेकोमी इन कली कुक्ब। मेकोमी ठीक पाइब आन कली गेनायो हिम्सीचा मगेब। १पत्रुस ५:७ 23 तन्न परमप्रभु, गे मरिम्शो पाइब आन कली खतम दुम्तीकेमी ताइक्नीनी। हुश ख्राक्श पोक्ब नु जोल पाइब आन ब्रोंइतीक नाक्त उइक्थ यो मब्रोंइनीम। तन्न गो इन कली थमा सुइश्शा बाक्नुङ। भजन संग्रह १०२:२५