1 परमप्रभु आं कली शिशी पाइय्‍यीनी। मारदे हना मुरपुकीमी आं कली शुश खेदा पाइनीमी। नाक्‍त रे आं कली दिप्‍शो बाक्‍नीम। 2 नेल्‍ल क्‍येङा ठेयब, नाक्‍त रे आं कली दिप्बपुकीमी आं कली श्‍येत गेनीमी। आं कली खेदा पाइब शुश बाक्‍नीम। 3 गो हिंङानु, इन कली थमा सुइक्‍नुङ। 4 मिनु गो परमप्रभु आ लोव़ ठेयब सेल्‍नुङ। मेकोमी प्रोंइब, दे थमा सुइश्‍शा, महिंथु बाक्‍नुङ। मुरपुकीमी आं कली मार पाइक्‍ने चाप्‍नीमी ङा? भजन संग्रह २७:१; भजन संग्रह ११८:६; यसैया १२:२; यसैया ५१:१२; मत्ती १०:२८

5 नाक्‍त रे मेकोपुकीमी आं लोव़ दूली सेल्‍शा लोव़ पाइनीम। मेको आन मिम्‍शो नेल्‍ले आं कली श्‍येत गेचा कली ला बाक्‍ब। 6 मिनु मेकोपुकीमी आं कली क्‍यारी पा बाप्‍शा साइक्‍चा माल्‍नीम।

7 परमप्रभु, मेको आन कली काइ प्रोक्‍चा मगेन। इन गाइक्‍चामी मेको मुर आन कली खतम पोक्‍कीन। 8 आं रोंका पशो मिम्‍तीन। आं प्रेक्‍कु इन ग्‍यों‍बुम कुर पा वोतीन। मार, मेको इन लोव़ ब्रेक्‍शो किताबम ब्रेक्‍शो मबाक्‍बा ङा?

9 मिनु गो इन कली “वारच पाइय्‍यीनी” दे पुनुनु, आं जोरी सत्रु लेश्‍शा प्रोक्‍नीम। मिनु परमप्रभुमी आं कली दाक्‍ब, दे तुइक्‍नुङ। 10 गो परमप्रभु आ लोव़ ठेयब सेल्‍नुङ। गो परमप्रभु यावे आ लोव़ आ पर्बम ग्‍येरशा लोव़ पाइनुङ। 11 गो “परमप्रभुमी श्‍येत रे प्रोंइब” दे थमा सुइश्‍शा, महिंथु बाक्‍नुङ। मुरपुकीमी आं कली मार पाइक्‍ने चाप्‍नीमी ङा?

12 परमप्रभु, गो गे नु कसम जशो, खाप्‍चा माल्‍नुङ। गो इन कली “गे रिम्‍शो पाइब बाक्‍नीनी” दे चढ़ेतीके चढ़ेनुङ। 13 मारदे हना गे आं कली बेक्‍चा रे प्रोंइतीनी। मिनु आं कली गोल्‍चा रे प्रोंइतीनी। परमप्रभु, गो ब्रोंइशो आन छेङछेङम गाक्‍चा तङल। अय्‍युब ३३:३०