1 परमप्रभु बोक्‍ब। मिनु आ जोरी सत्रु ब्रशा, आ ङोंइती रे प्रोक्‍नीम। गन्‍ती १०:३५ 2 दोपा फशेमी कुन बेरपाइश्‍शा योल्‍बा, मोपा मेको आन कली बेरपाइश्‍शा योल्‍पतीन। मी आ नेक्‍था मयीन यशो खोदेंशो पा परमप्रभु आ अरेशो मटीबपुकी मेको आ ङोंइती जाम्‍शा लाइनीम। 3 तन्‍न ठीक पाइबपुकी परमप्रभु आ ङोंइती ग्‍येरसमल। मेकोपुकी ग्‍येरशा सोम्‍शा बाक्‍मल।

4 परमप्रभु कली कुम्‍सो पने। मेको आ नें आ पर्बम कुम्‍सो पने। गोस्‍स तार गाक्‍ब कली ठेयब सेल्‍तीक कुम्‍सो पने। मेको आ नें परम‍प्रभु यावे बाक्‍ब। गे मेको आ ङोंइती ग्‍येरशा सोम्‍शा बाक्‍कीन। यसैया ५७:१४ 5 परमप्रभु आ बाक्‍तीकेमी बाक्‍शा, रोम रोइक्‍च आन आफ बाक्‍ब। वोंइश बेक्‍शो मीश मुर आन कली वारच पाइब यो बाक्‍ब। भजन संग्रह १०:१४ 6 परमप्रभुमी आ का ला बाक्‍शो मुर कली बाक्‍तीक खिं गेब। मेकोमी चोक्‍सीशो आन कली प्रोंइशा रिम्‍शो सेल्‍ब। तन्‍न मटीबपुकी चहिं नांम दुप्‍शा सोव़शो रागीम बाक्‍चा माल्‍नीम।

7 परमप्रभु, गे इन मुर आन ङोंइङोंइती गाक्‍तीनी। गे मेको आन कली गोरशो रागीम खुल्‍नीनी। ठेयब सेंदा पा।प्रस्‍थान १३:२१ 8 परमप्रभु सीनैम बाक्‍ब। इस्राएली आन परमप्रभु आ ङोंइती ख्रिनु कुत। मिनु शुश रेउ यित। प्रस्‍थान १९:१६-१८ 9 परमप्रभु, गे ठेयब रेउ यिपाइक्‍तीनी। इन सोव़ने थुम्‍शो रागी जिप्‍पाइक्‍तीनी। 10 इन मुर आन कली मेको रागीम बाक्‍पाइक्‍तीनी। मिनु गे, परमप्रभु, इन दाक्‍तीकेमी श्‍येत जाइब आन कली थुल्‍तीनी।

11 परमप्रभुमी आ लोव़ नेंपाइक्‍तु। मिनु मेको लोव़ शेंब मीश मुर शुश दुम्‍तेक्‍म। यसैया ५२:७ 12 लडाइ पाइब आन पिप हिंशा दाम दाम पा प्रोक्‍नीम। मिनु मीश मुरपुकीमी मेको प्रोक्‍ब आन प्रोंइशो मारेइ मारेइ योक्‍सीनीम। 13 गे चहिं भेडा आन दातेमी इप्‍चा दाक्‍नीनी? चांदीम गिल्‍शो फ्रां पाइश्‍शो ढुकुर बाक्‍ब। मिनु आ ओफ्‍लापुकी टल्‍केशो सुनमी गिल्‍शो बाक्‍नीम। 14 मिनु नेल्‍ल क्‍येङा सक्ति पाइश्‍शोमी पिप आन कली ब्रपाइक्‍ची ना सल्‍मोन डांडामी फुं यिपाइक्‍तु। न्‍यायाधीस ५:१६

15 बाशान ङा डांडा परमप्रभु आ डांडा बाक्‍ब। मेको थम ठेयब बाक्‍ब। मेकेर डांडा शुश बाक्‍नीम। 16 गे शुश डांडा पाइश्‍शो पहाड, मारदे गे परमप्रभु आ सासन पचा कली योव़शो डांडा गे कोव़शा, गेहे पाइनीनी? मेकेर परमप्रभु गेना हना यो बाक्‍ब। भजन संग्रह १३२:१३ 17 परमप्रभु आ बग्‍गी हजार हजार क्‍येङा शुश बाक्‍नीम। मिनु परमप्रभु सीनै रे आ बाक्‍तीकेम जाक्‍शो बाक्‍ब। 18 गे इर ङोइश्‍शा लाइतीनी। ग्‍याइश्‍शो मुर आन कली लाइक्‍तीनी। मुर आन दातेमी गे मारेइ मारेइ ताइतीनी। ङोंइती मटीब आन दातेमी यो ताइतीनी। परमप्रभु यावे मेकेर बाक्‍ब। एफिसी ४:८-१० 19 परमप्रभु कली नाक्‍त किंत किंत ठेयब सेल्‍मेक्‍ल। मेको आंइ श्‍येत कुरशा, आंइ जोरी सत्रु रे प्रोंइब बाक्‍ब।ठेयब सेंदा पा।१कोरिन्‍थी १०:१३

20 आंइ परमप्रभु श्‍येत रे प्रोंइब बाक्‍ब। मिनु परमप्रभु यावेमी बेक्‍चा रे प्रोंइ‍ब।

21 परमप्रभुमी थमा पा आ जोरी सत्रु आन पिया प्रोल्‍ब। मेको मुर आन चां पाइश्‍शो पिया पापम ब्रीशो बाक्‍ब। 22 मिनु परमप्रभुमी “गो मेको आन कली बाशान रे चाक्‍नुङमी। मेको आन कली समुन्‍द्र आगा रे ग्रुंइनुङमी। 23 गेपुकीमी इन खोइली इन जोरी सत्रु आन हुशेम ख्रुम्‍नीनी। मिनु इन कुचुमपुकीमी यो आन भाग ताइनीम” देंत।

24 परमप्रभु, मुरपुकीमी इन कली ताइनीम। आं परमप्रभु, आं पिप कली आ बाक्‍तीकेम लशो ताइनीम। भजन संग्रह २४:७; २सामुएल ६:१३-१५ 25 ङोंइङोंइती कुम्‍सो पाइबपुकी गाक्‍नीम। मेको आन नोले मार मार ताप्‍बपुकी गाक्‍नीम। मिनु मेको आन एर ओंथ खैजडी ताप्‍ब मीश आलपुकी गाक्‍नीम। प्रस्‍थान १५:२० 26 परमप्रभु कली ग्रुम्‍तीकेमी ठेयब सेलीन। परमप्रभु यावे कली इस्राएली आन ग्रुम्‍तीकेमी ठेयब सेलीन। यसैया ४८:१ 27 नेल्‍ल क्‍येङा आइक्‍च थर बेन्‍यामीन आ खिं ङा मुरपुकीमी मेको आन कली लां कोंइनीम। यहूदा आ थर ङा ठेयब मुर, जबूलून आ थर नु नाप्‍ताली आ थर ङा ठेयब मुर मेको हुलम बाक्‍नीम। 28 परमप्रभु इन सक्ति कोंइदीन। ङोंइती पशो खोदेंशो पा परमप्रभु, इन सक्ति कोंइदीन। 29 मिनु पिपपुकीमी इन कली यरूसलेम ङा इन खिं आ पर्बम मार मार चाक्‍नीम। भजन संग्रह ७२:१० 30 बुदी मीलु आन दातेम बाक्‍ब जन्‍तु खोदेंशो मुर आन कली हुइक्‍तीन। जात जात ङा बाछा आन दातेम बाक्‍ब ब्‍यफ खोदेंशो मुर आन हुल कली खेरीन। मेकोपुकी ब्रुमा नोले चांदी चाक्‍चा माल्‍नीम। लडाइ पचा दाक्‍ब जात जात ङा मुर आन कली ब्रपतीन। 31 इजीप्‍त रे मुर जाक्‍नीम। एथीयोपीया ङा मुरपुकी परमप्रभु कली जिम्‍मा गेंसीनीम। यसैया १८:७; यसैया १९:२१; यसैया ४५:१४ प्रेरित ८:२७ 32 ए रागी ङा राज्‍यपुकी, परमप्रभु कली कुम्‍सो पने। परमप्रभु यावे कली ठेयब सेल्‍तीक कुम्‍सो पने। ठेयब सेंदा पा। 33 परमप्रभु ङोंइती रे स्‍वर्गम बाक्‍ब। मेको आ सेंदा बुंबु पशो खोदेंशो सक्ति पाइश्‍शो बाक्‍ब। 34 परमप्रभु सक्ति पाइश्‍शो बाक्‍ब। मेको कली इस्राएलीम मान पाइनीम। मेको आ सक्ति सरीङम बाक्‍ब। 35 परमप्रभु, इन बाक्‍तीकेमी हिंचा ङा बाक्‍नीनी। इस्राएली आन परमप्रभुम आ मुर आन कली सक्ति नु बोल गेब। परमप्रभु ठेयब बाक्‍ब।