69
“वारच पने” दे पुंइशो
कुम्सो पपाइक्ब कली लिली फू आ लायो। दाऊद आ कुम्सो।
1 “परमप्रभु, आं कली श्येत रे प्रोंइयीनी। मारदे हना ब्वाक्कु आं शुर सम्म जाक्शो बाक्ब। 2 गो थेक्तीक मबाक्शो हिलो आगाम ग्रुम्ना ग्रुम्न बाक्नुङ। शुश लुक्च लशो ब्वाक्कुमी ग्रुम्ना ग्रुम्न बाक्नुङ। आं एर ओंथ ब्वाक्कु ला बाक्ब। 3 गो ‘वारच पने’ दे प्रवा किवा पा दती। आं सेंदा सोव़ती। आं परमप्रभु कली माल्शा आं मिक्च ब्राब्रा दुम्ती। 4 आं कली मोशा काइ मदाक्बपुकी आं चां क्येङा यो शुश बाक्नीम। मिनु मेकोपुकी मोशा आं जोरी सत्रु दुम्शो बाक्नीम। मेकोपुकीमी आं कली साइक्चा माल्शो बाक्नीम। आं मरोइश्शो मार मार थोव़क, मेकोपुकीमी ‘लेत्तो’ देंनीम। यूहन्ना १५:२५
5 परमप्रभु, गे आं दूली पशो तुइश्शो बाक्नीनी। आं दोस इन ङोंइती मख्रुइश्शो बाक्ब।
6 इन कली आस पाइबपुकी आं पतीके मुने मदोक्मल। परमप्रभु, मुर नेल्ल आन परमप्रभु यावे, इन कली माल्बपुकी आं पतीके मुने मदोक्मल। गे इस्राएली आन परमप्रभु बाक्नीनी। 7 गो इन पर्बम शुक्शी पाइक्चा पुंइसीनुङ। मिनु मुनेमी आं कुल सुम्सीशो बाक्नुङ। भजन संग्रह ४४:२३ 8 गो आं लोक्ब आन दातेमी मतुइश्शो मुर खोदेंशो दुम्शो बाक्नुङ। गो आं ममा आ तौ आंइ दातेमी अर्को रागी ङा मुर खोदेंशो दुम्ती। भजन संग्रह ३८:१२ 9 मारदे हना इन खिं कली दाक्तीके नाक्त किंत किंत आं ङोंइती बाक्ब। इन कली पशो शुक्शी आं कली दुम्त। भजन संग्रह ११९:१३९; यूहन्ना २:१७; रोमी १५:३ 10 गो ङाक्शा, माइजा बाक्ङानु, मुरपुकीमी रित्ताक्यीमी। 11 गो भाङग्रा फेक्सीङानु, मुरपुकीमी आं कली शुक्शी पाइक्तीमी। 12 ठेयब लाप्चोम बाक्बपुकीमी आं कली शुक्शी पाइनीम। दुक्शो मुरपुकीमी आं पर्बम कुम्सो पाइनीम। अय्युब ३०:९
13 तन्न परमप्रभु यावे, गो इन कली इन शिशी पाइक्ची ना लोव़ पाइनुङ। इन गेना हना यो दाक्तीकेमी आं पुंइशो श्येत रे प्रोंइतीके गेयीनी। परमप्रभु आं कली लोव़ लेत्तीनी। यसैया ४९:८ 14 आं कली हिलोमी ग्रुम्तीक रे प्रोंइयीनी। आं कली ग्रुम्चा मगेयीनी। आं कली काइ मदाक्बपुकी रे प्रोंइयीनी। मेको बारशो ब्वाक्कु रे प्रोंइयीनी। 15 बारशो ब्वाक्कुम आं कली मसुम्यील। ब्वाक्कुम मयोल्दील। बेक्शो मुर आन बाक्तीकेमी आं कली मब्रेत्तील। उत्पत्ती २९:३ 16 परमप्रभु यावे, इन गेना हना यो दाक्तीकेमी आं कली लोव़ लेत्तीनी। इन ठेयब शिशी आं गे लेत्तीन। गन्ती ६:२६ 17 इन कुल इन गेय पाइब रे मख्रुइक्तीन। गो श्येत जशो बाक्नुङ। आं कली रीब पा लोव़ लेत्तीनी। 18 आं नेक्था जाक्कीन। मिनु आं कली प्रोंइयीनी। आं जोरी सत्रु रे आं कली प्रोंइयीनी। 19 मुरपुकीमी आं पर्बम दोपा रित्तीमी, मुने तोक्यीमी नु शुक्शी पाइय्यीमी, गे मेको नेल्ल तुइक्नीनी। आं जोरी सत्रु नेल्ल इन ङोंइती बाक्नीम। 20 आं कली रिश्शा कोव़शो आ पर्बम आं थुं जिक्शो बाक्ब। मिनु गो मारेइ पने मचाप्ब दुम्शो बाक्ती। आं कली शिशी पाइब ‘सुइ बाक्मा कों’ दे कोव़ता, तन्न सुइ मबाक्म। लेम्ब यो सुइ मबाक्म। 21 मेकोपुकीमी आं जचा थोव़कमी खाइल कुर पा गेतीमी। गो तूतू दाक्ङानु, ग्युरशो तूचा थोव़क गेतीमी। मत्ती २७:३४,४८
22 मेको आन जचा थोव़क आन ब्वारद दुम्ल। मेको आन कली वारच पाइब आन बेक्तीक दुम्ल। रोमी ११:९-१० 23 मेको आन मिक्ची ब्राब्रा दुम्शा, मताइब दुम्मल। मेको आन ची गेना हना यो गुर ब्वेशो दुम्ल। 24 गे इन गाइक्चा मेको आन कली मोइक्तीन। इन गाइश्शो मेको आन कली दुम्ल। 25 मेको आन बाक्तीके श्येत्थ दुम्ल। मेको आन ताम्बुम सुइ मलीमल। प्रेरित १:२० 26 मारदे हना इन तुप्शो मुर कली खेदा पाइनीम। मेकोपुकीमी इन खाइक्पाइश्शो मुर आन कली लडाइ तोइनीम। 27 मेको आन ठीक मपतीकेम ठीक मपतीक तेम्दीन। मेकोपुकीम इन पाप रे प्रोंइतीके मतामेक्ल। 28 ब्रोंइतीक किताब रे मेको आन नें क्याम्सेक्ल। ठीक पाइब आन नें ब्रेक्शो किताबमी मेको आन नें मबाक्ल। प्रस्थान ३२:३२-३३; दानीएल १२:१; लूका १०:२०; फिलिप्पी ४:३ 29 परमप्रभु, गो श्येत जशा, रोइ पशो बाक्नुङ। इन प्रोंइतीकेमी आं कली खाल पयील” दे परमप्रभु कली लोव़ पाता।
30 गो कुम्सो पा, परमप्रभु आ नें ठेयब सेल्नुङ। “गे रिम्शो पाइब बाक्नीनी” दे मेको कली ठेयब सेल्नुङ। 31 मार मार क्योरशा, चढ़ेशो क्येङा एको कुम्सो नेंशा, परमप्रभु यावे ग्येरसीब। ग्रोव़ नु गेंच पाइश्शो ब्यफ चढ़ेशो क्येङा यो शुश ग्येरसीब। भजन संग्रह ५०:८-१३ 32 दिप्चा पुंइसीशो मुरपुकी मेको तशा ग्येरसीनीम। परमप्रभु यावे कली माल्बपुकी, इन थुं ग्येत्थ लुक्च मदुम्ल। 33 परमप्रभु यावेमी प्रुङग आन पुंइशो नेंब। मिनु ग्याइक्चा पुंइसीशो आ मुर आन कली आइक्च ममिम्ब। 34 सरीङ नु रागीमी मेको कली ठेयब सेल्सेक्ल। समुन्द्र नु मेकेर बाक्शो नेल्लेमी मेको कली ठेयब सेल्मेक्ल। 35 मारदे हना परमप्रभुमी सियोन कली प्रोंइब। मिनु यहूदा ङा सहरपुकी लेंशा सेल्ब। मिनु मुरपुकी मेकेर बाक्शा, मेको आन के दुम्ब। 36 मिनु मेको आ गेय पाइब आन आल आन के यो दुम्ब। मेको आ नें दाक्बपुकी मेकेर बाक्नीम।