105
परमप्रभु कली मान पतीके
1 परमप्रभु यावे कली “गे रिम्शो पाइब बाक्नीनी” दे लोव़ पने। जात जात ङा मुर आन कली परमप्रभु आ पशो तुइक्पतीन। इतिहास १६:८-२२ 2 मेको कली कुम्सो पने। मेको कली ठेयब सेल्तीक कुम्सो पने। मुर आन कली आ पशो छक लाक्चा ङा गेय शेंदीन। 3 गे परमप्रभु आ नें तुइक्तीके ग्येरसीन। परमप्रभु यावे कली माल्ब आन थुं ग्येरसीमल। 4 गे परमप्रभु यावे नु आ सक्ति मालीन। गे गेना हना यो मेको आ नेक्था बाक्चा मालीन। 5 गे मेको आ पशो रिम्शो गेय मिम्तीन। आ छक लाक्चा ङा गेय नु आ निसाफ पशो मिम्तीन। 6 मेको आ गेय पाइब अब्राहाम आ चच युइ नु याकूब आ तौपुकी, आ योव़शो नेल्ल मिम्तीन।
7 मेको परमप्रभु यावे, आंइ परमप्रभु बाक्ब। मेको आ निसाफ रागी नेल्ल कली बाक्ब। 8 मेकोमी आ पशो कबल गेना हना यो मिम्ब। आ देंशो लोव़ हजार हजार पाला सम्म मिम्ब। ब्यवस्था ७:९ 9 मेकोमी अब्राहाम नु मेको कबल पशो बाक्त। मिनु इसहाक नु यो थोक्शा लोव़ पशो बाक्त। 10 मेकोमी आ फुल्लुम मुशा ब्रेक्शो लोव़ याकूब कली गेशो बाक्त। मिनु मेको इस्राएल कली गेना हना लीब कबल बाक्ब। 11 मेकोमी “गो इ कली कनान रागी गेनुङ। मेको इन के दुम्ब” देंशो बाक्त। उत्पत्ती १२:७ 12 मेना मेको आन कली हिक्शोनु, इच्का खोइ ला बाक्मा बाक्त। मिनु मेकेर अर्को रागी ङा मुर यो बाक्मा बाक्त। 13 मेकोपुकी रागी का रे अर्को रागी नु राज्य का रे अर्को राज्य पा हिरना हिरन बाक्बाक्मा बाक्त। 14 परमप्रभुमी मेको आन कली सुइमी श्येत गेचा मगेमी बाक्त। मिनु मेको आन पर्बम पिप आन कली हुइक्तीमी बाक्त। गन्ती २३:७-१० 15 मेकोमी “आं तेल लुक्शो आन कली मथिने। आं लोव़ पाइब आन कली मारेइ मपतीन” दे हुइक्तीमी बाक्त।
16 मिनु परमप्रभुमी मेको रागीमी अन्काल सोइश्शा, अन्न नेल्ल खतम सेल्शा, उत्पत्ती ४१:५४ 17 मुर का कली मेको आन ङोंइती सोइक्ता बाक्त। मेको योसेफ वाइल सेल्चा कली लेयचा पुंइसीशो बाक्त। उत्पत्ती ३७:२८ 18 मिनु मेको कली आ खोइलीम साङलो पाइश्शा, आ शुरमी फलाम के साङलो पाइक्तमे बाक्त। 19 मिनु योसेफ आ लोव़ थमा मदुम सम्म, परमप्रभु यावेमी मेको कली वारच पवा बाक्त। 20 मिनु पिपमी मुर सोइश्शा, मेको कली प्रोना बाक्त। जात जात ङा मुर आन कली सासन पाइबमी मेको कली प्रोना बाक्त। उत्पत्ती ४१:१४ 21 मिनु मेकोमी योसेफ कली आ दरवार ङा ठेयब मुर सेल्शा, आ शोंप नेल्ल आन होव़प सेला बाक्त। 22 मिनु आ आइक्च हुकुम पाइब आन कली शेंचा नु खाल्पा आन कली तुइक्ब सेल्चा कली योसेफ कली वोदा बाक्त।
23 मिनु इस्राएल ङा मुर इजीप्तमी ओव़मा बाक्त। मिनु याकूब हाम आ रागीमी बाक्ब दुम्माक्त। उत्पत्ती ४६:१,७ 24 मिनु परमप्रभु यावेमी आ मुर आन कली शुश सोशा बोशा सेल्मी बाक्त। मिनु मेको आन कली आन जोरी सत्रु आन क्येङा बोल्यो सेल्मी बाक्त। प्रस्थान १:७,१२ 25 परमप्रभुमी इजीप्ती आन थुं इस्राएली आन कली काइ मदाक्ब सेल्मी बाक्त। मिनु इस्राएली आन कली काइ मरिम्शो पाइब सेल्मी बाक्त।
26 मिनु परमप्रभुमी आ योव़शो गेय पाइब मोसा नु हारून आस कली मेकेर सोइक्ता बाक्त। प्रस्थान ३:१०; प्रस्थान ४:१४-१६ 27 मेको निक्शीमी हाम आ रागी ङा मुर आन दातेमी परमप्रभु आ चिन्ड नु छक लाक्चा ङा गेय कोंइदसे बाक्त। प्रस्थान ७:-१२:- 28 मेकोमी छिङछिङ सोइक्ता बाक्त। मिनु मेकेर छिङछिङ दुम्माक्त। तन्न मेकोपुकीमी मेको आ लोव़ मटीमे बाक्त। 29 मेकोमी मेको आन ब्वाक्कु हुश सेलानु, मेकेर ङा ङांइ नेल्ल बेक्मा बाक्त। 30 आन रागीमी क्रुक्क्रुपुकी जाक्शा, आन पिप आन बाक्तीके सम्म जाक्दीम्मा बाक्त। 31 परमप्रभुमी लोव़ पवानु, आन रागी भुस्ना नु चुरमुमी ब्रीमा बाक्त। 32 मेकोमी रेउ आ पा ङा मुप्स यिपदा बाक्त। मिनु मेको रागी नेल्लेमी चिला दाप्पदा बाक्त। 33 मिनु मेकोमी आन अङगुर बोट नु फोव़शी रवा नेल्ल खतम सेल्शा, रागी नेल्ल ङा रवा फस पोक्गा बाक्त। 34 मेकोमी लोव़ पवानु, माले जाक्मा बाक्त। हिक्ने मचाप्चा ङा पा माले नु आन चाइक्ब शुश जाक्मा बाक्त। 35 मेकोपुकीमी मेको रागी ङा बाक्शो गिग नु फल फुल नेल्ल नेक्गमे बाक्त। 36 मिनु मेकोमी आन ङोंइती थिशो तौ सदा बाक्त। आन ङोंइती ङा बोल ङा आल खतम सेला बाक्त।
37 मिनु नोले परमप्रभुमी इस्राएली आन कली सुन चांदी कुरपाइश्शा मेक रे ग्रुंइदीमी बाक्त। मिनु मेको रे ग्रूब नेल्ल बोल्यो बाक्मा बाक्त। प्रस्थान १२:३५ 38 मिनु इजीप्त रागी ङा मुरपुकी इस्राएलीपुकी ग्रूशा लमानु, शुश ग्येरसामा बाक्त। मारदे हना मेको आन कली तशा शुश हिंशो बाक्मा बाक्त। 39 मिनु परमप्रभुमी आ मुर आन कली सुम्चा कली गोस्स सोइक्ता बाक्त। मिनु नाक्दो गाक्चा कली मी के थाम गेमी बाक्त। प्रस्थान १४:२० 40 मेको आन पुंइतीके मेको आन कली चिक्ब गेमी बाक्त। मिनु सरीङ रे जचा थोव़क यिपदा बाक्त। प्रस्थान १६:१३-१५ 41 मेकोमी सेरथे फुल्लु रे ब्वाक्क बुक्पदा बाक्त। मिनु मेको गोरशो रागीमी खोला खोदेंशो पा शांइसे बाक्त। प्रस्थान १७:६ 42 मारदे हना परमप्रभुमी आ थोक्शा पशो लोव़ नु आ गेय पाइब, अब्राहाम कली मिम्ता बाक्त।
43 मोपा परमप्रभुमी आ योव़शो मुर आन कली ग्येरपाइश्शा ग्रुंइदीमी बाक्त। मिनु मेकोपुकी कुम्सो पा ग्रूमा बाक्त। 44 मिनु परमप्रभुमी रागी रागी ङा मुर आन रागी नु आन शोंप मेको आन कली गेमी बाक्त। 45 मेकोपुकीमी परमप्रभुमी फुल्लुम मुशा ब्रेक्शो लोव़, आ अरेशो लोव़ टीमेक्ल, दे मोदेंशो पवा बाक्त। परमप्रभु यावे कली ठेयब सेलीन।