106
ठेयब सेल्तीके
1 परमप्रभु यावे कली ठेयब सेलीन। गेपुकीमी “गे रिम्शो पाइब बाक्नीनी” दे लोव़ पने। मारदे हना मेको रिम्शो पाइब बाक्ब। मिनु आ दाक्तीके गेना हना यो लीब। भजन संग्रह १००:४-५; प्रस्थान १०७:१; प्रस्थान ११८:१; १इतिहास १६:३४ 2 सुमी परमप्रभु यावे आ सक्ति पाइश्शो गेय आ पर्बम देंने चाप्बा ङा? सुमी मेको कली ठेयब सेल्तीक नेल्ल देंने चाप्बा ङा? यूहन्ना २१:२५; हिब्रू ११:३२ 3 सु सुमी ठीक पा निसाफ पाइनीमी नु गेना हना यो ठीक बाक्नीमी, मेको ग्येरसीशो मुर बाक्नीम।
4 परमप्रभु यावे, गे इन मुर आन कली शिशी पनी ना, आं कली यो मिम्तीन। मेको आन कली प्रोंइनीनु, आं कली यो वारच पन। 5 मिनु मोपा गो इन योव़शो मुर आन रिम्शो पा बाक्शो तने चाप्नुङ। मिनु इन मुर ग्येरसीशा बाक्शो तशा, ग्येरसीनुङ। गो इन योव़शो मुर दुम्शा ग्येरसीनुङ।
6 गोपुकी नु आंइ किकी पिपीम पाप पाइतक। गोपुकीमी मरिम्शो पा इन अरेशो लोव़ मटिक। दानीएल ९:५ 7 इजीप्त रागीम बाक्शो आंइ किकी पिपीम इन छक लाक्चा ङा गेय ममिम्शो बाक्तेक्म। मिनु इन शुश गेना हना यो दाक्तीके प्रेंशो बाक्तेक्म। मिनु लल समुन्द्रमी नेल्ल क्येङा ठेयब कली गाइश्शा लोव़ पशो बाक्तेक्म। प्रस्थान १४:११-१२ 8 मोदेंशो पाम्तेक्म हना यो, परमप्रभुमी आ नें आ पर्बम मेको आन कली श्येत रे प्रोंइशो बाक्त। मोदेंशो पा आ ठेयब सक्ति कोंइशो बाक्त। 9 मेकोमी लल समुन्द्र कली हुइक्तानु, सोव़शो बाक्त। मिनु मेको आन कली गोरशो रागी खोदेंशो पा, समुन्द्र ङा लां रे खुल्शो बाक्त। 10 मिनु मेको आन कली आन जोरी सत्रु आन गुइ रे प्रोंइशो बाक्त। मोपा आ प्रोंइशो मुर दुम्शो बाक्तेक्म। 11 मेको ब्वाक्कुमी आन जोरी सत्रु आन कली सुम्शा साइश्शा, का यो मलीशो बाक्तेक्म। 12 मिनु नोले आ देंशो थमा सुइश्शो बाक्तेक्म। मिनु परमप्रभु कली ठेयब सेल्तीक कुम्सो पशो बाक्तेक्म। प्रस्थान १५:२१
13 तन्न मेकोपुकीमी परमप्रभु आ पशो रीब पा प्रेंशो बाक्तेक्म। मेको आ अर्ती नेंचा मबिश्शो बाक्तेक्म। 14 मिनु मेकोपुकी गोरशो रागीम बाक्मानु, आन शोव़ रक सुइश्शो बाक्त। मिनु परमप्रभु कली गोरशो रागीम नाक्शा कोव़शो बाक्तेक्म। गन्ती ११:४-६ 15 मिनु परमप्रभुमी मेको आन पुंइशो गेशो बाक्त। तन्न मेको आन दातेमी बेक्तीक रोइ सोइश्शो बाक्त।
16 मिनु मेकोपुकीमी परमप्रभु यावे रे पा योव़सीशो मोसा नु हारून आस कली गेहे पशो बाक्तेक्म। गन्ती १६:१-३ 17 मिनु रागी जेश्शा, दाथान कली दाक्शो बाक्त। मिनु अबीराम आ हुल कली सुम्शो बाक्त। गन्ती १६:३१-३५ 18 मिनु मेको आन दातेमी मी ग्रूशा, परमप्रभु आ अरेशो मपाइब आन कली ग्राव ग्रु दाक्शो बाक्त।
19 मेकोपुकीमी होरेब डांडाम बाछा का सेल्शा, मेको मूर्ति कली पूजा पशो बाक्तेक्म। प्रस्थान ३२:१-६ 20 मेकोपुकीमी आन मान पशो परमप्रभु आ पा ङा घांस ब्वाइब ब्यफ आ मूर्ति कली ठेयब सेल्शो बाक्तेक्म। रोमी १:२३ 21 मेकोपुकीमी आन कली श्येत रे प्रोंइब नु इजीप्तम ठेयब गेय पाइब आन परमप्रभु कली प्रेंशो बाक्तेक्म। ब्यवस्था ३२:१८ 22 मेकोमी हाम आ रागीमी छक लाक्चा ङा गेय नु लल समुन्द्र आ नेक्था शुश हिंचा ङा गेय पशो बाक्त। 23 मोपतीके मेकोमी “मेको आन कली खतम सेल्नुङ” दे मिम्शो बाक्त। तन्न आ योव़शो मुर मोसामी “मेको आन कली मोदेंशो मपचा” दे पुंइशो बाक्त। मिनु आ गाइश्शो नाइश्शो बाक्त। प्रस्थान ३२:११,३२; ब्यवस्था ९:२५-२९; इजीकीएल १३:४-५
24 मिनु नोले मेकोपुकीमी परमप्रभु आ गेशो रागी मदाक्शो बाक्तेक्म। आ थोक्शा पशो लोव़ थमा मसुइश्शो बाक्तेक्म। गन्ती १४:२-४; ब्यवस्था ८:७-१० 25 मेकोपुकीमी आन ताम्बुम गन गन पशो बाक्तेक्म। मिनु परमप्रभु यावे आ देंशो मटिशो बाक्तेक्म। 26 मोपतीके मेको आन कली “गो इन कली गोरशो रागीम साइक्नुङ। 27 मिनु इन चच युइ आन कली रागी रागीम फ्राइनुङ” दे कसम जशो बाक्त।
28 मिनु मेकोपुकीमी पेओर ङा बाल कली पूजा पशो बाक्तेक्म। मिनु बेक्शो मुर आन कली चढ़ेशो जशो बाक्तेक्म। गन्ती २५:३ 29 मेकोपुकीमी आन पतीकेमी परमप्रभु कली गाइक्पाइश्शो बाक्तेक्म। मिनु मेको आन दातेम बेक्तीक रोइ ग्रूशो बाक्त। 30 मिनु फिनेहास बोक्शा परमप्रभु कली पुंइशो बाक्त। मिनु मेको मुर बेक्तीक रोइ नांइसीशो बाक्त। गन्ती २५:१२-१३ 31 मेको आ पुंइतीके इस्राएलीपुकीमी “फिनेहास ठीक पाइब बाक्ब” दे शुश पाला सम्म मिम्शो बाक्तेक्म। 32 मेकोपुकीमी मेरीबा ङा ब्वाक्कु आ नेक्था परमप्रभु कली गाइक्पाइश्शो बाक्तेक्म। मोपतीके मेको आन पर्बम मोसा कली मरिम्शो दुम्शो बाक्त। गन्ती २०:२-१३ 33 मेकोपुकीमी मोसा कली गाइक्पदमेनु, मोसाम मरिम्शो लोव़ पशो बाक्त।
34 मिनु मेकोपुकीमी परमप्रभु यावे आ देंशो खोदेंशो पा जात जात ङा मुर आन कली मसदमे बाक्त। ब्यवस्था ७:१२; ब्यवस्था १२:२-३; न्यायाधीस १:२८; न्यायाधीस २:२३-३:६ 35 मेकोपुकीमी रागी रागी ङा मीश आल आन कली ग्युंबे पामे बाक्त। मिनु रागी रागी ङा मुर आन पशो यो पामे बाक्त। 36 मेकोपुकीमी मेको आन मूर्ति आन कली पूजा पामे बाक्त। मिनु मेको आन कली ग्याइल खोदेंशो दुम्माक्त। 37 मेकोपुकीमी आंम तमी तौ वोल आन कली चढ़ेमे बाक्त। २राजा २१:६,१६ 38 मेकोपुकीमी आन पाप मपशो तमी तौ आन कली कनानी आन मूर्ति कली चढ़ेशा, आन हुश जारदमे बाक्त। मेको आन हुशेमी मेको रागी ग्रांग्रा दिशो दुम्माक्त। 39 मोपा मेको आन गेयम पतीके ग्रांग्रा दिशो दुम्शा, तेल्लेम खोदेंशो दुम्मा बाक्त।
40 मोपतीके परमप्रभु यावे आ मुर नु गाइक्ता बाक्त। आ योव़शो मुर आन कली तशा ग्रांग्रा दिमाक्त। 41 मिनु मेकोमी मेको आन कली रागी रागी ङा मुर आन गुइम गेमी बाक्त। मिनु मेको आन जोरी सत्रुम मेको आन कली सासन पामे बाक्त। न्यायाधीस २:१४ 42 मिनु आन जोरी सत्रुमी मेको आन कली दिप्शा, आन सक्तिम हुकुम पामे बाक्त। 43 मिनु परमप्रभुमी मेको आन कली शुश खेयप प्रोंइमी बाक्त। तन्न मेकोपुकीमी गेनायो परमप्रभु कली मटीमे बाक्त। मेको आन मरिम्शो पतीकेमी खतम दुम्मा बाक्त। 44 तन्न परमप्रभुमी मेको आन ङाक्शो नेंशा, आन श्येत जशो रे प्रोंइमी बाक्त। 45 मिनु मेकोमी मेको आन कली पशो कबल मिम्ता बाक्त। मिनु मेको आ गेना हना यो शुश दाक्तीक ङा शिशी कोंइदीमी बाक्त। 46 मिनु परमप्रभुमी इस्राएली आन कली सासन पाइब आन थुंमी शिशी पतीक कुर पवा बाक्त। 47 मिनु गे “परमप्रभु यावे, आंइ परमप्रभु, आंइ कली प्रोनीन। मिनु इन कली ‘गे रिम्शो पाइब बाक्नीनी’ देंचा कली नु इन नें ठेयब सेल्शा ग्येरसीचा कली आंइ कली रागी रागी रे खुप्तीन। ब्यवस्था ३०:३; १इतिहास १६:३५
48 परमप्रभु यावे, इस्राएली आन परमप्रभु गेना हना यो ठेयब बाक्ल। मिनु मुरपुकीमी ‘मोदेंशो दुम्ल। आमेन’ देनीन” परमप्रभु यावे ठेयब बाक्ब। भजन संग्रह ४१:१४; १इतिहास १६:३६