Ebaruwa esookere eya Paulo yajojera
TIMOTHEEO
Amangʼana ku owuimpi
Ebaruwa eno ne endala ku ebaruwa ezia Paulo yajoja na amiire okufuma mu owusiwe Rooma mu emiaka egia 60–62. Ni yawanga ku olugendo lwae olwa okune olwa okulanzia *injiili, yareka Tiito ku omugizi ogwa Kireete na awarra ekaniisa eri ao, ni Timotheeo iye yawanga Efeeso na atunzia ekaniisa eri eyo. Paulo iye yagia ku omugizi ogwa Filiipi oguri Makedoonia kandi eyo nio yajojera ebaruwa eno.
Paulo yalaganga Timotheeo okuwa amankaga na amanyire mbwe no omuntu awurra engerera embiiwi, aaza yagilonda. Kutio paka tumanye owuene kugere tuwuimerreko ni tulowa engerera embiiwi eya *Sataani areeta agati eya awantu awa Katonda kugere aone owulamu wuawu. Ekaniisa eya Efeeso yawanga ne eteekere mu amangʼana aga *Awayaudi aga okulonda endagirra ziawu, alala no okuganya mbwe ekialo ne ewintu ewirimo wiri ewiwiiwi, kandi mbwe oagala okugia ku igulu paka azire ewiokuria windi ne ewintu windi ewinywewua alala no okuwa alala no omukazi waao. Paulo agaania Timotheeo ku engerera zino kandi omuambia amaani awe *omukurumu owa *Kristo Yesu orindre amangʼana gaae. Lwona amusikirra ku ewintu ne enkola eya omukangasi owa ekaniisa asugaane awe nawio.
1
Amakeezio agasookere
1-2 Ku Timotheeo omwana wange mu okuganya okwa turi nakwo ku *Kristo. Nkujojera ebaruwa eno, inze Paulo, *omutumwa owa Yesu Kristo nikulondokana no okuagala okwa *Omwami Katonda omununuzi iifu alala no okwa Yesu Kristo, omuntu owa tuteereko emioyo giifu giona. Nyagala mbwe Soifu Katonda no Omwami iifu Yesu wawe awasiza ni iwue, wakuambre amagongi kandi wakulage owuolu wuawu.
Okusiagizia awagerezi awa owuweeyi
(1Timo 4:1–7; Tiit 1:10–11; 3:8–11)
3 Kiomo nyakulagirizia olwa nyawanga ni ngia Makedoonia mbwe oweere Efeeso, nyagala mbwe okole okuweera eyo, kugere osikirre awantu wandi eyo wareke okugerera engerera indi egawuuke ne eiifu.1Kori 4:17; 1Thes 2:11; Tiit 1:4 4 Lwona wagaanie wataaza wata amaingirizio gaawu ku eminayo, no okuwala waaguukwa okutawua. Wino wireeta mala okuikululana mu amangʼana okutatunzia omuntu-umuntu kandi okutatuusia okuagala okwa Katonda, okwa awari no okuganya ku Kristo engʼene niwo awaesa okutuusia.1Timo 4:7; 2Timo 4:4; Tiit 1:14; 3:9 5 Ekineene ekia owulagirizio wuifu wuno wureeta, no okuwa no olugonzi oluema mu omwoyo omulootu, omwoyo ogumanyire okugawula ewilootu ne ewiwiiwi, alala no okuwa no okuganya okuri kuwuene.Awaru 12:9; 1Timo 1:19; 2Timo 1:3; 2:22; Tiit 1:15 6 Awantu wandi wamiire okureka engerera zino, wagaluka waingira mu entaka eziwula ne emirimo.1Timo 6:4, 20; Tiit 1:10 7 Wagala okuwa awagerezi awa *ensikirra ezia Katonda, kukawa mbwe ngawamanyire ewintu ewia wagamba-gambako nakuwa amangʼana aga wawoola no owusiani.1Timo 4:1–10; 6:3–5, 20–21; 2Timo 2:16–18, 23–26; Tiit 1:10–16; 3:9–11
8 Ni tumanyire mbwe ensikirra ndootu ne ekorrwe nayo mu engira endootu.Awaru 7:12 9 Lwona tumanye mbwe ensikirra ngazikateerwao awantu awigolovu, ni ziateerwao awantu awatatiire ensikirra na awa ekimage, awatatiire Katonda na awooni. Kandi ziateerwao awataganyire ku Katonda na awagamba-gamba uwiiwi ku Katonda, awaita waaswawu ni waangʼinwawu, awiisi na 10 awasondo. Lwona ziateerwao awantu awaitala na awakazi nakuwa na awasaaza awiina waawu, awaguzi awa awantu na awaweeyi, awaifuuwa wusaasa alala na awakola ewindi wiona ewitalondokana ne engerera endootu eya Kristo.Gala 3:19; 5:19–211Timo 6:3; 2Timo 1:13; 4:2–3; Tiit 1:9; 2:1, 7–8 11 Engerera eituukrana mu amangʼana amalootu agalagana owunene owua Katonda osugre no okutondowolwa. Katonda yata amangʼana amalootu gano mu amakono gange kugere ngalage awantu.
Paulo aikaziizie Katonda ku owusiza wuae
12 Nyiranizia Omwami iifu Yesu Kristo, omiire okumpa amaani, otioo ino aeniki yantoola ki omuntu osugre, okwagera anta mu emirimo giae. 13 Yankorra otio kukawa mbwe kale nyawanga ni mugamba-gambako uwiiwi, ni nyaasia awaawanga ni wamuganyireko kandi nyawanga omululu pe. Kukawa kutio, nya-ambrwa amagongi aeniki nyakolanga ewio mu okutamanya ni mbula okuganya ku Yesu.Awat 8:3 14 Omwami Katonda yandaga owusiza wuae owungi owuluguulwa kandi yampa omwoyo ogwa okugonzia awantu alala no okuwa no okuganya ku iye. Wino wituuzra ni turi mu owulala ni Kristo Yesu. 15 Olugambo oluwoola mbwe, “Yesu Kristo yaaza ku ekialo kugere anunule awooni” luri kuwuene kandi awantu woona wasugaane waganye nalwo. Inze omwene ni inze omwoni omunene okukira awooni wandi woona.Luuk 15:2; 19:10; Awaru 5:8 16 Ni Katonda yampambra amagongi kugere ni kuwitra ku inze, omuntu omwoni omunene okukira awooni wandi woona, Yesu Kristo alagane owuorevu wuae na awooni, awaazanga okumuganyako kugere woona watuukre owulamu owutariwua ku iye.1Kori 15:9–10 17 Katio Katonda Omwami owa amiire goona, Katonda omulala engʼene otafwa kandi otawonwa aeewue owunene no owuti amiire goona. *Amin.
18 Timotheeo mwana wange, nku-aa ensikirra eno, ewurzania na amangʼana aga *awagambi waakugamba-gambako mbwe gaaza okukuikorra. Gaingizie kandi londokana nayo kugere olwanagane geeza na awagerezi awa owuweyi.1Kori 9:24–25; 1Timo 4:14; 6:12; 2Timo 4:7–8 19 No okola otio, otareka okuwa no okuganya alala no omwoyo ogutakukengera ekiina. Wario awantu awamiire okulowa amangʼana gano kandi waona okuganya okulootu okwa waawanga nakwo.1Timo 1:5 20 Walala ku awantu awo ni Imanuusi ni Aleksanda, awantu awa miire okureka mu amakono aga *Sataani kugere waigerere owuwi owua okugamba-gamba uwiiwi ku Katonda.1Kori 5:5; 2Timo 2:17; 4:14
1:3 1Kori 4:17; 1Thes 2:11; Tiit 1:4
1:4 1Timo 4:7; 2Timo 4:4; Tiit 1:14; 3:9
1:5 Awaru 12:9; 1Timo 1:19; 2Timo 1:3; 2:22; Tiit 1:15
1:6 1Timo 6:4, 20; Tiit 1:10
1:7 1Timo 4:1–10; 6:3–5, 20–21; 2Timo 2:16–18, 23–26; Tiit 1:10–16; 3:9–11
1:8 Awaru 7:12
1:10 Gala 3:19; 5:19–21
1:10 1Timo 6:3; 2Timo 1:13; 4:2–3; Tiit 1:9; 2:1, 7–8
1:13 Awat 8:3
1:15 Luuk 15:2; 19:10; Awaru 5:8
1:16 1Kori 15:9–10
1:18 1Kori 9:24–25; 1Timo 4:14; 6:12; 2Timo 4:7–8
1:19 1Timo 1:5
1:20 1Kori 5:5; 2Timo 2:17; 4:14