Ebaruwa eya Awaibrania ne endala ku ebaruwa eya omujoji wayo ngamanyiike geeza. Awandi wawoola mbwe Apolo nio owagijoja, na awandi mbwe Baranabaasi. Agati eya emiaka egia 400 kutuuka 600. Lwona wario awandi awaaingirizianga mbwe Paulo nio owajoja ebaruwa eno. Kuwonekana mbwe yajojwa mu omwaka ogwa 70 ne *ekaalu eya Yerusaleemu ekiari okuonwa, aeniki omujoji agamba-gamba ku emisango egia *endagano enkulu egiawanga ni gikolwa mu ekaalu. Omujoji awona mbwe emisango egio giawanga ampi okuwua.

Ebaruwa eno egamba-gamba ku Yesu *Kristo ki omulala oambania Awakristo woona. Yesu alaganiwua ki okirre *enyankoi, Muusa na *Awoozia awanene awa endagano enkulu, aeniki iye nio Omuozia omunene owa kuwuene kandi otuukre, oambania awantu ni Katonda ilala. Kutio, Owukristo wuri kungulu okukira namba ediini eya *Awayaudi, aeniki Kristo yawa omusango omulala ogusugre okukira giona egia awoozia awa Awayaudi waafumia ku emiaka giona. Iye omwene yawa Omuozia kandi aifumia omwene ki igondi, kutio yakola endagano empia na awantu woona ku ekialo aa endagano enkulu yawanga agati ya Katonda na Awayaudi wengʼene. Endagano empia eno yagamba-gambwako na *Awagambi mu Endagano Enkulu mala kiomo omujoji owa ebaruwa eno alagana, na aingizia amangʼana aga Yeremia 33:31–34 mu Awaibrania 8:8–12. Owutuukre, omujoji ajoja ku awantu awatiirwe mu omunayo ogwa Awaisraeli awamanyiike ku okuwa kwawu no okuganya. Kutio, Awakristo woona walagiriziwua okuwarra ku Yesu owa okuganya kwawu kutanikirra, okuemerra mu owutanikro nawuno mu owutuuko.