Endagano Empia AWAIBRANIA 2

Engira eya owuinunuzi

1 Kutio paka tutege amatwi ino kandi tuambe amangʼana aga tumiire okuwurra, kugere tutaema mu engira endamu. 2 Aeniki, ni kuri mbwe amangʼana aga *enyankoi yawoola gawanga na amaani kandi awantu woona awaalowa okugalonda nakuwa awaagatambuka waaswawukwa enswawuka esugre nawo. 3 Katio ifwe tukamizuka tutie ni tutoorre owuinunuzi owukaate wuno wutono? *Omwami Yesu nio owasooka okulanzia ku owuinunuzi wuazane, kandi awantu awaamuwurra woona waatusigikra amangʼana ago mbwe gawanga kuwuene. 4 Katonda oona yalagana mbwe amangʼana gano gari kuwuene mu okukola ewilago ne ewintu ewiluguulwa, na amankono agagawukane-gawukaane alala ne empanwa ezia *Omwoyo Omweru ezia yaesana nikulondokana no okuagala kwae omwene.

Yesu nio owa tutuukrako owuinunuzi

5 Katonda ngakata ekialo ekia tugamba-gambako mbwe turinda okuuza, mu owukangasi owua enyankoi yawa. 6 Na ario mu endagano ansi aa omuntu wundi agamba-gambre na awoola otino,

“Kane omuntu ofwa ariki, owa okainyaasia okuingirizia amangʼana gaae,

omuzia owa omuntu aiwuule ariki, owa amangʼana gaae gakakuamba?

7 Waamuisia ansi awa omutono* okukira enyankoi

nikuemao wamu-aa owunene no owuti

8 kandi otoola owukangasi owua ewintu wiona o-aa omuntu ofwa.”†

Ku oku-aa omuntu ofwa owukangasi owua ewintu wiona, okwo kulagana mbwe kiwulao-uwula ekia Katonda yareka na atateere ansi eya owukangasi owua omuntu ofwa. Ni kukawa kutio, nyingeeno ngatuwona ne ewintu wiona wiri ansi eya owukangasi owua omuntu, yaaya. 9 Ni tuwona ni Yesu, owaisiwua ansi awa omutono okukira enyankoi, na aeerwe owunene no owuti aeniki yafwa olumbe oluwiiwi kugere, ku owusiza owua Katonda, afwire awantu woona.

10 Kwaweera Katonda, omwene ewintu wiona kandi ogera ewintu wiona ni wiwaao wulootu, mbwe Yesu awone eminyako-nyaako. Yakola otio na agala mbwe Yesu awe omukangasi omutuufu owulako embala, ooza okureeta awaana waae awangi mu owuinunuzi kugere wawe mu owunene owuae. 11 Kutio tutuukra mbwe awantu awaeruyiwua alala no omuntu owaeruyia, woona wari awantu awa omuntu omulala. Ekio nikio ekigera ni Yesu awula ne ensuuko okuwaeta waamwawu waae. 12 Omwene yalaga Katonda otino,

“Nyiza okulaga waamwifu eriina riao,

kandi nyiza okuemba enyembo ezia okukutondowola mu okuikumia okwa awakusawa.”†

13 Kandi lwona mbwe,

“Nyiza okuta okuganya kwange ku Katonda.”†

Kandi awoola mbwe,

“Mpano ndi ano, na awaana awa Katonda yampa.”†

14 Kutio aeniki awaana awa Katonda wari awantu awayaluka ne emiwiri na amasaai, Yesu omwene oona yatoola embonekano eya omuwiri ogwa omuntu, kugere ni kuwitra ku olumbe lwae aone amaani aga *Ekikeeno ekiawanga ni kiambiriire amaani aga olumbe 15 kandi asiwule awantu, awa mu owulamu wuawu wuona, waawanga mu owusiwe owua okutia olumbe, wawe owuyanga. 16 Ni kuwuene mbwe Yesu ngakaaza okutunzia enyankoi, ni na awiizukulu awa Abraamu niwo yaaza okutunzia. 17 Kino nikio ekiagera ni kuagalana mbwe paka awe ki waamwawu waae mu engira ziona, kugere awaweere *Omuozia omunene ori na amasaasra kandi orindre endagano. Nikuemao aifumie ki omusango† ogutoolao amawi aga awantu. 18 Aeniki Yesu omwene yainyaasia olwa yageezaniwua, aesa okutunzia awantu awageezaniwua.

2:2 Awat 7:53

2:3 Awaib 10:29; 12:25

2:4 Yowa 2:11; 10:37–39; Awat 15:12; 19:11; 1Kori 12:4–11

*2:7 Namba ku enyinga enyipi; kugia mu amiiso amatono 9.

†2:8 Zabu 8:4–6

2:8 1Kori 15:27

2:9 Filiip 2:8–9

2:10 Awaru 11:36; Luuk 24:26; Awaib 5:8–9; 7:28; 12:2

2:11 Math 25:40; Mari 3:35; Yowa 20:17

†2:12 Zabu 22:22

†2:13 Isaa 8:17

†2:13 Isaa 8:18

2:14 Yowa 1:14; Owut 3:15; 1Kori 15:54–57; 1Yow 3:8

2:16 Yowa 8:39; Awaru 4:16; 9:6–8; Gala 3:7, 29

†2:17 Namba kandi mbwe oguwarizia okusu okwa Katonda, ale na awantu awooni.

2:17 Filiip 2:7; Awaib 5:2; 1Yow 2:2

2:18 Awaib 4:15