পবিত্র ইঞ্জিল শরিফ ১৯ নম্বর ছিপারা
আল-ইবরানি
পরিচিতি
পবিত্র আছমানি কিতাবর অউ আল-ইবরানি ছিপারা লেখছইন, আল্লা পাকর হুকুমে হজরত ইছা আল-মসীর একজন সাহাবিয়ে। হজরত ইছায় বেহেস্তো তশরিফ নেওয়ার অনুমান ৩০-৩৫ বছর বাদে অউ ছিপারা লেখা অইছে। হজরত মুছার (আ:) উম্মত ইহুদি ধর্মর যেতা মানষে হজরত ইছার তরিকা কবুল করছিলা, তারা নানান নমুনার বিপদো পড়লা, অউ বিপদর লাগি তারার মাজর কেউ কেউ হিরবার পুরানা ধর্মত ফিরিয়া যাইতাগি চাইছইন, এরারে উত্সাহ দিবার লাগি অউ ছিপারা লেখা অইছে।
আমরা জানি, দুনিয়ার হকল ধর্মর এবাদত খানার মাজে একটা খাছ পবিত্র জাগা বা হেরেম শরিফ থাকে, এর ভিতরে সাধারন এবাদতকারি হামানি নিষেধ। অতা থাকি আমরা বুজি, ধর্ম মানিয়া আল্লার ধারো যাইবার উপায় নাই, কুনুমন্তেউ আল্লার খাছ দিদার মিলে না। তান দিদার মিলে খালি হজরত ইছা আল-মসীর উছিলায়; যেলা ই ছিপারার ৯ রুকু ২৪ আয়াতো আছে, “আল-মসী তো মানষর আতর বানাইল কুনু পাক জাগাত হামাইছইন না, তাইন খালি আসল বেহেস্তো হামাইছইন, যাতে আমরার নাজাতর লাগি আল্লার ছামনে অখন আজির অইতা পারইন।” আর ১০ রুকু ১৯ আয়াতো আছে, “এরলাগিউ ও ভাই অকল, হজরত ইছা আল-মসীর লউর জরিয়ায়, আমরা বেহেস্তি খাছ পাক জাগাত হামানির সাওস পাইছি।”
এরমাজে আছে,
(ক) নবী আর ফিরিস্তা অকল থাকি ইছা আল-মসী মহান ১-২ রুকু
(খ) আল-মসীর জরিয়ায়উ আল্লার দেওয়া আরাম ৩:১-৪:১২ আয়াত
(গ) হকল কুরবানি থাকি আল-মসীর কুরবানি মহান ৪:১৩-৭:২৮
(ঘ) আল্লার লগে মিলনর নয়া আর চিরকালিন উছিলা ৮-১০ রুকু
(ঙ) ইমানি বুজুর্গান আর আল-মসীর বায় চাইয়া ছামনেদি দৌড়াই ১১-১৩ রুকু
নবী আর ফিরিস্তা অকল থাকি ইছা আল-মসী মহান (১:১-২:১৮)
1
হজরত ইছা আল-মসীউ কলিমাতুল্লা
1 আল্লা পাকে আগর জমানাত নানান নমুনায় নবী অকলর মাজদিয়া আমরার ময়-মুরব্বি অকলর গেছে টুকরা টুকরা করি ওহী বেজিছইন, 2 অইলে অখন আখেরি জমানাত আইয়া তাইন ওহীরে মানুষ ছুরতে সরাসরি বেজিছইন। অউ মানুষ অইলা আল্লার খাছ মায়ার পুতর লাখান, এন নামউ কলিমাতুল্লা, মানি আল্লার ওহী। অউ মায়ার পুত কলিমাতুল্লার আতোউ তাইন হক্কলতার মালিকানা দিলাইছইন, এন উছিলায় আছমান-জমিন আর হক্কলতা পয়দা অইছে। 3 এইনউ অইলা আল্লার শান-তজল্লির নুর, তান মাজদিয়াউ আল্লা পাকে নিজরে জাইর করছইন। অউ মায়ার পুত কলিমাতুল্লার হুকুমর বলে, তামাম জগতর হক্কলতা চলে। তাইন দুনিয়ার মানষর গুনারে ধইয়া ছাফ করিয়া, আরশে-আজিমো আল্লার ডাইনর তখতো তশরিফ রাখছইন।
ফিরিস্তা অকল থাকি হজরত ইছা মহান
4 ইতা দেখিয়া আমরা বুজি, আল্লায় তানরে ফিরিস্তা অকল থাকি আরো বেশি মরতুবা আলা নাম দিছইন, আর যেলা নাম অউলা ইজ্জতও দান করছইন। 5 আল্লায় কুনুদিন কুনু ফিরিস্তারে ইলা কথা কইছইন না,
তুমি তো আমার পুত,
আইজ আমিউ তুমার বাফর লাখান অইলাম।
বা,
আমিউ তার বাফর লাখান অইমু
আর হে অইবো আমার পুত।
6 তাইন যেবলা তান খাছ পরধান পুতরে দুনিয়াত বেজিলা, অউ সময় ফিরিস্তা অকলরে হুকুম দিলা,
ও ফিরিস্তা অকল, তুমরা এনরে সইজদা করো।
7 আল্লায় ফিরিস্তা অকলর বেয়াপারে কইরা,
ফিরিস্তা অকলরে তাইন হাওয়ার নমুনায় পয়দা করছইন,
নিজর খাদিম অকলরে আগুনির ফুলকির লাখান বানাইছইন।
8 অইলে অউ পুতর বেয়াপারে তাইন কইরা,
ইয়া-এলাহি, তুমার তখত হর-হামেশা বওয়াল রইবো,
তুমার ইনছাফউ অইলো হক ইনছাফ,
9 তুমি নাফরমানিরে ঘিন্নাও আর দীনদারিরে ভালা পাও,
এরলাগি আল্লায়ও, তুমার আল্লায় তুমারে খেলাফতি দিছইন,
তুমারে ইজ্জতি গদি দান করছইন,
তুমার ভাই-বিরাদর থাকিও
তুমারে বউত বেশি খুশি দিছইন।
10 আল্লায় আরো কইরা,
ও মালিক, তুমিউ পয়লা দুনিয়ার ইয়ান খুটি গাড়িছো,
আছমান অকলও তুমার আতে পয়দা করছে।
11 ইতা হক্কলতা বিনাশ অইযিবো,
অইলে তুমি তো হামেশা বওয়াল রইবায়।
ইতা কাপড়র লাখান পুরান অইযিবো,
12 তুমি ইতারে চাদ্দরর লাখান ভাইঞ্জ করিয়া থইবায়,
ফিন্দিবার কাপড়র লাখান ইতা হক্কলতা বদলাইবায়।
অইলে তুমি যেলা আছো, অউলাউ রইবায়,
তুমার হায়াতি কুনুদিনউ ফুড়াইতো নায়।
13 আর আল্লায় কুনুদিন কুনু ফিরিস্তারে ইলা কথা কইছইন না,
তুমার দুশমন অকলরে যতদিন তুমার পাওর তলাত না ফালাই,
অতো দিন তুমি আমার নিজর তখতর ডাইন গালাত বও।
14 ফিরিস্তা অকল তো খালি খেজমত কররা রুহ নায় নি? যেরা নাজাত হাছিল করবা, তারার উপকার করার লাগিউ এরারে বেজা অইছে।