পবিত্র ইঞ্জিল শরিফ ১৮ নম্বর ছিপারা
আল-ফিলিমন
পরিচিতি
আল্লা পাকর হুকুমে হজরত ইছা আল-মসীর খাছ সাহাবি হজরত পাউলুছে (রা:) অউ ছিপারা লেখছইন। হজরত ইছায় বেহেস্তো তশরিফ নেওয়ার অনুমান ২৭ বছর বাদে ইখান চিঠির আকারে লেখা অইছে।
হজরত ফিলিমন আছলা ইছা আল-মসীর একজন নামকরা উম্মত। তাইন কলোছি টাউনর ইছায়ী জমাতর এক জন। অনিছিম নামে তান এক খরিদা গুলাম আছিল। হজরত পাউলুছ (রা:) যেবলা জেলো বন্দি আছলা, অউ সময় অনিছিম তার মুনিব ফিলিমনর গেছ থাকি বাগিয়া কুনু ছুরতে পাউলুছর গেছে আইছিল। হজরত পাউলুছর মাজদিয়াউ অনিছিম ইছায়ী ইমানদার হিসাবে পাউলুছর একজন বিশেষ খাদিম অইছইন। তারা দুইওজনে পরামিশ করলা, অনিছিম তান মুনিব ফিলিমনর গেছে ফিরিয়া যাইবা, আর তান আগর ভুল স্বীকার করিয়া মাফ চাইবা। হজরত পাউলুছে ফিলিমনর গেছে অনুরোধ করি লেখলা, তাইন যানু তান আগর গুলামরে ফিরত নেইন আর অখন খালি গুলাম হিসাবে নায়, একজন ইছায়ী ভাই হিসাবেও সমজিয়া নেইন।
অউ ছিপারাত দেখা যায়, গুলাম আর মুনিবর মাজে কুনু ভেদাভেদ নাই, হজরত ইছার উম্মত অওয়ার বাদে হকলউ এক সমান। আর জমাতর মুরব্বি নেতা হজরত পাউলুছে সাধারন মুমিন অকলর উপরে নেতাগিরি, হুকুমদারি না করিয়া বরং নিজরে নিচা করিয়া জমাত অকল চালাইরা। তান মাজে কুনু বেটাগিরি বা বড়াই-বাহাদুরি নাই।
এরমাজে আছে,
(ক) হজরত পাউলুছর ছালাম ১:১-৩ আয়াত
(খ) হজরত পাউলুছে ফিলিমনর তারিফ করলা ১:৪-৭
(গ) অনিছিমরে ফিরত নেওয়ার লাগি অনুরোধ ১:৮-২১
(ঘ) হজরত পাউলুছর শেষ কথা ১:২২-২৫
1
হজরত পাউলুছর ছালাম
আমি পাউলুছ, ইছা আল-মসীর লাগি বন্দি আছি। আমি আর আমরার ভাই তিমথিয়ে, আমরার লগর তবলিগ কররা মায়ার দুস্ত ফিলিমনর গেছে লেখরাম। বইন আফিয়া, আমরার লগে ইমানর যুদ্ধা আর্খিপাছ আর তুমার বাড়ির জমাতর হকলরে ছালাম জানাইরাম।
আমরার গাইবি বাফ আল্লা পাকে আর হজরত ইছা আল-মসীয়ে তুমরার উপরে রহমত আর শান্তি নাজিল করউক্কা।
হজরত পাউলুছে ফিলিমনর তারিফ করলা
আমি হামেশা মুনাজাতর সময় তুমার কথা ইয়াদ করিয়া আল্লার শুকরিয়া আদায় করি। কারন হজরত ইছা আল-মসীর উপরে তুমার ইমান আর পাক বন্দা অকলর বায় তুমার মহব্বতর কথা আমি হুনছি। আমি দোয়া করি, মুমিন অকলর লগে তুমার খাতির-সম্পর্ক আরো বাড়উক। তুমি তো জানো, আল-মসীর খাতিরে আল্লায় আমরারে কতো ভালা ভালা নিয়ামত বিলাই দিছইন। ভাই, তুমার মহব্বত দেখিয়া আমি খুব খুশি অইছি আর উত্‍সাহ পাইছি, তুমি তো আল্লার পাক বন্দা অকলর দিলো আরাম দিছো।
অনিছিমরে ফিরত নেওয়ার লাগি অনুরোধ
তুমার ই ভাব দেখিয়া আমি তুমারে এখান কথা কইতাম চাইরাম। আমি তো আল-মসীর নামে তুমারে হুকুম দিতাম পারলাম অনে, তুমার কাম পুরা করার লাগি। অইলে মহব্বতর খাতিরে হুকুম না দিয়া তুমারে মিনত করিয়ার। আমি পাউলুছ অউ মুরব্বি বয়সো আল-মসীর লাগি বন্দি হালতে তুমার গেছে ই মিনতি কররাম। 10 আমার আওলাদ অনিছিমর লাগি আরজি জানাইরাম, আমি জেলো বন্দি থাকা হালতে হে ইমান আনিয়া আমার আওলাদ বনিগেছে। 11 এক সময় তুমার গেছে হে বেকামা আছিল, অইলে অখন আমার আর তুমার গেছে হে বউত কামাওরা বনিগেছে।
12 যাই অউক, আমার জানর থাকি বেশি মায়ার অউ মানষরে আমি তুমার গেছে ফিরত পাঠাইরাম। 13 আমি তারে আমার গেছে রাখতাম চাইছলাম, যাতে খুশ-খবরির দায় বন্দি হালতে তুমার অইয়া হে আমার খেজমত করতো পারে। 14 অইলে তুমার ইজাজত ছাড়া আমি কুন্তা করলাম না, যাতে জুর করিয়া তুমার ভালা কাম আদায় করা না লাগে। আমি চাইরাম, তুমি নিজ থাকিউ অউ কাম করো। 15 তুমি যাতে চিরকালর লাগি তারে ফিরিয়া পাও, অইতো পারে অউ কারনেউ হে তুমার গেছ থাকি থুড়া দিনর লাগি হরিয়া আছিল। 16 অইলে তুমি অখন তারে আর গুলাম হিসাবে পাইতায় নায় বরং গুলাম থাকি বড়, মানি মায়ার ভাই হিসাবে পাইবায়। খাছ করি হে আমার খুব মায়ার মানুষ, অখন তুমার গেছেও হে আরো মায়ার, খালি রক্ত-মাংসে নায়, ইমানদার ভাই হিসাবে মায়ার।
17 এরদায় তুমি যুদি আমারে একই ইমানর ভাগি জানো, তে আমারে যেলা কবুল করার কথা, তারেও অলা কবুল করিও। 18 হে যুদি তুমার কুনু খেতি করিয়া থাকে আর তার গেছে তুমার কুনু পাওনা থাকে, তে মনো করিও, ই পাওনা তুমি আমার গেছে পাও। 19 আমি পাউলুছে নিজর আতে লেখিয়া জানাইরাম, তুমার পাওনা আমি দিলাইমু। আসলে আমি কইতাম চাইরাম না যে, তুমার নিজর জানর লাগিউ তুমি আমার গেছে রিনি আছো। 20 ভাই ফিলিমন, আল্লার ওয়াস্তে এখান কাম করো, একজন ইমানদার ভাই হিসাবে আমার জানো আরাম দেও। 21 তুমি আমার কথা রাখবায় জানিয়াউ, তুমার গেছে অউ চিঠি খান লেখলাম। আমি মনো করি, আমি যেতা করার লাগি কইরাম, এরথাকি বেশি তুমি করবায়।
হজরত পাউলুছর শেষ কথা
22 হুনো, আরো এখান কথা কইরাম, তুমি আমার লাগি মেহমানর কুঠা ঠিক করিয়া রাখিও। কারন আমি আশা কররাম, তুমরার দোয়ার উছিলায় আমারে তুমরার গেছে ফিরত দেওয়া অইবো।
23 আবু-ফারাছে তুমারে ছালাম দিছইন, তাইন ইছা আল-মসীর লাগি আমার লগে অইয়া বন্দি আছইন। 24 আর আমার লগর তবলিগকারি মার্কুছ, আরিস্তাকুছ, দিমাছ আর লুকেও তুমারে ছালাম জানাইরা।
25 আমরার হজরত ইছা আল-মসীর রহমত তুমরার দিলো কাইম রউক। আমিন॥