1 “কুনু মানষে যুদি নিজর চউখে দেখা বা কানে হুনা কুনু ঘটনা জানে, আর বিচারর কালো আদালতো সাক্ষির সুযোগ পাইয়াও সাক্ষি না দেয়, তে ইতার লাগি হে গুনা করে, তার ই অপরাধর সাজা হে বইবো।

2 “কেউ যুদি না জানিয়া কুনু নাপাক জিনিস ছইলায়, তে হে নাপাক আর দুষি বনবো। ইতা কুনুজাতর জংলি হারাম মরা পশু, ঘরো পালা কুনু মরা জানদার বা মাটির মাজে বুকে চলরা যেকুনু মরা জানদাররে না জানিয়া ছইলেও দুষি-নাপাক বনবো।

3 “মানষর শরিলরে যেতায় নাপাক করিলায়, শরিল থাকি বারইল অউ লাখান কুনুতা কেউ যুদি না জানিয়া ছইলায়, তে ইতা জানার বাদে হে দুষি অইবো।

4 “আখল-বিবেক না খাটাইয়া আখতা যুদি কেউ কুনু কছম করিলায়, ভালা বা বুরা কুন্তা করমু কইয়া মনর বে-খিয়ালে কেউ কুনু কছম খাইলেও, হে যেবলা ইখান বুজিলিবো অউ সময় হে দুষি বনবো।

5 “অউ লাখান যেকুনু অপরাধ করিয়া কেউ দুষি বনিগেলে, হে নিজর গুনারে স্বীকার করতে অইবো। 6 আর অউ গুনার জরিমানা হিসাবে হে মাবুদর নামে, গুনার কফরার কুরবানির নিয়তে একটা মেড়ি বা ছাগি আনবো, আর ইমামে তার গুনার কফরা আদায় করবা।

7 “আর হে যুদি মেড়ি বা ছাগি আনতে অপারগ অয়, তে অউ গুনার জরিমানা বাবত দুইটা ডুপি পাখি বা পারো আনিয়া মাবুদর নামে দিতে অইবো। ইতার মাজর এগু অইবো গুনার কফরার কুরবানি, আর দুছরাটা জালাইল কুরবানি। 8 আর হে ইতা আনিয়া ইমামর আতো দিবো, ইমামে গুনার কফরার কুরবানি হিসাবে পয়লা এগু পাখিরে কুরবানি দিবা। তাইন অগুর কল্লা মুরাইয়া মারবা, অইলে কল্লা আলগাইতা নায়। 9 বাদে অগুর থুড়া লউ নিয়া কুরবানি খানার চাইরো গালাত ছিটাই দিবা, আর বাদ-বাকি লউ কুরবানি খানার তলে ঢালি দিবা। ইতা অইলো গুনার কফরার লাগি কুরবানি। 10 আর দুছরা পাখিটারে ইমাম ছাবে নিয়ম মাফিক জালাইল কুরবানি দিবা। দিয়া, তার গুনার কফরা আদায় করবা, তেউ হে মাফি পাইবো।

11 “আর যুদি অউ গুনার কফরার লাগি দুইটা ডুপি পাখি বা পারো আনতো না পারে, তে হে দুই সের ময়দা আনতে অইবো। ইতা গুনার কফরার কুরবানি অওয়ায় ইতার উপরে কুনু তেল বা লোবান-আগর দিও না। 12 অউ ময়দা লইয়া হে ইমামর গেছে যাইবো, গেলে অউ আস্তা কুরবানির বদলা নিশানা হিসাবে এক মুইট ময়দা ইমাম ছাবে কুরবানি খানার উপরে মাবুদর নামে জালাইলিবা। ইতা অইলো মাবুদর নামে গুনার কফরার কুরবানি। 13 হে যে অপরাধ করছে, অতার মাফির লাগি ইমামে অলা কফরা আদায় করবা, তেউ তার গুনার মাফি পাইবো। আর কুরবানি দেওয়ার বাদে ই ময়দার যতখান রইবো, ধান-গমর ছদগার লাখান ইতা হকলতা ইমামে পাইবা।”

14 বাদে মাবুদে মুছা নবীরে কইলা, 15 “কেউ যুদি না জানিয়া মাবুদর পাক-পবিত্র কুনু মাল-ছামানার বেয়াপারে এমনেউ কুনু দুষ-কছুরি করিলায়, তে অউ গুনার জরিমানা হিসাবে এবাদত খানার মাপে যত তোলা রুপাদি মেড়ার দাম ঠিক করা অয়, তে হে তার নিজর পাল থাকি অউ পরিমান দামর বা হমান দামদি কিনিয়া নিখুত এগু মেড়ার পাঠা মাবুদর নামে কুরবানি দিতে অইবো। ইতা তো দুষ-কছুরির কফরার কুরবানি। 16 আর হে অউ পাক-পবিত্র মাল-ছামানার বেয়াপারে যে দুষ-কছুরি করছে, ইতার খেতি-পুরনও দিতে অইবো। হে অউ মেড়ার দামর লগে আরো পাচ বাটর এক বাট পরিমান নগদ টেকা ইমাম ছাবর আতো দিবো। বাদে ইমামে তার কছুরি মাফির নিয়তে অউ মেড়ারে নিয়া দুষ-কছুরির কফরার কুরবানি আদায় করিয়া হারলে, হে মাফি পাইবো।

17 “আর কুনু মানষে যুদি ভুল করিয়া না জানিয়া আল্লার নিষেধ করা কুনু দুষ-কছুরির কাম করিলায়, তে ইতার লাগি হে দুষি। ই গুনার লাগি তারে দায়ী করা অইবো। 18 হে তার অউ দুষ-কছুরির কফরা হিসাবে, এগু নিখুত মেড়ার পাঠা বা এর দাম আনিয়া ইমাম ছাবর গেছে দিবো। হে না জানিয়া যে দুষ-কছুরি করিলিছে, ইমাম ছাবে অতার কফরা আদায় করবা, তেউ তার মাফি মিলবো। 19 ইতা তো দুষ-কছুরির কফরার কুরবানি, হে মাবুদর দরবারো দুষ করছে।”