1 মাবুদে মুছা নবীরে আরো কইলা, 2 “হুনো, কুনু মানষে যেবলা তার আরি-ফরির লগে হারামি করিয়া মাবুদর দরবারো গুনা করে, তার গেছে থওয়া আমানত বা বন্ধকি জিনিসর খিয়ানত করে, বা চুরি করি কুনু মাল নেয় বা ঠগাঠগি করে, ছল-চতুরি করিয়া বেইমানি মাতে, 3 তুবাইয়া পাওয়া মালর বেয়াপারে বেইমানি মাতে বা অতা হক্কলতার বেয়াপারে কুনু মিছা কছম খায়, বা অউ লাখান আরো কুনু গুনা করে, 4 তে অউ নমুনার গুনা করিয়া অপরাধি বনায়, হে যেতা মাল আত্মসাত করছে, বা ছল-চতুরি করিয়া নিছে, বা আমানতর খিয়ানত করছে, তুবাই পাওয়া মাল লুকাইছে, 5 বা যেকুনু মালর বেয়াপারে মিছা কছম খাইছে, ইতা হকলতা হে ফিরত দিবো, এরলগে জরিমানা হিসাবে আরো পাচ বাটর এক বাট বেশি দিবো। হে যেদিন তার দুষ স্বীকার করবো, অউ দিন মালর মালিকরে ইতা ফিরাই দিবো। 6 আর নিজর দুষ-কছুরি মাফির নিয়তে হে মাবুদর দরবারো কুরবানি লইয়া আজির অইবো, ইমাম ছাবর ঠিক করা দামর এগু নিখুত মেড়ার পাঠা লইয়া আইবো। 7 ইমামে মাবুদর দরবারো তার গুনার কফরা আদায় করবা। হে অতার মাজর যেকুনু গুনা করলে, অউ নমুনায় তার গুনার মাফি পাইবো।”

8 বাদে মাবুদে মুছা নবীরে কইলা, 9 “তুমি হারুন আর তার পুয়াইন্তরে হিকাই দেও, জালাইল কুরবানি আদায় করার মুছলা অইলো, কুরবানির পশু ফজর পর্যন্ত হারা রাইত কুরবানি খানার আগুনির উপরে রইবো, আর আগুইনও জালাইল রইবো। 10 বিয়ানি বালা ইমাম ছাবে সুতি কাপড়দি বানাইল হাফ-পেন্টর লাখান নিজর জাংগিয়াখান আর তান ইমামতির বাকি হকল সুতির লেবাছ ফিন্দিবা। ফিন্দিয়া কুরবানির পশু জালানির ছালি তুলিয়া নিয়া কুরবানি খানার কান্দাত থইবা। 11 বাদে তাইন অউ লেবাছ বদলাইয়া, দুছরা লেবাছ ফিন্দিয়া, অউ ছালিরে কেম্পর বারে কুনু পাক-ছাফ জাগাত নিয়া ফালাইবা। 12 অইলে কুরবানি খানাত আগুইন জালাইল রইবো, ইতা নিভতো না। পরতেক দিন বিয়ানে ইমামে অউ আগুনির উপরে জালানির দারু দিবা, দিয়া দারুর উপরে জালাইল কুরবানির পশুরে হাজাইবা, হাজাইয়া এর উপরে ছালামতি কুরবানির চর্বিরে জালাইবা। 13 হুশিয়ার রইও, কুরবানি খানার আগুইন হামেশা জলাত রইবো, ইতা কুনু সময়উ নিভতো না।

14 “ধান-গম ছদগার নিয়ম অইলো, হারুনর পুয়াইন থাকি একজন ইমামে অউ ছদগার ময়দা আর দরকারি হক্কলতা লইয়া কুরবানি খানার গেছে মাবুদর ছামনে আজির অইবা। 15 আর ইমামে অখান থাকি এক মুইট ময়দা, কিছু তেল আর ছদগার হকল লোবান-আগর নিয়া আস্তা ছদগার নিশানা হিসাবে অউ অংশরে কুরবানি খানার উপরে জালাইবা। ইতার ধুমার ঘেরানে তো মাবুদ খুশি অইন। 16 ছদগার মালর বাদ-বাকি অংশ ইমাম হারুন আর তার পুয়াইন্তে খাইবা। তারা ইতার মাজে কুনু খামির না মিশাইয়া রুটি বানাইবা, বানাইয়া মিলন-তাম্বুর উঠানো কুনু পাক জাগাত বইয়া খাইবা। 17 মনো রাখিও, কুনু খামির পুরাইয়া ইতারে ছেকিও না। আমার নামে দেওয়া জালাইল কুরবানির অউ অংশ আমি তারারে দিলাম। গুনার কফরার কুরবানি, আর দুষ-কছুরির কফরার কুরবানির লাখান ধান-গমর ছদগার অউ অংশও অইলো খাছ পবিত্র। 18 খালি ইমাম হারুনর বংশর হকল বেটা মানষে ইতা খাইতা পারবা, মাবুদর নামর জালাইল কুরবানির অউ অংশ তো ওয়ারিশর পর ওয়ারিশ ধরি তারাউ পাইবা। খুব খিয়াল রাখিও, যেছাতায় ইতার লগে লাগবো, অতাও পাক-পবিত্র বনিযিবো, মানি ইমাম অকলর বাইরা মানষর লাগি হারাম।”

19 মাবুদে মুছা নবীরে আরো কইলা, 20 “হারুনে যেদিন ইমামতির খেলাফতি সমজিয়া কামো বওয়াল অইবা, অউ দিন হারুন আর তার পুয়াইন্তে ধান-গমর ছদগার নিয়ম মাফিক দুই সের ময়দা মাবুদর দরবারো আনবা। ইতার অর্ধেক বিয়ানে আর অর্ধেক হাইঞ্জা বালা দিবা। 21 তারা তেল দিয়া খাই বানাইয়া তাওয়াত ছেকিয়া হারলে ইতা টুকরা টুকরা করিয়া মাবুদর ছামনে ধান-গমর ছদগা হিসাবে আজির করবা, ইতার ধুমার ঘেরানে মাবুদ খুশি অইন। 22 হারুনর বাদে তার যে পুয়ারে পরধান ইমাম হিসাবে খেলাফতি দেওয়া অইবো, হে-ও অউলা ছদগা আদায় করবো। ইতা তো মাবুদর হর-হামেশাকুর পাওনা, অউ ছদগার পুরা অংশ জালাইলিতে অইবো। 23 ইমাম অকলর নিজর দেওয়া ধান-গমর ছদগার হক্কলতা জালাইলিতে অইবো, ইতা খাওয়ার কুনু হুকুম নায়।”

24 বাদে মাবুদে মুছা নবীরে কইলা, 25 “তুমি হারুন আর তার পুয়াইন্তরে গুনার কফরার কুরবানির নিয়ম হিকাও। জালাইল কুরবানির পশুরে যে জাগাত জবো করইন, গুনার কফরার কুরবানির পশুরেও অনো জবো করবা। ই কুরবানির গোস্ত তো খাছ পবিত্র। 26 যে ইমামে অউ কুরবানি আদায় করবা, এইন অউ গোস্ত খাইবা। মিলন-তাম্বুর উঠানো পবিত্র জাগাত অউ গোস্ত খাইতে অইবো। 27 যেতা জিনিসে অউ গোস্তরে ছইবো, ইতা পাক-পবিত্র অইযিবো। কুনু কাপড়র মাজে যুদি এর লউর ছিটা লাগে, তে পাক-পবিত্র কুনু জাগাত ইতা ধইতে অইবো। 28 আর মাটির যে পাতিলো অউ গোস্ত রান্দা অইবো, ইতা বাদে ভাংগিলিবায়। অইলে পিতলর পাতিলো রান্দিলে ইটা মাঞ্জিয়া পানিদি ধইয়া পাক-ছাফ করবায়। 29 ইমাম বংশর যেকুনু বেটাইন্তে অউ কুরবানির গোস্ত খাইতা পারবা, ইতা তো খাছ পবিত্র গোস্ত। 30 অইলে গুনার কফরার কুরবানির পশুর লউ যুদি মিলন-তাম্বুর ভিতরে নেওয়া অইযায়, তে ই কুরবানির গোস্ত খাওয়া নিষেধ, ইতা জালাইলিতে অইবো।