27
মান্নত-ছদগা দিবার নিয়ম-কানুন
1 বাদে মাবুদে মুছা নবীরে কইলা, 2 “তুমি তামাম বনি ইছরাইলরে জানাই দেও, কেউ যুদি কুনু মানষরে আল্লার নামে দেওয়ার মান্নত করে, তে অউ জনর বদলা অলাখান হাদিয়া দিতে অইবো:
3 বিশ থাকি ষাইট বছর বয়সি বেটাইন্তর লাগি, এবাদত খানার মাপে পইঞ্চাশ তোলা রুপা হাদিয়া দিতে অইবো,
4 অউ বয়সি বেটিন্তর লাগি তিশ তোলা।
5 পাচ বছর থাকি বিশ বছর বয়সি পুয়াইন্তর লাগি বিশ তোলা রুপা,
অউ বয়সি পুড়িন্তর লাগি দশ তোলা।
6 একমাস থাকি পাচ বছর বয়সি পুয়াইন্তর লাগি পাচ তোলা রুপা,
অউ বয়সি পুড়িন্তর লাগি তিন তোলা রুপা।
7 ষাইট বছর বা এর বেশি বয়সি বেটাইন্তর লাগি পনরো তোলা,
অউ বয়সি বেটিন্তর লাগি দশ তোলা রুপা দিতে অইবো।
8 “অইলে অউ মান্নত কররা জন যুদি গরিব মানুষ অয়, তার মান্নতর হাদিয়া দিবার তাক্কত না থাকে, তে তারে লইয়া ইমাম ছাবর গেছে যাইবায়, গেলে ইমাম ছাবে তার হালত বুজিয়া হাদিয়া ঠিক করবা।
9 “যুদি কবুল অওয়ার জুকা কুনু পশুরে মাবুদর নামে মান্নত করা অয়, তে অউ পশুরে মাবুদর ছামানা হিসাবে পবিত্র কইয়া গইন্য করিও। 10 অউ পশুর বদলা দুছরা কুনু পশু দিলে কবুল অইতো নায়। ইটা ভালা অইলে এর বদলা বাদ পশু, বা বাদ অইলে এর বদলা ভালা কুনু পশু দিলেও কবুল অইতো নায়। হে যুদি একটার বদলা আরকটা পশুরে দিলায়, তে অউ দুইওটারে পবিত্র হিসাবে গইন্য করিও। 11 অইলে মাবুদর নামে কবুল অওয়ার জুকা নায়, ইলা কুনু নাপাক জাতর পশুরে কেউ যুদি মান্নত হিসাবে মানিলায়, তে অকটারে লইয়া ইমাম ছাবর গেছে যাইও, 12 গেলে তাইন অকটার হাল-হকিকত বুজিয়া হারি যে দাম ঠিক করবা, অউ দামউ অইবো ইটার সঠিক দাম। 13 মান্নত কররায় ইটারে খালাছ করার খিয়াল অইলে, অউ দামর লগে আরো পাচ বাটর এক বাট দাম বেশি দিতে অইবো।
14 “কেউ যুদি তার কুনু বাড়ি-ঘররে মাবুদর নামে পাক-পবিত্র ছামানা হিসাবে মান্নত করিলায়, তে ইমাম ছাবে অউ বাড়ির হাল-হকিকত বুজিয়া যে দাম ঠিক করবা, ইটাউ অইবো এর সঠিক দাম। 15 অখন অউ বাড়িরে হে খালাছ করিয়া নিতো চাইলে, অউ দামর লগে আরো পাচ বাটর এক বাট বেশি দিতে অইবো। তেউ বাড়ি খান তার অইবো।
16 “কুনু মানষে যুদি তার নিজর জমি-মিরাসর কুনু এক অংশরে মাবুদর নামে মান্নত করিয়া পাক-পবিত্র কইয়া আলগ করিলায়, তে অউ জমিনো যে পরিমানে খেত অয়, অউ ফসলর পরিমান বুজিয়া এর দাম ঠিক করতে অইবো। পরতেক পাচ মন বার্লি বিচর দাম হিসাবে আধা সের রুপা ধরবায়। 17 আর জমি-মিরাস ফিরত পাওয়ার বছর যুদি হে তার জমিনরে পাক-পবিত্র কইয়া মান্নত করে, তে অউ নিয়ম মাফিক ইমাম ছাবে যে দাম ঠিক করবা, ইটাউ অইবো এর সঠিক দাম। 18 অইলে ফিরত পাওয়ার বছরর বাদে যুদি হে তার মান্নত করে, তে বাদর ফিরত পাওয়ার বছর পর্যন্ত হিসাব করিয়া যত বছর অয়, অতো বছরর ফসলর হিসাবে ইমাম ছাবে এর দাম ঠিক করবা, বছর হিসাবে জমিনর দাম কমবো। 19 আর মান্নত কররা জনে যুদি তার জমিনরে খালাছ করিয়া নিতো চায়, তে ঠিক করা অউ দামর লগে আরো পাচ বাটর এক বাট বেশি দিতে অইবো, তেউ জমি খান তার অইবো। 20 অইলে হে যুদি খালাছ করি না নেয়, বা দুছরা জনর গেছে বেচিলায়, তে অউ জমিন খান আর খালাছ করিয়া নিবার পথ নাই। 21 জমি-মিরাস ফিরত পাইবার বছর যেবলা জমি খান এমনেউ খালাছ অইযিবো, অউ সময় ই জমি খান মাবুদর নামে চিরকালিন সাফ-কবালা জমিনর লাখান পাক-পবিত্র ছামানা হিসাবে গইন্য অইবো। ইখান অইযিবো ইমাম ছাবর জমি। 22 নিজর বাফাইতি জমি নায় ইলা কুনু খরিদা জমিনরে কেউ যুদি মান্নত মানিয়া পাক-পবিত্র হিসাবে গইন্য করায়, 23 তে ইমাম ছাবে ফিরত পাওয়ার বছর পর্যন্ত হিসাব করিয়া ইখানর দাম ঠিক করবা, আর হউ দিনউ অউ জমিনর দামরে হে মাবুদর নামে পাক-পবিত্র ছামানা হিসাবে দিলাইতে অইবো। 24 আর জমি খান হে যার গেছ থাকি লইছিল, জমি-মিরাস ফিরত পাইবার বছর ইখান হিরবার হউ মুল মালিকর আতো যাইবো। 25 হকল জিনিসর দাম ঠিক করিও, এবাদত খানার মাপে। পরতেক বিশ রতিয়ে এক তোলা গনিও।
26 “কুনু পশুর পয়লা মেদা বাইচ্চারে কেউ মাবুদর নামে লিল্লা দিবার লাগি মান্নত করতো পারতো নায়, ইটা তো এমনেউ মাবুদর। ইতা গরু-ছাগল, মেড়া যেতার বাইচ্চাউ অউক, ইটা মাবুদর। 27 যুদি ইটা কুনু হারাম পশুর পয়লা মেদা বাইচ্চা অয়, তে ইমাম ছাবর ঠিক করা দামর লগে আরো পাচ বাটর এক বাট বেশি দিয়া ইটারে খালাছ করি নিতো পারবো। আর হে যুদি খালাছ করি না নেয়, তে অউ দামে ইটারে বেচিলিতে অইবো।
28 “অইলে কুনু মানষে যুদি তার নিজর কুনু ছামানা মাবুদর নামে চিরকালিন ছাফ-কবালা দলিলর লাখান মান্নত করিলায়, তে অউ মান্নত করা ছামানা আর খালাছ করিয়া ফিরত নিতো পারতো নায়, বা বেচতোও পারতো নায়। ইতা জমি-জমা অউক, বা কুনু মানুষ, বা পশু অইলেও, ইতা চিরকালর লাগি মাবুদর নামে খাছ পবিত্র ছামানা হিসাবে গইন্য অইবো। 29 কুনু মানষরে মাবুদর নামে চিরকালর লাগি অলা মান্নত করিয়া দিলাইলে, তারে আর খালাছ করি নেওয়া যাইতো নায়, তারে জানে মারিলিতে অইবো।
30 “জমিনো থাকি যেতা ফল-ফসল মিলে, ইতার দশ বাটর এক বাট তো মাবুদর। ইতা খেতর ফসল অউক বা গাছর ফল অউক, হকলতাউ মাবুদর নামে পাক-পবিত্র। 31 কেউ যুদি তার অউ দশ বাটর এক বাট খালাছ করিয়া নিতো চায়, তে এর লগে আরো পাচ বাটর এক বাট বেশি দিতে অইবো। 32 পরতেক পশুর পালর দশ বাটর এক বাট মাবুদর, মানি পালে পশু গনার সময় পরতেক দশ নম্বর পশু অগু মাবুদর নামে পাক-পবিত্র। 33 অউ দশ নম্বর পশু অগুইন বাদ বা ভালা ইতা দেখার কুনু জরুর নায়, বা ইটা বদলাইয়া দিবার সুযোগ নাই। কেউ যুদি ইটার বদলা দেয়, তে অউ দশ নম্বর পশু আর বদলা পশু দুইওটাউ মাবুদর নামে পাক-পবিত্র অইযিবো, ইতা আর খালাছ করি নেওয়া যাইতো নায়।”
34 মাবুদে তুর পাহাড়র উপরে মুছা নবীর গেছে, বনি ইছরাইলর লাগি অউ হুকুম-আহকাম অকল দান করছিলা॥