আল-জবুর ৬
এবাদত-বন্দেগি পরিচালকর লাগি: তারআলা বাজনাদি গাইতে অইবো, বাজনা সুর ‘শেমিনীথ’।
হজরত দাউদর মিজমর।
1 ধামকি দিও না গো মাবুদ গুছা করিয়া,
সাজা দিও না মোরে রাগ করিয়া।
2 দয়া করো আমায় মাবুদ হুকাই যাইয়ার আমি,
বেমার শিফা করো তুমি কাপের মোর আড্ডি।
3 ডরর চুটে আমার জান ধড়ফড় ধড়ফড় করে,
আর কতদিন চলবো ইলা মোর জীবনে?
4 ফিরিয়া চাও গো মাবুদ বাচাও আমার জান,
তুমার দয়ার দোহাই লাগে করো মোর আছান।
5 মরার বাদে তুমারে তো ডাকার নাই উপায়,
পাতালো হামানির বাদে তুমার গুনগান কে গায়?
6 কান্দি কান্দি আমার বিছনা পরতি রাইত ভিজাইলাই,
আমার চউখর পানিয়ে বিছনা-বালিশ ভিজিয়া যায়,
7 দিলর দুখে আমার চউখ হুকাই যার,
দুশমনর ডরে চউখ আমার কমজুর বনিযার।
8 আমার গেছ থাকি বাগো হকল নাফরমান,
মাবুদে তো হুনছইন আমার দিলর কান্দন।
9 পুরাপুর হুনছইন তাইন আমার মিনতি,
কবুল করছইন তাইন আমার আরজি।
10 আমার হক্কল দুশমন ডরর চুটে কাপউক,
শরম পাইয়া অখনউ আমার পিছ ছাড়উক॥